গোলাঘাট, ১৬ এপ্ৰিল (হি.স.)। গোলাঘাট জিলাৰ দেৰগাঁৱত যোৱাকালি বুধবাৰে নিশা সংঘটিত হয় এক চাঞ্চল্যকৰ চুৰিকাণ্ডৰ ঘটনা। দেৰগাঁও ৰাজহ চক্ৰৰ অৰ্ন্তগত মিছামৰা মৌজাৰ ধৰমপুৰ গাঁৱৰ নামঘৰত চোৰৰ দল সোমাই চলালে লুট-পাত ।

নামঘৰৰ গুৰু আসনত থকা সোণ-ৰূপৰ অলংকাৰ, নগদ ধন আৰু দান পাত্ৰ উঠাই লৈ যায় চোৰে । নামঘৰৰৰ নামঘৰীয়া আহি ভিতৰ সোমাওতেই মনিকুটৰ দৰ্জাৰ কিছু অংশ ভাঙি থকা প্ৰত্যক্ষ কৰে । চোৰে পইছা বিচাৰি নামঘৰৰ কীৰ্তন পুথিও লণ্ড-ভণ্ড কৰি থৈ গৈছে। নামঘৰীয়াই সন্ধ্যা বন্তি প্ৰজ্বলন কৰালৈকে আছিল সকলো ঠিকেই । তাৰ পিছতেই সংঘটিত হয় এই ঘটনা । বিহুৰ দিনটোতে ই এই চুৰিকাণ্ড সংঘটিত হোৱাত গাঁওখনত তীব্ৰ চাঞ্চল্যৰ সৃষ্টি হৈছে। দেৰগাঁও আৰক্ষী হৰিমন্দিৰত উপস্থিত হৈ আৰম্ভ কৰিছে তদন্ত ।

---------------

হিন্দুস্থান সমাচাৰ / প্ৰকাশ ডেকা