অভিনেতা বৰুণ ধৱনৰ আগন্তুক ছবি হেয় জৱানী তো ইছক হোনা হেয়ৰ বাবে আগ্ৰহেৰে অপেক্ষা কৰি আছে দৰ্শকে। এই ছবিখনৰ জৰিয়তে ছবছৰৰ অন্তত পৰিচালক ডেভিদ ধৱনে পুনৰ পৰিচালনাৰ ক্ষেত্ৰলৈ ঘূৰি আহিছে। শেহতীয়াকৈ মুক্তি পোৱা ছবিখনৰ টিজাৰত দুটা কৃত্ৰিম বুদ্ধিমত্তা (এআই) শিশুৰ আভাস পোৱাৰ লগে লগে ছ’চিয়েল মিডিয়াত এক আলোচনাৰ সূচনা হয়। টিজাৰৰ এই অংশটোক সন্দৰ্ভত ইণ্টাৰনেটত তীব্ৰ প্ৰতিক্ৰিয়াৰ পিছত এতিয়া প্ৰথমবাৰৰ বাবে নিজৰ মৌনতা ভংগ কৰিছে ডেভিদ ধৱনে।
ডেভিদ ধৱনে স্পষ্ট কৰি দিয়ে যে ছবিখনত কোনো এআই ব্যৱহাৰ কৰা হোৱা নাছিল। তেওঁ কয় যে এই পৰীক্ষাটো কেৱল টিজাৰটোক বেলেগ আৰু আকৰ্ষণীয় কৰি তুলিবলৈ কৰা হৈছে। তেওঁৰ মতে, চিনেমাখনত এআইৰ দৰে একো নাই। দৰ্শকক নতুন কিবা এটা চাবলৈ টিজাৰৰ এটা অংশহে আছিল । প্ৰকৃত কাহিনীটো সম্পূৰ্ণ বেলেগ, আৰু যেতিয়া গীতবোৰ মুক্তি পাব তেতিয়া মানুহে ছবিখনৰ প্ৰকৃত স্বৰূপ বুজি পাব। ডেভিদৰ বক্তব্যই স্পষ্ট কৰি দিছে যে টিজাৰত দেখুওৱা আভাস ছবিখনৰ কাহিনীৰ অংশ নহয়।
ছবিখনত মুখ্য চৰিত্ৰত অভিনয় কৰিছে বৰুণ ধৱন আৰু মৃণাল ঠাকুৰে। মনীষ পল, জিমি শ্বাৰগিল, মৌনি ৰয়, আৰু চাংকি পাণ্ডেইও গুৰুত্বপূৰ্ণ ভূমিকা পালন কৰে। ডেভিদ আৰু বৰুণৰ একেলগে চতুৰ্থখন ছবি হ’ব আৰু অহা ২২ মে’ত ছবিগৃহত মুক্তি পাব। একেদিনাই মুক্তি পাবলগীয়া অনন্যা পাণ্ডেৰ ছবি চান্দ মেৰা দিলৰ সৈতে প্ৰতিযোগিতাত অৱতীৰ্ণ হ'ব ছবিখন ।
हिन्दुस्थान समाचार / মনোজ কুমাৰ শইকীয়া
