কলকাতা, ২০ এপ্ৰিল (হি.স.)। পশ্চিম বংগ বিধানসভা নিৰ্বাচনৰ পূৰ্বে তৃণমূল কংগ্ৰেছৰ নিৰ্বাচনী কৌশল সংগঠন আই-পেকয়ে ২০ দিনৰ বাবে কাম বন্ধ কৰাৰ সিদ্ধান্ত লৈ আলোড়নৰ সৃষ্টি কৰিছে। খবৰ অনুসৰি শনিবাৰে গভীৰ নিশা সংস্থাটোৱে প্ৰচাৰ কৰ্মীসকললৈ ইমেইল প্ৰেৰণ কৰি ২০ দিনৰ ছুটী ল’বলৈ কয়। দেওবাৰে যেতিয়া এই খবৰ বিয়পি পৰিছিল, তেতিয়া তৃণমূল কংগ্ৰেছে প্ৰথমে অস্বীকাৰ কৰিবলৈ চেষ্টা কৰিছিল। এই খবৰটো ভুৱা বুলি জনাই দলটোৱে এক বিবৃতি প্ৰকাশ কৰে। অৱশ্যে সন্ধিয়া দেৰিলৈকে মুখ্যমন্ত্ৰী মমতা বেনাৰ্জীয়ে স্বীকাৰ কৰে যে সঁচাকৈয়ে আই-পিএচিয়ে কাম বন্ধ কৰি দিছে। ইয়াৰ পিছতে তৃণমূল কংগ্ৰেছে লগে লগে এটা বেকআপ দল নিয়োগ কৰে।

সূত্ৰ অনুসৰি, প্ৰথম পৰ্যায়ৰ ভোটগ্ৰহণৰ ঠিক পূৰ্বে আই-পিএচিৰ প্ৰত্যাহাৰে তৃণমূলৰ নেতাসকলৰ মাজত উদ্বেগ প্ৰকাশ কৰিছে, কিয়নো ৰাজ্যখনৰ ১৫২টা সমষ্টিত বৃহস্পতিবাৰে ভোটগ্ৰহণৰ দিন ধাৰ্য কৰা হৈছে। অৱশ্যে দলটোৱে দাবী কৰে যে সংস্থাটোৰ ইতিমধ্যে নিজাকৈ প্ৰশিক্ষিত পেছাদাৰী দল আছে, যিয়ে এতিয়া প্ৰচাৰ, বুথ পৰিচালনা, আৰু ভোটগ্ৰহণৰ দিন নিৰীক্ষণৰ কাম চম্ভালিব। অভিষেক বেনাৰ্জীৰ কার্যালয়ৰ পৰা কাম কৰা বুলি খবৰ পোৱা এই দলটোৱে ইতিমধ্যে কেইবাখনো জিলাত কাম কৰি আছিল৷ ইয়াক এতিয়া অধিক দায়িত্ব দিয়া হৈছে। বুথ পৰ্যায়ত হোৱাটছএপ গ্ৰুপ সৃষ্টি কৰা হৈছে, য’ত ভোটদানৰ শতাংশ, ছীল কৰাৰ সময়, আৰু স্থানীয় অৱস্থাৰ তথ্য তৎক্ষণাত প্ৰেৰণ কৰা হ’ব।

ইফালে আই-পিএচিৰ কৰ্মচাৰীৰ মাজত অনিশ্চয়তাৰ খবৰ পোৱা গৈছে। কেইবাখনো জিলাত তেওঁলোকৰ বাবে পৰিবহণৰ ব্যৱস্থা বন্ধ কৰি দিয়া হৈছে। এই পটভূমিত মুখ্যমন্ত্ৰী মমতা বেনাৰ্জীয়ে ৰাজহুৱা সভাত কয় যে কোনো লোক নিবনুৱা নহয় বুলি নিশ্চিত কৰিব। আমাৰ বাবে কাম কৰা লোকসকলক ভয় খুৱাইছে। যদি তেওঁলোকক আঁতৰাই দিয়া হয় তেন্তে আমি তেওঁলোকক চাকৰিৰ ব্যৱস্থা কৰিম। আমি এজনো যুৱকক নিবনুৱা হ'বলৈ নিদিওঁ।-বেনাৰ্জীয়ে কয়।

মন কৰিবলগীয়া যে প্ৰৱৰ্তন সঞ্চালকালয়ৰ কাৰ্যকলাপৰ পিছত যোৱা কেইমাহমানত আই-পিএচিৰ কেইবাগৰাকীও বিষয়াৰ ওপৰত হেঁচা বৃদ্ধি পাইছে। ইমেইলযোগে সংস্থাটোৱে কয় যে আইনী কাৰণত সাময়িকভাৱে কাম বন্ধ কৰি দিছে। তৃণমূল কংগ্ৰেছে আনুষ্ঠানিকভাৱে দাবী কৰিছে যে এই অভিযান পৰিকল্পনা অনুসৰি অব্যাহত আছে আৰু কোনো বাধা দিয়া হোৱা নাই। কিন্তু ৰাজনৈতিক মহলৰ মতে আই-পিএচিৰ অস্থায়ী প্ৰত্যাহাৰে নিৰ্বাচনী সমীকৰণত প্ৰভাৱ পেলাব পাৰে।

हिन्दुस्थान समाचार / মনোজ কুমাৰ শইকীয়া