নতুন দিল্লী, ২০ এপ্ৰিল (হি.স.)। টেলিকমিউনিকেচন বিভাগৰ অধীনস্থ টেলিকমিউনিকেচন ডেভেলপমেণ্ট চেণ্টাৰ (চি-ডট)য়ে দেশত চাইবাৰ সুৰক্ষা সজাগতা বৃদ্ধিৰ বাবে এক উল্লেখযোগ্য পদক্ষেপ গ্ৰহণ কৰিছে। এই পদক্ষেপৰ অংশ হিচাপে চি-ড অ’ টিয়ে জাম্পছ অটোমেচন এল এল পিৰ সৈতে এক অভিনৱ গেম ভিত্তিক চাইবাৰ সুৰক্ষা প্ৰশিক্ষণ মঞ্চ গঢ়ি তোলাৰ বাবে চুক্তিবদ্ধ হৈছে। এই চুক্তিখন চি-ড’টিৰ সহযোগিতামূলক গৱেষণা কাৰ্যসূচীৰ অংশ।

কেন্দ্ৰীয় যোগাযোগ মন্ত্ৰালয়ৰ তথ্য অনুসৰি স্বাক্ষৰ অনুষ্ঠানত চি-ড অ’ টিৰ মুখ্য কাৰ্যবাহী বিষয়া ড০ ৰাজকুমাৰ উপাধ্যায়, জাম্পছ অটোমেচনৰ প্ৰযুক্তি মুৰব্বী ৰোহন চণ্ডক, ব’ৰ্ডৰ সদস্য,কে ধৰি অন্যান্য জ্যেষ্ঠ বিষয়াসকল উপস্থিত থাকে।

এই পদক্ষেপৰ অধীনত বিকশিত কৰা প্লেটফৰ্মে পৰম্পৰাগত চাইবাৰ সুৰক্ষা প্ৰশিক্ষণক অধিক আকৰ্ষণীয়, ইন্টাৰেক্টিভ আৰু ফলপ্ৰসূ কৰি তুলিব। ইয়াত গেমিং-ভিত্তিক মডিউল, লিডাৰবৰ্ড (স্ক'ৰ টেবুল), এটা শিক্ষণ ব্যৱস্থাপনা ব্যৱস্থা, আলোচনা মঞ্চ আৰু বাস্তৱ জীৱনৰ পৰিস্থিতি অন্তৰ্ভুক্ত হ'ব।

এই বাস্তৱিক পৰিস্থিতিসমূহত ফিছিং, ছ’চিয়েল ইঞ্জিনিয়াৰিং, মেলৱেৰ প্ৰতিকাৰ, আৰু সংকট ব্যৱস্থাপনাৰ দৰে প্ৰত্যাহ্বানসমূহ অন্তৰ্ভুক্ত হ’ব। ইয়াৰ দ্বাৰা সংস্থা আৰু ব্যৱহাৰকাৰীসকলে চাইবাৰ ভাবুকিসমূহ বুজিবলৈ আৰু ইয়াক ফলপ্ৰসূভাৱে মোকাবিলা কৰিবলৈ তেওঁলোকৰ সামৰ্থ্য বিকাশ কৰাত সহায় কৰিব।

এই প্লেটফৰ্মৰ এটা মূল বৈশিষ্ট্য হ’ব ইয়াৰ উন্নত পৰিৱেশন মূল্যায়ন আৰু পুৰস্কাৰ ব্যৱস্থা। ইয়াৰ উপৰিও ইয়াত এটা কৃত্ৰিম বুদ্ধিমত্তা (এআই)-ভিত্তিক বিশ্লেষণ ইঞ্জিন অন্তৰ্ভুক্ত কৰা হ’ব যিয়ে ব্যৱহাৰকাৰীৰ পৰিৱেশন মূল্যায়ন কৰিব, তেওঁলোকৰ স্তৰৰ ওপৰত ভিত্তি কৰি প্ৰশিক্ষণৰ অসুবিধা সামঞ্জস্য কৰিব, আৰু নতুন আৰু উদীয়মান চাইবাৰ ভাবুকিসমূহৰ সৈতে মোকাবিলা কৰিবলৈ বিষয়বস্তু অহৰহ আপডেট কৰিব।

চি-ডিঅ’টিৰ চিইঅ’ ড০ ৰাজকুমাৰ উপাধ্যায়ে এই পদক্ষেপক “আত্মনিৰ্ভৰশীল ভাৰত”ৰ দৃষ্টিভংগী বাস্তৱায়িত কৰাৰ দিশত এক গুৰুত্বপূৰ্ণ পদক্ষেপ বুলি অভিহিত কৰে। তেওঁ কয় যে এই প্লেটফৰ্মে ব্যৱহাৰকাৰীসকলক চাইবাৰ ভাবুকি চিনাক্ত আৰু ফলপ্ৰসূভাৱে মোকাবিলা কৰিবলৈ প্ৰস্তুত কৰিব।

জাম্পছ অটোমেচনৰ ৰোহন চণ্ডকে কয় যে এই প্লেটফৰ্মে চাইবাৰ সুৰক্ষা প্ৰশিক্ষণক অধিক ইন্টাৰেক্টিভ আৰু প্ৰভাৱশালী কৰি তুলিব, যাৰ ফলত ব্যৱহাৰকাৰীৰ আচৰণত ইতিবাচক পৰিৱৰ্তন হ’ব আৰু মানুহৰ ফলত হোৱা চাইবাৰ বিপদ হ্ৰাস পাব।

हिन्दुस्थान समाचार / মনোজ কুমাৰ শইকীয়া