কলকাতা, ১৭ এপ্ৰিল (হি.স.)। মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নভিছে শুকুৰবাৰে কয় যে নাচিকস্থিত টাটা কনচালটেন্সি চাৰ্ভিচেছৰ গোচৰৰ চলি থকা তদন্তত যৌন নিৰ্যাতন আৰু ধৰ্মীয় হেঁচা প্ৰয়োগৰ অভিযোগ অত্যন্ত গুৰুতৰ বুলি ধৰা পৰিছে। তেওঁ কয় যে প্ৰাথমিক তদন্তৰ পৰা অনুমান কৰা হৈছে যে এই কাণ্ডসমূহ বিচ্ছিন্ন কাণ্ড নাছিল, বৰঞ্চ সুপৰিকল্পিত ব্যৱস্থাৰ অংশ হিচাপেহে চলি আছিল।

পশ্চিম বংগ বিধানসভা নিৰ্বাচনৰ পৰিপ্ৰেক্ষিতত নিৰ্বাচনী প্ৰচাৰৰ বাবে কলকাতাত উপস্থিত হৈ মুখ্যমন্ত্ৰী ফদনভিছে সংবাদ মাধ্যমৰ আগত কয় যে ৰাজ্য চৰকাৰে এই সমগ্ৰ বিষয়টো অতি গুৰুত্বসহকাৰে লৈছে আৰু দোষীৰ বিৰুদ্ধে কঠোৰ ব্যৱস্থা গ্ৰহণ কৰা হৈছে।

তেওঁ কয় যে এই বিষয়টো অতি গুৰুতৰ আৰু ইয়াৰ বিৰুদ্ধে আমি কঠোৰ ব্যৱস্থা গ্ৰহণ কৰিছো। আমাৰ দৃষ্টিগোচৰ হৈছে যে এই সকলোবোৰ সংগঠিত ব্যৱস্থাৰ অধীনত কৰা হৈছিল। সৌভাগ্যক্ৰমে টাটা কনছালটেন্সি চাৰ্ভিচেছৰ দৰে কোম্পানীয়ে এই তদন্তত গুৰুত্বপূৰ্ণ ভূমিকা পালন কৰিছে। কোম্পানীয়ে কোনো অপৰাধীক সুৰক্ষা দিয়াৰ চেষ্টা নকৰে।

মুখ্যমন্ত্ৰীয়ে উল্লেখ কৰে যে কোম্পানী পৰিচালনা সমিতিয়ে অভিযুক্ত কৰ্মচাৰীসকলৰ এই কাৰ্যক তীব্ৰ গৰিহণা দিছে আৰু ভুক্তভোগীসকলৰ ন্যায় সুনিশ্চিত কৰিবলৈ আইন প্ৰয়োগকাৰী সংস্থাসমূহৰ সৈতে সম্পূৰ্ণ সহযোগিতা আগবঢ়াইছে। তেওঁ লগতে কয় যে কোম্পানীয়ে অপৰাধীক সুৰক্ষা দিবলৈ অস্বীকাৰ কৰাটো ৰাজ্যখনৰ কৰ্পৰেট জবাবদিহিতাৰ এক গুৰুত্বপূৰ্ণ উদাহৰণ।

মুখ্যমন্ত্রীৰ মতে, নাচিক আৰক্ষীয়ে এই কথিত আঁচনিৰ সৈতে আৰু কিমানজন লোক জড়িত আছিল সেই কথা জানিবলৈ চোৱাচিতা কেমেৰাৰ ফুটেজ আৰু ডিজিটেল যোগাযোগৰ ৰেকৰ্ড পৰীক্ষা কৰি আছে। ৰাজ্যৰ প্ৰধান তথ্য প্ৰযুক্তি কেন্দ্ৰসমূহত কৰ্মক্ষেত্ৰৰ সুৰক্ষা নিশ্চিত কৰিবলৈ নিৰাপত্তা আৰু চোৰাংচোৱাগিৰি বৃদ্ধি কৰা হৈছে।

তদন্তত কৰ্মচাৰীসকলক নিৰ্দিষ্ট খাদ্য খাবলৈ আৰু নিজৰ ইচ্ছাৰ বিৰুদ্ধে ধৰ্মীয় কাম-কাজত অংশগ্ৰহণ কৰিবলৈ হেঁচা প্ৰয়োগ কৰা বুলিও জানিব পৰা গৈছে। এই পৰ্যন্ত আৰক্ষীয়ে জ্যেষ্ঠ কৰ্মচাৰী আৰু এজন মানৱ সম্পদ বিষয়াকে ধৰি কেইবাজনো লোকক গ্ৰেপ্তাৰ কৰিছে। আভ্যন্তৰীণ অভিযোগক আওকাণ কৰাৰ অভিযোগ উঠিছে ।

এই গোচৰৰ সংগঠিত প্ৰকৃতিৰ তদন্তৰ বাবে বিশেষ তদন্তকাৰী দল গঠন কৰা হৈছে।

हिन्दुस्थान समाचार / মনোজ কুমাৰ শইকীয়া