কাঠমাণ্ডূ, ১৪ এপ্ৰিল (হি.স.)। নেপালত উত্থাপিত হোৱা নতুন ৰাজনৈতিক নেতৃত্ব আৰু ক্ষমতাৰ গতিশীলতাৰ ওপৰত আমেৰিকাৰ কংগ্ৰেছৰ গৱেষণা শাখা কংগ্ৰেছ ৰিচাৰ্চ চাৰ্ভিচে এক প্ৰতিবেদন প্ৰকাশ কৰি পুৰণি আৰু প্ৰতিষ্ঠিত ক্ষমতাক একাষৰীয়া কৰি প্ৰকাশ কৰিছে । এই প্ৰতিবেদনত চীনৰ বেল্ট এণ্ড ৰোড ইনিচিয়েটিভৰ পৰা আৰম্ভ কৰি নেপালত বসবাস কৰা তিব্বতী শৰণাৰ্থীলৈকে বিভিন্ন বিষয় সামৰি লোৱা হৈছে।

৩১ মাৰ্চত প্ৰকাশিত নেপালৰ সংসদীয় নিৰ্বাচন শীৰ্ষক প্ৰতিবেদনত কাঠমাণ্ডুৰ প্ৰাক্তন নিৰ্দলীয় মেয়ৰ বালেন্দ্ৰ শ্বাহ আৰু ৰাষ্ট্ৰীয় স্বতন্ত্ৰ পাৰ্টিৰ মিত্ৰতাক গভীৰ মতাদৰ্শগত ঐক্যতকৈ মেৰেজ অৱ কনভিনিয়েন্স বুলি অভিহিত কৰা হৈছে । আমেৰিকাৰ প্ৰতিবেদনত নেপালৰ শেহতীয়া আভ্যন্তৰীণ ৰাজনৈতিক পৰিৱৰ্তন, গেঞ্জী বিদ্ৰোহ, ভূ-ৰাজনৈতিক প্ৰত্যাহ্বান আৰু তাৰ ফলত সৃষ্টি হোৱা নতুন ক্ষমতাৰ গতিশীলতাৰ বিষয়ে আলোচনা কৰা হৈছে। প্ৰতিবেদনত শ্বাহৰ মেয়ৰৰ কাৰ্যকালক মিশ্ৰিত কাৰ্যকাল বুলি অভিহিত কৰি নীতিগত স্পষ্টতাৰ অভাৱৰ কথাও আঙুলিয়াই দিয়া হৈছে।

যদিও মিত্ৰজোঁটে সফলতাৰে চৰকাৰ গঠন কৰিছে, তথাপিও প্ৰতিবেদনত ইয়াৰ ভৱিষ্যতক লৈও উদ্বেগ প্ৰকাশ কৰা হৈছে । ইয়াত উল্লেখ কৰা হৈছে যে বলেন্দ্ৰ শ্বাহ আৰু আৰ এছ পিৰ নেতৃত্বৰ মাজত সম্ভাৱ্য উত্তেজনাই ভৱিষ্যতে নতুন চৰকাৰখনৰ বাবে এক বৃহৎ প্ৰত্যাহ্বানৰ সৃষ্টি কৰিব পাৰে।

প্ৰতিবেদনত উল্লেখ কৰা হৈছে যে পৰম্পৰাগত সংবাদ মাধ্যমতকৈ ছ’চিয়েল মিডিয়াৰ জৰিয়তে বেলেন্দ্ৰ শ্বাহে নিজৰ মতামত সঘনাই শ্বেয়াৰ কৰে। ইয়াৰ উপৰিও ২০২৫ চনৰ ছেপ্টেম্বৰ মাহৰ হিংসাত্মক ঘটনাৰ জবাবদিহিতা নিশ্চিত কৰাৰ লগতে দুৰ্নীতিৰ বিৰুদ্ধে কঠোৰ ব্যৱস্থা গ্ৰহণৰ ক্ষেত্ৰত শ্বাহৰ ভূমিকাই চৰকাৰৰ প্ৰতি জনমত প্ৰভাৱিত কৰিব পাৰে বুলিও উল্লেখ কৰা হৈছে। প্ৰতিবেদনত লগতে কোৱা হৈছে যে নেপালৰ নতুন চৰকাৰখনে অৰ্থনৈতিক আৰু ভূ-ৰাজনৈতিক প্ৰত্যাহ্বানৰ সন্মুখীন হ’ব যেনে উচ্চ যুৱ নিবনুৱা সমস্যা, উপসাগৰীয় দেশৰ পৰা উভতি অহা প্ৰব্ৰজিত শ্ৰমিক, ইৰাণ যুদ্ধৰ বাবে ৰেমিটেন্সৰ সম্ভাৱ্য হ্ৰাস, শক্তি সংকট।

নতুন চৰকাৰৰ ১০০ দফীয়া সংস্কাৰ পৰিকল্পনাৰ কথা উল্লেখ কৰি প্ৰতিবেদনত উল্লেখ কৰা হৈছে যে এতিয়া চৰকাৰখনক দুৰ্নীতি মোকাবিলা কৰা আৰু ছেপ্টেম্বৰ আন্দোলনৰ হিংসাত্মক পৰিস্থিতিৰ বাবে জবাবদিহি কৰা আদি বিষয়ত পৰীক্ষা কৰা হ’ব। বৈদেশিক নীতিৰ সন্দৰ্ভত প্ৰতিবেদনত উল্লেখ কৰা হৈছে যে শ্বাহৰ পন্থা “প্ৰাগমেটিক আৰু ৰাষ্ট্ৰীয় স্বাৰ্থকেন্দ্ৰিক” হ’ব পাৰে। চীনৰ বেল্ট এণ্ড ৰোড ইনিচিয়েটিভ (বি আৰ আই) প্ৰকল্পত ইয়াৰ প্ৰভাৱ এতিয়াও স্পষ্ট হোৱা নাই যদিও নতুন চৰকাৰে “সুষম আৰু স্বাধীন” উন্নয়ন কূটনীতিৰ আহ্বান জনাইছে।

প্ৰতিবেদনত উল্লেখ কৰা হৈছে যে নেপালে নিজৰ দুখন প্ৰধান প্ৰতিবেশী দেশ ভাৰত আৰু চীনৰ লগতে আমেৰিকাৰ সৈতেও সুষম সম্পৰ্ক বজাই ৰাখিছে। একাংশ বিশ্লেষকে শ্বাহৰ বৈদেশিক নীতি প্ৰাগমেটিক হ’ব বুলি বিশ্বাস কৰাৰ বিপৰীতে আন কিছুমানৰ মতে এই কথা এতিয়াও স্পষ্ট হোৱা নাই। প্ৰতিবেদনত আমেৰিকাৰ দুটা ডাঙৰ চিন্তাৰ কথাও উল্লেখ কৰা হৈছে । প্ৰথমতে ড’নাল্ড ট্ৰাম্প প্ৰশাসনে ২০২৫ চনৰ ভিতৰত নেপাল আৰু এমচিচি প্ৰকল্পলৈ ৩২৯ মিলিয়ন ডলাৰৰ সাহায্য বন্ধ কৰি দিছিল । কিন্তু ২০২৫ চনৰ ফেব্ৰুৱাৰী মাহত আমেৰিকাৰ বিদেশ মন্ত্ৰী মাৰ্কো ৰুবিঅ’ই এমচিচি অব্যাহত ৰাখিছিল, আৰু নৱেম্বৰ মাহত অতিৰিক্ত ৫ কোটি ডলাৰৰ সাহায্য প্ৰদান কৰিছিল।

দ্বিতীয়তে, আমেৰিকাই তিব্বতী শৰণাৰ্থীসকলক আৰ্থিক সাহায্য আগবঢ়াইছে (আগন্তুক বছৰৰ বাবে ১৩ মিলিয়ন ডলাৰ), আনহাতে চীনে নেপালত বাস কৰা তিব্বতীসকলৰ মত প্ৰকাশ আৰু সমাৱেশৰ স্বাধীনতাক বাধা দিবলৈ নেপাল চৰকাৰক হেঁচা প্ৰয়োগ কৰাৰ অভিযোগ উত্থাপন হৈছে ।

हिन्दुस्थान समाचार / মনোজ কুমাৰ শইকীয়া