- অটল সুৰংগ আৰু পালামপুৰ কৃষি বিশ্ববিদ্যালয় পৰিদৰ্শন কৰিব ৰাষ্ট্ৰপতিয়ে

শিমলা, ১৬ এপ্ৰিল (হি.স.)। ৰাষ্ট্ৰপতি দ্ৰৌপদী মুৰ্মুৱে ২৭ এপ্ৰিলৰ পৰা ২ মে’লৈ ৬ দিনীয়া হিমাচল প্ৰদেশ ভ্ৰমণলৈ আহিব । তেওঁৰ মূল আৱাস শিমলাৰ সমীপৰ ৰাষ্ট্ৰপতিৰ বাসগৃহ মাছোব্ৰাত অৱস্থান কৰিব ।

ৰাষ্ট্ৰপতি সচিবালয়ে প্ৰকাশ কৰা প্ৰস্তাৱিত কাৰ্যসূচী অনুসৰি হিমাচল ভ্ৰমণৰ সময়ত ৰাষ্ট্ৰপতিগৰাকীয়ে অন্যান্য গুৰুত্বপূৰ্ণ অনুষ্ঠানত অংশগ্ৰহণ কৰাৰ উপৰিও শিমলা, অটল সুৰংগ আৰু পালামপুৰৰ হিমাচল প্ৰদেশ কৃষি বিশ্ববিদ্যালয় ভ্ৰমণ কৰিব।

২৭ এপ্ৰিলত বিশেষ বিমানেৰে চণ্ডীগড়ত উপস্থিত হ’ব ৰাষ্ট্ৰপতিগৰাকী আৰু তাৰ পৰা, হেলিকপ্টাৰেৰে মাছোব্ৰালৈ যাত্ৰা কৰিব, য’ত তেওঁ ৰাষ্ট্ৰপতিৰ বাসগৃহত থাকিব। শিমলাত থকা সময়ছোৱাত এইটোৱেই হ’ব তেওঁৰ প্ৰাথমিক বাসস্থান। মাছোব্ৰাত ৰাষ্ট্ৰপতিৰ বাসগৃহটো পৰম্পৰাগতভাৱে ৰাষ্ট্ৰপতিগৰাকীৰ শিমলা ভ্ৰমণৰ সময়ত আনুষ্ঠানিকভাৱে অৱস্থান স্থান হৈ আহিছে।

২৮ এপ্ৰিলত ৰাষ্ট্ৰপতিৰ বাসগৃহ মাছোব্ৰাত তেওঁৰ বাবে কিছু উদ্বোধনী অনুষ্ঠানৰ কথা আছে।এই দিনটোত তেওঁৰ বেছিভাগ সময় নিৰ্ধাৰিত সভা আৰু বিশ্ৰামৰ বাবে সংৰক্ষিত।

২৯ এপ্ৰিলত ৰাষ্ট্ৰপতিগৰাকীয়ে ৰোহটাঙৰ অটল সুৰংগ পৰিদৰ্শন কৰিব। ছিছুত উপস্থিত হৈ সুৰংগটোৰ নৰ্থ পৰ্টেল পৰিদৰ্শন কৰিব, য’ত সীমান্ত পথ সংস্থাৰ বিষয়াসকলে সুৰংগটোৰ বিভিন্ন দিশৰ বিষয়ে অৱগত কৰিব। ইয়াৰ পিছত তেওঁ দক্ষিণ পৰ্টেল ভ্ৰমণ কৰিব আৰু উপস্থাপন আৰু ফটো অধিবেশনত অংশগ্ৰহণ কৰিব। পৰিদৰ্শন কৰাৰ পিছত সেইদিনা তেওঁ পুনৰ মাছোব্ৰালৈ উভতি আহিব।

অহা ৩০ এপ্ৰিলত পালামপুৰত হিমাচল প্ৰদেশ কৃষি বিশ্ববিদ্যালয়ৰ ১৭ সংখ্যক সমাৱৰ্তন অনুষ্ঠানত মুখ্য অতিথি হিচাপে অংশগ্ৰহণ কৰি ছাত্ৰ-ছাত্ৰীক সম্বোধন কৰিব ৰাষ্ট্ৰপতিগৰাকীয়ে। সেইদিনা শিমলালৈ উভতি অহাৰ পিছত শিমলাস্থিত আৰ্মি ট্ৰেইনিং কমাণ্ডলৈও উপস্থিত হ’ব আৰু বিষয়াসকলৰ সৈতে নিৰ্ধাৰিত কাৰ্যসূচীত অংশগ্ৰহণ কৰিব।

১ মে’ত ৰাষ্ট্ৰপতিৰ বাসগৃহ মাছোব্ৰাত ‘এট হোম’ কাৰ্যসূচী অনুষ্ঠিত হ’ব, য’ত তেওঁ বিভিন্ন ক্ষেত্ৰৰ পৰা আমন্ত্ৰিত অতিথিসকলক সাক্ষাৎ কৰিব। এই দিৱসৰ বাবে আন আন অনুষ্ঠানৰো আয়োজন কৰা হৈছে।

২ মে’ত ৰাষ্ট্ৰপতি মাছোব্ৰাৰ পৰা চণ্ডীগড়লৈ ৰাওনা হ’ব আৰু বিশেষ বিমানেৰে দিল্লীলৈ উভতি যাব।

উল্লেখযোগ্য যে ২০২৫ চনৰ মে’ মাহতো ৰাষ্ট্ৰপতিৰ শিমলা ভ্ৰমণৰ কথা আছিল যদিও ভাৰত আৰু পাকিস্তানৰ মাজত ক্ৰমাৎ উত্তেজনা বৃদ্ধি পোৱাৰ বাবে স্থগিত ৰখা হৈছিল। ইয়াৰ পূৰ্বে ২০২৪ চনৰ মে’ আৰু ২০২৩ চনৰ এপ্ৰিল মাহত ৰাষ্ট্ৰপতি দ্ৰৌপদী মুৰ্মুৱে হিমাচল প্ৰদেশ ভ্ৰমণ কৰিছিল।

ৰাষ্ট্ৰপতিৰ প্ৰস্তাৱিত ছয়দিনীয়া ভ্ৰমণৰ বাবে সমগ্ৰ ৰাজ্যৰ শিমলা আৰু অন্যান্য কাৰ্যসূচীৰ স্থানসমূহত প্ৰশাসনিক প্ৰস্তুতি আৰম্ভ হৈছে।

हिन्दुस्थान समाचार / অৰৱিন্দ