নয়ডা, ১৪ এপ্ৰিল (হি.স.)। মজুৰি বৃদ্ধিৰ দাবীত গৌতম বুদ্ধ নগৰ জিলাত কেইবাদিনো ধৰি চলি থকা শ্ৰমিকৰ প্ৰতিবাদ অধিক হিংসাত্মক হৈ পৰিছে। মঙলবাৰে শ্ৰমিকসকলৰ প্ৰতিবাদৰ ষষ্ঠ দিনত প্ৰৱেশ কৰে আৰু নয়ডাৰ কেইবাটাও অঞ্চলত শিলগুটি নিক্ষেপ কৰাৰ লগতে লণ্ড-ভণ্ড কৰি পৰিৱেশ উত্তাল কৰি তোলে। কেইবাটাও উদ্যোগিক এলেকাত কাৰখানাৰ বাহিৰতো শ্ৰমিকসকলে প্ৰতিবাদ সাব্যস্ত কৰিছে। উত্তেজনাৰ মাজতে বহু উদ্যোগিক ইউনিটত কাম স্তব্ধ হৈ পৰিছে।
উত্তৰ প্ৰদেশ চৰকাৰে সকাহ দিয়াৰ পাছতো শ্ৰমিকৰ প্ৰতিবাদ অবিৰত হৈ আছে। ফলত আজিও নয়ডা আৰু গ্ৰেটাৰ নয়ডাৰ ৮০ শতাংশ কোম্পানী বন্ধ হৈ আছে। শ্ৰমিকৰ প্ৰতিবাদৰ বাবেই উদ্যোগপতিসকলে নিজৰ কাৰখানা খুলিবলৈ দ্বিধাবোধ কৰিছে। আজি কেইবাটাও স্থানত হিংসাত্মক ৰূপ ধাৰণ কৰে শ্ৰমিক। শ্ৰমিকসকলে শিলগুটি নিক্ষেপ কৰি ছেক্টৰ ৭০ৰ ক্লিঅ’ কাউন্টি ছ’চাইটিত ক্ষতিসাধ কৰে। আৰক্ষীকো লক্ষ্য কৰি লয়। পৰিস্থিতি নিয়ন্ত্ৰণ কৰিবলৈ সক্ষম হয় আৰক্ষী। ছেক্টৰ ৭০ৰ উপৰিও ছেক্টৰ ৮০ৰ শ্ৰমিকসকলো আজি পুৱা অত্যন্ত আন্দোলনশীল হৈ পৰে। ছেক্টৰ ৮০ৰ কেইবাটাও কাৰখানাৰ বাহিৰত সমবেত হৈ প্ৰতিবাদকাৰীসকলে আইনখন নিজৰ হাতত লোৱাৰ চেষ্টা চলায়। অৱশ্যে ইতিমধ্যে সজাগ হৈ থকা আৰক্ষীয়ে পৰিস্থিতি তীব্ৰতৰ হোৱাত বাধা দিয়ে। ছেক্টৰ ৭০ত শিলগুটি নিক্ষেপ কৰা ১৫ জনতকৈ অধিক লোকক আৰক্ষীয়ে আটক কৰে।
আৰক্ষী, আইন-শৃংখলাৰ অতিৰিক্ত আয়ুক্ত ৰাজীৱ নাৰায়ণ মিশ্ৰই উল্লেখ কৰে যে আজি পুৱাৰে পৰা বিভিন্ন ঔদ্যোগিক এলেকাত গধুৰ আৰক্ষীৰ উপস্থিতি মোতায়েন কৰা হৈছে। তেওঁ উল্লেখ কৰে যে বিচ্ছিন্ন কাণ্ডৰ বাহিৰে শান্তি বিৰাজ কৰিছে। তেওঁ শ্ৰমিকসকলক আহ্বান জনায় যে উত্তৰ প্ৰদেশ চৰকাৰে তেওঁলোকৰ মজুৰি বৃদ্ধি আৰু অন্যান্য দাবী মানি লৈছে, আৰু সকলোৱে শান্তিপূৰ্ণভাৱে কামলৈ ঘূৰি আহিব লাগে। অতিৰিক্ত আৰক্ষী আয়ুক্তগৰাকীয়ে উল্লেখ কৰে যে অশান্তি সৃষ্টিকাৰীসকলৰ বিৰুদ্ধে কঠোৰ ব্যৱস্থা গ্ৰহণ কৰা হৈছে। সোমবাৰ আৰু আজিৰ প্ৰতিবাদত জড়িতসকলক চিনাক্ত কৰি ভিডিঅ’ ক্লিপৰ ভিত্তিত গ্ৰেপ্তাৰ কৰা হৈছে। এই পৰ্যন্ত আৰক্ষীয়ে ৩০০ৰো অধিক অশান্তি সৃষ্টিকাৰীক গ্ৰেপ্তাৰ কৰাৰ লগতে মুঠ ৭টা এফআইআৰ দাখিল কৰিছে। দুই প্ৰাক্তন অভিযুক্ত হেণ্ডেলৰ বিৰুদ্ধেও বিভ্ৰান্তিকৰ খবৰ বিয়পোৱাৰ অভিযোগ উত্থাপন হৈছে। পৰিস্থিতিৰ সংবেদনশীলতাৰ প্ৰতি লক্ষ্য ৰাখি আৰক্ষীয়ে নিৰাপত্তা বৃদ্ধি কৰিছে।
জিলা প্ৰশাসনৰ তথ্য অনুসৰি সোমবাৰৰ হিংসাত্মক প্ৰতিবাদৰ ২৪ ঘন্টাৰ ভিতৰতে চৰকাৰে ১ এপ্ৰিলৰ পৰা কাৰ্যকৰী হোৱাকৈ সকলো শ্ৰেণীৰ শ্ৰমিকৰ নূন্যতম মজুৰি বৃদ্ধি কৰে। যোৱা নিশা সন্ধিয়া উত্তৰ প্ৰদেশৰ মুখ্যমন্ত্ৰীয়ে এই সিদ্ধান্তত অনুমোদন জনায়। তেওঁ লগতে কয় যে গৌতম বুদ্ধ নগৰ আৰু গাজিয়াবাদৰ অদক্ষ শ্ৰমিকসকলে এতিয়া প্ৰতিমাহে ১১,৩১৩ টকাৰ পৰিৱৰ্তে ১৩,৬৯০ টকাৰ নূন্যতম মজুৰি লাভ কৰিব, আনহাতে অৰ্ধদক্ষ শ্ৰমিকসকলে নূন্যতম মজুৰি ১৫,০৫৯₹ আৰু দক্ষ শ্ৰমিকসকলে ১৬,৮৬৮ ₹ লাভ কৰিব। অন্যান্য পৌৰ নিগম এলেকাত সংশোধিত মাহিলী মজুৰি অদক্ষ শ্ৰমিকৰ বাবে ১৩,০৬ ₹, অৰ্ধদক্ষ শ্ৰমিকৰ বাবে ১৪,৩০৬ ₹, আৰু দক্ষ শ্ৰমিকৰ বাবে ১৬,০২৫ ₹। বাকী জিলাকেইখনত অদক্ষ শ্রমিকসকলে প্রতিমাহে ১২,৩৫৬ টকা, অর্ধদক্ষ শ্রমিকসকলে প্রতিমাহে ১৩,৫৯১ টকা, আৰু দক্ষ শ্রমিকসকলে প্রতিমাহে ১৫,২২৪ টকা লাভ কৰিব ৷
हिन्दुस्थान समाचार / মনোজ কুমাৰ শইকীয়া
