হোজাই, ২১ এপ্ৰিল (হি.স.)। যজ্ঞ কনষ্ট্ৰাকচনৰ উদ্যোগত লংকাৰ ২নং কাকীত সদ্যঘোষিত হাইস্কুল শিক্ষান্ত পৰীক্ষাত উত্তীৰ্ণ ৰাজ্যখনৰ একাংশ শিক্ষাৰ্থীক সম্বৰ্ধনা জনোৱা হয় । সাংবাদিক চক্ৰপাণি পৰাশৰ আৰু অভিনেত্ৰী অমৃতা গগৈয়ে আগধৰা উক্ত অনুষ্ঠানটোত মুখ্য বক্তা হিচাপে উপস্থিত থাকে সাহিত্যিক, সমালোচক ময়ূৰ বৰা । উক্ত অনুষ্ঠানত ৰাজ্যখনৰ একাংশ হাইস্কুল শিক্ষান্ত পৰীক্ষাত উত্তীৰ্ণ শিক্ষাৰ্থীক অসমীয়াৰ স্বাভিমান ফুলাম গামোচা, চেলেং, জাপি, মানপত্ৰ আৰু নাহৰ গছৰ পুলিৰে সম্বৰ্ধনা জ্ঞাপন কৰা হয় ।
ৰাজ্যখনৰ হাইস্কুল শিক্ষান্ত পৰীক্ষাত উত্তীৰ্ণ প্ৰথম, দ্বিতীয় আৰু তৃতীয় স্থানপ্ৰাপ্ত ৪ গৰাকী শিক্ষাৰ্থীক সম্বৰ্ধনা দিয়াৰ লগতে ২৫ হাজাৰ টকা নগদ ধন দিয়া হয় । ৰাজ্যখনৰ হাইস্কুল শিক্ষান্ত পৰীক্ষাত ৯০% লাভ কৰা আৰ্থিক ভাবে দুৰ্বল ৫০ গৰাকী শিক্ষাৰ্থীক সম্বৰ্ধনা জনোৱা লগতে ১০ হাজাৰতকৈ নগদ ধন দিয়া হয় । আৰু বৃহত্তৰ কাকী অঞ্চলটোৰ ৬০ গৰাকী প্ৰথম বিভাগত উত্তীৰ্ণ শিক্ষাৰ্থীক সম্বৰ্ধনা জনোৱা লগতে নগদ ২ হাজাৰ টকাকৈ প্ৰদান কৰা হয় ।
---------------
হিন্দুস্থান সমাচাৰ / প্ৰকাশ ডেকা
22 Apr 2026
