দন্তেৱাড়া (চত্তীশগড়), ২২ এপ্ৰিল (হি.স.)। আজি বস্তৰ সংমণ্ডলৰ নক্সাল প্ৰভাৱিত দান্তেৱাড়া জিলাৰ বাবে এক বিশেষ দিন হ'বলৈ গৈ আছে। কিংবদন্তি ক্ৰিকেটাৰ শচীন তেণ্ডুলকাৰ আজি দন্তেৱাড়া ভ্ৰমণলৈ ওলাইছে । তেওঁ উদ্বোধন কৰিব ছিন্দনাৰ, জাৱাংগাৰ দৰে গাঁৱত নিৰ্মাণ কৰা নতুন বহুমুখী ক্ৰীড়া খেলপথাৰ।

গীদাম প্ৰেক্ষাগৃহত শিক্ষক-শিক্ষয়িত্ৰী আৰু শিশুৰ সৈতে তেওঁৰ নিৰ্ধাৰিত বৈঠক আৰু পানেডা ক্ৰিকেট খেলপথাৰৰ উদ্বোধনী ভ্ৰমণ বাতিল কৰা হৈছে। মুখ্যমন্ত্ৰী বিষ্ণুদেৱ ছাইও শচীন তেণ্ডুলকাৰৰ সৈতে যোৱাৰ কথা আছিল যদিও কিবা কাৰণত তেওঁৰ ভ্ৰমণ বাতিল কৰা হৈছে।

কালেক্টৰ ময়ংক চতুৰ্বেদীয়ে উল্লেখ কৰে যে এই ভ্ৰমণ কেৱল উদ্বোধনী অনুষ্ঠান নহয়, বৰঞ্চ ‘ময়দান কাপ’ পদক্ষেপৰ জৰিয়তে জিলাখনৰ দুৰ্গম গাঁৱৰ শিশুসকলক ক্ৰীড়াৰ সৈতে সংযোগ কৰাৰ এক বৃহৎ পৰিকল্পনা। বিষয়াসকলৰ মতে, শচীন তেণ্ডুলকাৰ ফাউণ্ডেশ্যন আৰু প্ৰশাসনে যৌথভাৱে ৫০খন ক্ৰীড়া খেলপথাৰ প্ৰস্তুত কৰি আছে, ইয়াৰে ১৫খনৰ কাম সম্পূৰ্ণ হৈছে।

জিলা প্ৰশাসনৰ তথ্য অনুসৰি চাৰ্টাৰ্ড বিমানেৰে ৰায়পুৰৰ স্বামী বিবেকানন্দ বিমানবন্দৰত উপস্থিত হ’ব টেণ্ডুলকাৰ। তাৰ পৰা তেওঁ হেলিকপ্টাৰেৰে পোনে পোনে দন্তেৱাড়ালৈ উৰা মাৰিব। নক্সাল প্ৰভাৱিত অঞ্চলটোত আৰক্ষী প্ৰশাসনে বিশদ নিৰাপত্তাৰ ব্যৱস্থা কৰিছে। ইতিমধ্যে কালেক্টৰ মায়ংক চতুৰ্বেদী আৰু আৰক্ষী অধীক্ষক গৌৰৱ ৰায়ে ছিন্দনাৰ আৰু পানেডাৰ খেলপথাৰ পৰিদৰ্শন কৰিছে।

हिन्दुस्थान समाचार / মনোজ কুমাৰ শইকীয়া