টকিঅ’, ২১ এপ্ৰিল (হি.স.)। জাপান বতৰ বিজ্ঞান সংস্থাই সমগ্ৰ দেশতে ৮.০ বা তাতকৈ অধিক প্ৰাবল্যৰ ভূমিকম্পৰ সতৰ্কবাণী জাৰি কৰিছে। এই সতৰ্কবাণী সোমবাৰে অনুভূত হোৱা ৭.৭ প্ৰাৱল্যৰ ভূমিকম্পৰ পিছতে জাৰি কৰা হৈছে। এই ভূমিকম্প বিয়লি ৪:৫৩ বজাত উত্তৰ ইৱাটে উপকূলৰ পৰা নিলগত প্ৰশান্ত মহাসাগৰত আহিছিল। এই কম্পন ইমানেই প্ৰবল আছিল যে ভূমিকম্পৰ কেন্দ্ৰৰ পৰা শ শ কিলোমিটাৰ দূৰত্বত অৱস্থিত ৰাজধানী টকিঅ’ৰ বৃহৎ অট্টালিকাকো কঁপাই তুলিছিল।
জাপান টুডে কাকতৰ তথ্য অনুসৰি নতুন বৃহৎ ভূমিকম্পৰ সম্ভাৱনা স্বাভাৱিকতকৈ যথেষ্ট বেছি। অগ্নিনিৰ্বাপক আৰু দুৰ্যোগ ব্যৱস্থাপনা সংস্থাৰ তথ্য অনুসৰি ক্ষতিগ্ৰস্ত অঞ্চলৰ স্থানীয় কৰ্তৃপক্ষই ১ লাখ ৮২ হাজাৰতকৈ অধিক বাসিন্দাক অবাধ্যতামূলকভাৱে খালী কৰাৰ নিৰ্দেশনা জাৰি কৰে। সংস্থাটোৰ মতে, ভূমিকম্পৰ প্ৰায় ৪০ মিনিট পিছত ইৱাটে প্ৰিফেকচাৰৰ কুজিৰ এটা বন্দৰত ৮০ চেণ্টিমিটাৰ উচ্চতাৰ চুনামীৰ ঢৌৱে আঘাত হানে।
জাপানৰ মুখ্য কেবিনেট সচিব মিনোৰু কিহাৰাই সংবাদমেলত কয় যে এতিয়ালৈকে কোনো বৃহৎ ক্ষতিৰ খবৰ পোৱা নাই। ৰাষ্ট্ৰীয় সম্প্ৰচাৰক এন এইচ কেৰ ভিডিঅ’ ফুটেজতো ইৱাটেৰ কেইবাটাও বন্দৰৰ আশে-পাশে কোনো স্পষ্ট ক্ষতি হোৱা দেখা নগ’ল। অৱশ্যে আগন্তুক সপ্তাহত বিশেষকৈ আগন্তুক দুই-তিনি দিনৰ ভিতৰত এই অঞ্চলত প্ৰবল ভূমিকম্পৰ সৃষ্টি হ’ব পাৰে বুলি পুনৰ কয় বিষয়াসকলে।
প্রধানমন্ত্রীৰ কার্যালয়ৰ তথ্য অনুসৰি চৰকাৰে কোনো ধৰণৰ হতাহতি হৈছে নে সা-সম্পত্তিৰ গুৰুতৰ ক্ষতি হৈছে সেই তদন্ত অব্যাহত ৰাখিছে৷ প্ৰধানমন্ত্ৰী ছানাই টাকাইচিয়ে কয় যে, “যিসকল অঞ্চলৰ বাবে সতৰ্কবাণী জাৰি কৰা হৈছে, সেই অঞ্চলত বাস কৰা আপোনালোকে অনুগ্ৰহ কৰি উচ্চ আৰু নিৰাপদ স্থানলৈ যাওক।”
মন কৰিবলগীয়া যে জাপান বিশ্বৰ অন্যতম ভূমিকম্পৰ সক্ৰিয় দেশ। ই প্ৰশান্ত মহাসাগৰৰ ৰিং অৱ ফায়াৰৰ পশ্চিম প্ৰান্তত অৱস্থিত চাৰিটা প্ৰধান টেকটনিক প্লেটত অৱস্থিত। প্ৰায় ১২.৫ কোটি লোকৰ বাসস্থান এই দ্বীপপুঞ্জত সাধাৰণতে প্ৰতি বছৰে প্ৰায় ১৫০০ টা ভূমিকম্প হয় আৰু বিশ্বৰ প্ৰায় ১৮ শতাংশ ভূমিকম্পৰ সৃষ্টি হয়। এই ভূমিকম্পবোৰৰ অধিকাংশই মৃদু যদিও ইয়াৰ ফলত হোৱা ক্ষতি পৃথিৱীৰ তলৰ অৱস্থান আৰু গভীৰতাৰ ওপৰত নিৰ্ভৰ কৰে।
২০১১ চনত সংঘটিত হোৱা ৯.০ মাত্ৰাৰ সাগৰৰ তলৰ ভূমিকম্পৰ স্মৃতিয়ে এতিয়াও জাপানক খেদি ফুৰিছে।ভূমিকম্পৰ পিছত হোৱা ছুনামীৰ ফলত প্ৰায় ১৮,৫০০ লোকৰ মৃত্যু বা নিৰুদ্দেশ হৈছিল আৰু ফুকচিমা পাৰমাণৱিক উদ্যোগত ব্যাপক ধ্বংসলীলা হৈছিল। বতৰ বিজ্ঞান বিভাগে নানকাই ট্ৰাফৰ সমীপত ২০২৪ চনত সম্ভাৱ্য বৃহৎ ভূমিকম্পৰ বাবে প্ৰথম বিশেষ সতৰ্কবাণী জাৰি কৰিছে। ৮০০ কিলোমিটাৰ দীঘল এই সাগৰৰ তলৰ খাদটোৱেই হৈছে য’ত ফিলিপাইন সাগৰৰ সাগৰীয় টেকটনিক প্লেট (ছাবডাক্ট) লাহে লাহে জাপান অৱস্থিত মহাদেশীয় প্লেটৰ তলত গতি কৰি আছে।
চৰকাৰে কয় যে নানকাই ট্ৰাফত ভূমিকম্প আৰু তাৰ পিছত ছুনামীৰ ফলত ২ লাখ ৯৮ হাজাৰ লোকৰ মৃত্যু হ’ব পাৰে আৰু ২ ট্ৰিলিয়ন ডলাৰ পৰ্যন্ত ক্ষতি হ’ব পাৰে। ২০২৫ চনৰ ডিচেম্বৰ মাহত উত্তৰ উপকূলত ৭.৫ প্ৰাবল্যৰ ভূমিকম্পৰ ফলত বৃহৎ ভূমিকম্পৰ সতৰ্কবাণী জাৰি কৰা হৈছিল। কম্পনত ৪০ জনতকৈ অধিক লোক আহত হৈছিল যদিও কোনো ডাঙৰ ক্ষতি হোৱা নাছিল।
हिन्दुस्थान समाचार / মনোজ কুমাৰ শইকীয়া
