নতুন দিল্লী, ২০ এপ্ৰিল (হি.স.)। ভাৰত আৰু দক্ষিণ কোৰিয়াই তেওঁলোকৰ সৰ্বাংগীন অৰ্থনৈতিক অংশীদাৰিত্ব চুক্তি (চিইপিএ) উন্নীতকৰণৰ বাবে আলোচনা আৰম্ভ কৰিবলৈ সন্মত হৈছে। এই সিদ্ধান্তৰ লক্ষ্য হৈছে বিশ্বৰ ভূ-ৰাজনৈতিক উত্তেজনা বৃদ্ধি আৰু বাণিজ্যিক ব্যাঘাতৰ মাজত দুয়োখন দেশৰ মাজত অৰ্থনৈতিক সহযোগিতাৰ এক নতুন দিশ প্ৰদান কৰা। সোমবাৰে হায়দৰাবাদ হাউছত প্ৰধানমন্ত্ৰী নৰেন্দ্ৰ মোডী আৰু দক্ষিণ কোৰিয়াৰ ৰাষ্ট্ৰপতি লি জে-ম্যুঙৰ মাজত দ্বিপাক্ষিক আলোচনাৰ অন্তত এই ঘোষণা কৰা হৈছে। আলোচনাৰ সময়ত দুয়োখন দেশৰ মাজত কেইবাখনো বুজাবুজিৰ চুক্তি আৰু অন্যান্য গুৰুত্বপূৰ্ণ চুক্তিৰ আদান-প্ৰদান হয়।

হায়দৰাবাদ হাউছত যৌথ সংবাদমেলৰ সময়ত প্ৰধানমন্ত্ৰী মোদীয়ে কয়, “চিপৰ পৰা জাহাজলৈকে, প্ৰতিভাৰ পৰা প্ৰযুক্তিলৈকে, মনোৰঞ্জনৰ পৰা শক্তিলৈকে—ভাৰত আৰু কোৰিয়াই যৌথভাৱে সহযোগিতাৰ নতুন সুযোগ উপলব্ধি কৰিব।” তেওঁ এই ভ্ৰমণক দ্বিপাক্ষিক সম্পৰ্কৰ বাবে এক “টাৰ্নিং পইণ্ট” বুলি অভিহিত কৰি কয় যে দুয়োখন দেশে নিজৰ অংশীদাৰিত্বক “ভৱিষ্যমুখী” দিশত লৈ গৈছে।

প্ৰধানমন্ত্ৰীয়ে কয় যে ভাৰত আৰু দক্ষিণ কোৰিয়াৰ মাজত দ্বিপাক্ষিক বাণিজ্য বৰ্তমান প্ৰায় ২৭ বিলিয়ন ডলাৰ, ২০৩০ চনৰ ভিতৰত ইয়াক ৫০ বিলিয়ন ডলাৰলৈ বৃদ্ধি কৰাৰ লক্ষ্যৰে।এই লক্ষ্যত উপনীত হ’বলৈ দুয়োখন দেশে “ভাৰত-কোৰিয়া বিত্তীয় মঞ্চ” স্থাপনকে ধৰি কেইবাটাও গুৰুত্বপূৰ্ণ পদক্ষেপ গ্ৰহণ কৰিবলৈ সন্মত হৈছে।

ডিজিটেল আৰু প্ৰযুক্তি খণ্ডত সহযোগিতা শক্তিশালী কৰাৰ বাবে ভাৰত-কোৰিয়া ডিজিটেল দলংৰ পদক্ষেপ ঘোষণা কৰা হৈছে। এই পদক্ষেপত কৃত্ৰিম বুদ্ধিমত্তা, অৰ্ধপৰিবাহী, তথ্য প্ৰযুক্তিৰ দৰে ক্ষেত্ৰত যৌথ প্ৰচেষ্টা জড়িত হ’ব।

দুয়োখন দেশৰ সাংস্কৃতিক সম্পৰ্কৰ কথা উল্লেখ কৰি প্ৰধানমন্ত্ৰী মোদীয়ে কয় যে ভাৰত আৰু কোৰিয়াৰ মাজত হাজাৰ হাজাৰ বছৰৰ ঐতিহাসিক সম্পৰ্ক আছে। তেওঁ অযোধ্যাৰ ৰাজকুমাৰী সুৰীৰত্ন আৰু কোৰিয়াৰ ৰজা কিম-ছুৰোৰ কাহিনীক ভাগ-বতৰা সাংস্কৃতিক ঐতিহ্যৰ প্ৰতীক হিচাপে উল্লেখ কৰে। তেওঁ উল্লেখ কৰে যে কোৰিয়ান পপ সংস্কৃতি আৰু টেলিভিছন ধাৰাবাহিক ভাৰতত জনপ্ৰিয়তা লাভ কৰিছে, আনহাতে কোৰিয়াত ভাৰতীয় চিনেমা আৰু সংস্কৃতিৰ প্ৰতি আগ্ৰহ বাঢ়িছে। ২০২৮ চনত দুয়োখন দেশে ভাৰত-কোৰিয়া বন্ধুত্ব মহোৎসৱ অনুষ্ঠিত কৰাৰ কথাও ঘোষণা কৰে, যিয়ে সাংস্কৃতিক আদান-প্ৰদান আৰু অধিক প্ৰসাৰিত কৰিব।

বিশ্বজনীন বিষয়ৰ ওপৰত আলোচনা কৰি প্ৰধানমন্ত্ৰী মোদীয়ে কয় যে বৰ্তমান সময়ত বিশ্ব শান্তি আৰু স্থিতিশীলতা নিশ্চিত কৰাটো অতি গুৰুত্বপূৰ্ণ। তেওঁ কয় যে ভাৰত আৰু কোৰিয়াৰ ভাৰত-প্ৰশান্ত মহাসাগৰীয় অঞ্চলৰ বাবে এক উমৈহতীয়া দৃষ্টিভংগী আছে আৰু আঞ্চলিক শান্তি, স্থিতিশীলতা, আৰু সৰ্বাংগীন উন্নয়নৰ বাবে একেলগে কাম কৰিব।

এই উপলক্ষে দক্ষিণ কোৰিয়াৰ ৰাষ্ট্ৰপতি লি জে-ম্যুঙে ২০৩০ চনৰ ভিতৰত দুয়োখন দেশৰ দ্বিপাক্ষিক বাণিজ্য ৫০ বিলিয়ন ডলাৰ লাভ কৰাৰ লক্ষ্য লোৱা বুলি উল্লেখ কৰে।তেওঁ লগতে কয় যে দুয়োগৰাকী নেতাই মধ্যপ্ৰাচ্যৰ পৰিস্থিতিৰ বিষয়ে আলোচনা কৰে আৰু তাত শান্তি আৰু স্থিতিশীলতা পুনৰুদ্ধাৰ কৰাটো বিশ্ব অৰ্থনীতি আৰু নিৰাপত্তাৰ বাবে অতি প্ৰয়োজনীয় বুলি একমত প্ৰকাশ কৰে। ৰাষ্ট্ৰপতি লীয়ে জনোৱা মতে, দুয়োখন দেশৰ মাজত ইলেক্ট্ৰনিক পেমেণ্ট চিষ্টেম সংযোগ কৰাৰ বাবে এক চুক্তিত উপনীত হৈছে, যাৰ ফলত দুয়োখন দেশৰ নাগৰিকে ইজনে সিজনৰ দেশলৈ যাওঁতে স্থানীয় কিউআৰ ক’ডৰ জৰিয়তে পেমেণ্ট কৰিব পাৰিব।

দুয়োগৰাকী নেতাই আন্তঃৰাষ্ট্ৰীয় মঞ্চত সহযোগিতা বৃদ্ধি আৰু বিশ্বৰ প্ৰতিষ্ঠানসমূহৰ সংস্কাৰৰ প্ৰয়োজনীয়তাৰ ওপৰতো গুৰুত্ব আৰোপ কৰে। তেওঁ কয় যে পৰিৱৰ্তিত বিশ্বজনীন প্ৰত্যাহ্বানসমূহ মোকাবিলা কৰিবলৈ সমন্বিত প্ৰচেষ্টা প্ৰয়োজনীয়।

हिन्दुस्थान समाचार / মনোজ কুমাৰ শইকীয়া