পেৰিছ, ২১ এপ্ৰিল (হি.স.)। ডিফেণ্ডিং চেম্পিয়ন কাৰ্লোছ আলকাৰাজে ইংগিত দিছে যে তেওঁ এইবাৰৰ ফ্ৰেন্স অ’পেনত (ৰ’লেণ্ড গাৰোছ) অংশগ্ৰহণ নকৰিবও পাৰে, কাৰণ তেওঁৰ হাতৰ কব্জিৰ গুৰুতৰ আঘাত। ২২ বছৰীয়া স্পেনিছ খেলুৱৈগৰাকীয়ে কয় যে তেওঁ কামবেকত লৰালৰিকৈ যোৱাতকৈ সম্পূৰ্ণ ফিট হৈ ঘূৰি আহিব বিচাৰে।
যোৱা সপ্তাহত বাৰ্চিলোনাৰ ক্লে-ক’ৰ্ট প্ৰতিযোগিতাখনৰ পৰা আঁতৰি আহিবলগীয়া হৈছিল আলকাৰাজে ৰিটাৰ্ণ খেলি থকাৰ সময়ত হাতৰ কব্জিৰ সমস্যাৰ সন্মুখীন হোৱাৰ বাবে। পিছত পৰীক্ষাত দেখা গ’ল যে আঘাতটো আশা কৰাতকৈ অধিক গুৰুতৰ। ইয়াৰ পিছত তেওঁ মাদ্ৰিদ অ’পেনৰ পৰা আঁতৰি যায়, যাৰ ফলত ১৮ মে’ৰ পৰা আৰম্ভ হ’বলগীয়া ৰ’লেণ্ড গাৰোছত অংশগ্ৰহণৰ ওপৰত সন্দেহৰ সৃষ্টি হয়।
সোমবাৰে এক অনুষ্ঠানৰ সময়ত তেওঁ কয় যে অতি সোনকালে ঘূৰি আহি অধিক ক্ষতিৰ আশংকা কৰাতকৈ মই অলপ দেৰিকৈ কিন্তু সম্পূৰ্ণ ফিট হৈ উভতি অহাটো পছন্দ কৰিম।
তেওঁ লগতে কয়, মোৰ সন্মুখত এতিয়াও দীঘলীয়া কেৰিয়াৰ আছে। যদি মই এই ৰ'লেণ্ড গাৰ'ছত নিজৰ ওপৰত অত্যধিক হেঁচা কৰো, তেন্তে ই ভৱিষ্যতৰ প্ৰতিযোগিতাসমূহত প্ৰভাৱ পেলাব পাৰে।
মণ্টে কাৰ্লো মাষ্টাৰছৰ ফাইনেলত য়ানিক ছিনাৰৰ হাতত পৰাস্ত হোৱাৰ পিছত আলকাৰাজে বিশ্বৰ ১ নং ৰেংকিং হেৰুৱায়। অৱশ্যে তাৰ পূৰ্বে তেওঁ ক্লে ক’ৰ্টত একেৰাহে ১৭খন মেচত জয়লাভ কৰিছিল আৰু যোৱা ছিজনত ৰোম আৰু ৰ’লেণ্ড গাৰোছৰ খিতাপ দখল কৰিছিল।
हिन्दुस्थान समाचार / মনোজ কুমাৰ শইকীয়া
