শ্ৰীনগৰ, ১৪ এপ্ৰিল (হি.স.)। জম্মু–কাশ্মীকক শ্ৰীনগৰ-লেহ ঘাইপথৰ কৌশলগতভাৱে গুৰুত্বপূৰ্ণ জোজিলা সুৰংগটোৱে এক উল্লেখযোগ্য মাইলৰ খুঁটিৰ কাষ চাপিছে। মে’ মাহৰ শেষৰ ফালে খনন কাম সম্পূৰ্ণ হোৱাৰ সম্ভাৱনা আছে । সম্পূৰ্ণ হ’লে ১৩ কিলোমিটাৰতকৈও অধিক দৈৰ্ঘ্যৰ এই সুৰংগটোৱে কাশ্মীৰ আৰু লাডাখৰ মাজত সৰ্ববতৰৰ সংযোগ প্ৰদান কৰিব, যাৰ ফলত বিপজ্জনক জোজিলা পাছটো বছৰজুৰি সুলভ হৈ পৰিব।
মেঘা ইঞ্জিনিয়াৰিং এণ্ড ইনফ্ৰাষ্ট্ৰাকচাৰ লিমিটেডৰ যুটীয়া মুখ্য পৰিচালন বিষয়া হৰপাল সিঙে কয় যে জোজিলা সুৰংগৰ মুঠ দৈৰ্ঘ্য ১৩,১৫৫ মিটাৰৰ ভিতৰত মাত্ৰ প্ৰায় ৩০০ মিটাৰ খনন বাকী আছে, যাৰ ফলত প্ৰকল্পটো এক উল্লেখযোগ্য মাইলৰ খুঁটিৰ ওচৰ চাপিছে। মে’ মাহৰ শেষৰ ফালে বা জুন মাহৰ প্ৰথম সপ্তাহৰ ভিতৰত সম্পূৰ্ণ হোৱাৰ আশা কৰিছো বুলিও তেওঁ কয়। তেওঁ লগতে কয় যে এই উল্লেখযোগ্য কৃতিত্ব প্ৰতীকীভাৱে চিহ্নিত হ’ব যেতিয়া কাশ্মীৰৰ বাল্টাল আৰু দ্ৰাছ অঞ্চলৰ মিনামাৰ্গৰ দুয়োটা মূৰৰ পৰা কাম কৰা দলসমূহে সুৰংগটোৰ ভিতৰত লগ হ’ব। সিঙে কয় যে এই কৃতিত্বৰ পিছত বাল্টাল আৰু মিনামাৰ্গ দুয়োটা পক্ষৰ লোকে সুৰংগটোৰ ভিতৰত হাত মিলাই দিব। এয়া এক ঐতিহাসিক মুহূৰ্ত হ’ব আৰু ভৱিষ্যতৰ কাম-কাজ সহজ কৰি তুলিব।
বিশ্বৰ অন্যতম প্ৰত্যাহ্বানমূলক ভূখণ্ডত নিৰ্মিত এই সুৰংগটো ভাৰতৰ আটাইতকৈ দীঘল পথ সুৰংগ আৰু এছিয়াৰ আটাইতকৈ দীঘল দ্বিমুখী সুৰংগ হিচাপে পৰিগণিত হ’ব। ইয়াৰ ফলত সোণামাৰ্গ আৰু দ্ৰাছৰ মাজত যাত্ৰাৰ সময় প্ৰায় তিনি ঘণ্টাৰ পৰা প্ৰায় ১৫ মিনিটলৈ হ্ৰাস পাব বুলি আশা কৰা হৈছে। বিষয়াসকলে জনোৱা মতে, ২০২৬ চনৰ মাজভাগলৈকে সফল খনন হোৱাৰ সম্ভাৱনা আছে যদিও প্ৰকল্পটো সম্পূৰ্ণ কৰাৰ লক্ষ্য ২০২৮ চনৰ ফেব্ৰুৱাৰী মাহতহে আছে।
জোজিলা সুৰংগৰ কৌশলগত আৰু অৰ্থনৈতিক গুৰুত্ব অপৰিসীম। প্ৰচণ্ড তুষাৰপাতৰ বাবে প্ৰতি বছৰে কেইবামাহো বিচ্ছিন্ন হৈ থকা লাডাখলৈ ই নিৰৱচ্ছিন্ন সংযোগ প্ৰদান কৰিব। উন্নত সংযোগে পৰ্যটন, বাণিজ্য আৰু প্ৰতিৰক্ষা লজিষ্টিককো বৃদ্ধি কৰিব বুলি আশা কৰা হৈছে। বৰ্তমান জোজিলা পথত যাতায়ত বহু পৰিমাণে বতৰৰ ওপৰত নিৰ্ভৰশীল। প্ৰচণ্ড বৰফ আৰু সঘনাই ভূমিস্খলনৰ ফলত প্ৰায়ে শীতকালত পথসমূহ দীৰ্ঘদিন ধৰি বন্ধ হৈ পৰে । যোৱা মাহত জোজিলা পাছত হোৱা হিমস্খলনে কেইবাখনো বাহন বৰফ আৰু ধ্বংসাৱশেষৰ তলত পুতি থোৱাৰ ফলত ৭জন লোকৰ মৃত্যু হোৱাৰ লগতে ৫জন লোক আহত হয় ।
हिन्दुस्थान समाचार / মনোজ কুমাৰ শইকীয়া
