নতুন দিল্লী, ১৮ এপ্ৰিল (হি.স.)। আমেৰিকাই পুনৰবাৰ বিশ্বৰ সকলো দেশকে অহা এমাহৰ বাবে আৱদ্ধ হৈ থকা ৰাছিয়াৰ খাৰুৱা তেল আৰু অন্যান্য পেট্ৰলিয়াম সামগ্ৰী ক্ৰয় কৰাৰ অনুমতি প্ৰদান কৰিছে। এই অনুমতিৰ ফলত খাৰুৱা তেলৰ মূল্য আৰু অধিক হ্ৰাস পোৱাৰ আশাৰ সঞ্চাৰ হৈছে। ইয়াৰ পূৰ্বে আমেৰিকাই উল্লেখ কৰিছিল যে ৰাছিয়া আৰু ইৰাণৰ পৰা খাৰুৱা তেল ক্ৰয় কৰিবলৈ দেশসমূহক প্ৰদান কৰা অস্থায়ী ৰেহাই আগলৈ বৃদ্ধি কৰা নহ’ব। এই কথা নিশ্চিত কৰিছে আমেৰিকাৰ কোষাগাৰ সচিব স্কট বেছাণ্টে।
নিজৰ বিবৃতিত বেছাণ্টে স্পষ্ট কৰি দিয়ে যে ৰাছিয়াৰ খাৰুৱা তেল ক্ৰয়ৰ বাবে ৰেহাইৰ ম্যাদ ১১ এপ্ৰিলত শেষ হোৱাৰ বিপৰীতে ইৰাণৰ তেল ক্ৰয়ৰ ৰেহাইৰ ম্যাদ ১৯ এপ্ৰিলত শেষ হ’ব। এই তাৰিখ বৃদ্ধি কৰা নহ’ব। অৱশ্যে স্কট বেছাণ্টৰ এই বক্তব্যৰ পিছতে যোৱা নিশা সন্ধিয়া আমেৰিকাৰ কোষাগাৰ বিভাগে নিজৰ ৱেবছাইটত ঘোষণা কৰে যে তেওঁলোকে ৰাছিয়া আৰু ইৰাণৰ পেট্ৰলিয়াম সামগ্ৰী ক্ৰয়ৰ অনুজ্ঞাপত্ৰ প্ৰদান কৰিছে।
আমেৰিকাৰ এই শেহতীয়া স্থিতিৰ পিছত জাহাজত ভৰ্তি ৰাছিয়াৰ তেল ক্ৰয়ৰ অনুমতি ১৬ মে’লৈকে দিয়া হ’ব। আমেৰিকাই কয় যে ৰাছিয়াৰ খাৰুৱা তেল ক্ৰয়ৰ এই অনুজ্ঞাপত্ৰ প্ৰদান কৰা হৈছে আমেৰিকা প্ৰশাসনে বিশ্বজুৰি শক্তি সামগ্ৰীৰ মূল্য নিয়ন্ত্ৰণৰ প্ৰচেষ্টাৰ অংশ হিচাপে, যাৰ ফলত সম্ভাৱ্য অযুক্তিকৰ মূল্যবৃদ্ধি ৰোধ কৰা হৈছে।
মন কৰিবলগীয়া যে ৰাছিয়াৰ খাৰুৱা তেল ক্ৰয়ৰ বাবে এই সকাহৰ ফলত বিশ্বজুৰি খাৰুৱা তেলৰ যোগান সাময়িকভাৱে বৃদ্ধি পাব পাৰে। এই ৰাছিয়াৰ খাৰুৱা তেলে আন্তঃৰাষ্ট্ৰীয় বজাৰত খাৰুৱা তেলৰ মূল্যও কিছু পৰিমাণে মধ্যমীয়া কৰিব পাৰে। ইৰাণে হৰমুজ জলদ্বীপৰ মাজেৰে তেল টেংকাৰ অৱৰোধ কৰাৰ ফলত বিশ্বজুৰি খাৰুৱা তেল আৰু গেছৰ যোগানত ব্যাঘাত জন্মিছিল, যাৰ ফলত এই সামগ্ৰীসমূহৰ মূল্য বৃদ্ধি পাইছিল। পশ্চিম এছিয়াত যুদ্ধ আৰম্ভ হোৱাৰ আগতে হৰমুজ জলদ্বীপত বিশ্বৰ প্ৰায় ২০ শতাংশ তেল আৰু গেছ যোগান ধৰা হৈছিল।
हिन्दुस्थान समाचार / অৰৱিন্দ
