গুৱাহাটী, ০২ এপ্ৰিল (হি.স.)। অসমৰ ষষ্ঠদশ বিধানসভা নিৰ্বাচনলৈ মাজত মাত্ৰ এসপ্তাহ থকা সময়তে আঞ্চলিক দল অসম গণ পৰিষদে আজি বৃহস্পতিবাৰে মুকলি কৰে দলটোৰ নিৰ্বাচনী ইস্তাহাৰ ৷ এই নিৰ্বাচনী সংকল্প পত্ৰত সুৰক্ষিত সমৃদ্ধিশালী আৰু বিকশিত অসমৰ প্ৰতিশ্ৰুতি দিছে অগপই। লগতে অসম চুক্তিৰ প্ৰতিটো দফা ৰূপায়ণ, খিলঞ্জীয়া লোকৰ সুৰক্ষা প্ৰদান, জুবিন গাৰ্গৰ নামত এটা অত্যাধুনিক সাংস্কৃতিক গৱেষণা কেন্দ্ৰ স্থাপন, ৰাজ্যৰ যুৱক-যুৱতীক চৰকাৰী-বেচৰকাৰী খণ্ডত নিয়োগৰ প্ৰতিশ্ৰুতিৰ লগতে কৃষি খণ্ডৰ বৈপ্লৱিক পৰিৱৰ্তনকে ধৰি ১৮ টা প্ৰতিশ্ৰুতি দিয়া হৈছে দলটোৱে সদৰি কৰা সংকল্প পত্ৰত।

উল্লেখ্য যে ১৮টা প্ৰতিশ্ৰুতিৰে মুকলি কৰা অগপৰ সংকল্প পত্রত উল্লেখ কৰা মুল বিষয় সমূহ হৈছে- সুৰক্ষিত সমৃদ্ধিশালী আৰু বিকশিত অসমৰ প্ৰতিশ্ৰুতিৰে অসম চুক্তিৰ প্ৰতিটো দফা ৰূপায়ণ কৰা হ’ব ৷ খিলঞ্জীয়া লোকৰ সুৰক্ষা প্ৰদান, জুবিন গাৰ্গৰ নামত এটা অত্যাধুনিক সাংস্কৃতিক গৱেষণা কেন্দ্র স্থাপনৰ প্ৰতিশ্ৰুতি ৷ এখন অত্যাধুনি অসম গঢ়াৰ লক্ষ্যৰে ৰাজ্যৰ যুৱক-যুৱতী চৰকাৰী-বেচৰকাৰী খণ্ডত নিয়োগৰ প্ৰতিশ্ৰুতি দিয়াৰ উপৰিও কৃষি খণ্ডৰ বৈপ্লৱিক পৰিৱৰ্তন ,ৰাজ্যৰ ভিতৰুৱা অঞ্চলত স্বাস্থ্য খণ্ডৰ উন্নয়ন, বানপানীক ৰাষ্ট্ৰীয় সমস্যাৰূপে ঘোষণাৰ বাবে কেন্দ্ৰক আহ্বান জনোৱাৰ প্ৰতিশ্ৰুতি দিয়ে অগপই ৷

একেদৰে দলটোৱে ষষ্ঠ অনুসূচী এলেকাৰ সৰ্বাংগীন উন্নয়নৰ প্ৰতিশ্ৰুতি দিয়াৰ সমান্তৰালভাৱে অসমৰ খিলঞ্জীয়া সংখ্যালঘু লোকৰ সৰ্বাংগীন উন্নয়নক প্ৰাধান্য দিয়াৰ এক প্ৰতিশ্ৰুতি উল্লেখ কৰে সংকল্প পত্ৰত ৷ দলটোৰ

ইস্তাহাৰ মুকলি অনুষ্ঠানত অগপৰ সাধাৰণ সম্পাদক ডা:কমলা কলিতা, মনোজ শইকীয়া, উপ-সভাপতি ড:জয়নাথ শৰ্মা সহ বহু কেইগৰাকী জ্যেষ্ঠ নেতা উপস্থিত থাকে ৷

হিন্দুস্থান সমাচাৰ / মনোজ কুমাৰ শইকীয়া