ৱাশ্বিংটন, ১৪ এপ্ৰিল (হি.স.)। আমেৰিকাৰ নৌসেনাই হৰমুজ জলদ্বীপকে ধৰি ইৰাণৰ সকলো বন্দৰ অৱৰোধ কৰাৰ ফলত ফল পোৱা গৈছে। আমেৰিকা আৰু ইৰাণৰ মাজত চলি থকা যুদ্ধবিৰতি সন্দৰ্ভত ইছলামাবাদত শান্তি আলোচনা ব্যৰ্থ হোৱাৰ পিছতে ৰাষ্ট্ৰপতি ড’নাল্ড ট্ৰাম্পে কঠোৰ সিদ্ধান্ত গ্ৰহণ কৰে। তেওঁ ইৰাণৰ সকলো বন্দৰ অৱৰোধ কৰাৰ কথা ঘোষণা কৰি অঞ্চলটোৰ কাষ চাপি অহা যিকোনো ইৰাণৰ জাহাজ ডুবাই দিয়াৰ ভাবুকি দিয়ে। আমেৰিকাৰ বিষয়াসকলৰ মতে, এতিয়া জেদী ইৰাণে নিজৰ স্থিতি নৰম কৰিছে, যিটোত ট্ৰাম্প সন্তুষ্ট। এতিয়া কাইলৈ (বৃহস্পতিবাৰ) দুয়োখন দেশৰ প্ৰতিনিধি দলৰ মাজত আলোচনা হ’ব পাৰে।

আল জাজিৰা আৰু ফক্স নিউজৰ পৰা পোৱা বাতৰি অনুসৰি ট্ৰাম্পে উল্লেখ কৰিছে যে ইৰাণে আলোচনাৰ বাবে আগ্ৰহ প্ৰকাশ কৰিছে। উপ-ৰাষ্ট্ৰপতি জে ডি ভেন্সেও কয় যে বলটো ইৰাণৰ ক’ৰ্টত আছে। এতিয়া নিশ্চিতভাৱে এক বৃহৎ চুক্তি সম্ভৱ হৈছে। ইছলামাবাদত আমেৰিকাই ইৰাণক ইউৰেনিয়াম সমৃদ্ধিৰ ক্ষেত্ৰত ২০ বছৰৰ বাবে স্থগিত ৰখাৰ প্ৰস্তাৱ আগবঢ়ায়। সোমবাৰে ইৰাণে ইয়াৰ উত্তৰত আন এটা প্ৰস্তাৱ দি কয় যে ইৰানে ২০ বছৰৰ বাবে নহয়, পাঁচ বছৰৰ প্ৰস্তাৱ গ্ৰহণ কৰিবলৈ ইচ্ছুক।

যদিহে আমেৰিকাৰ অৱৰোধ অব্যাহত থাকে তেন্তে পৰিস্থিতি আৰু শোচনীয় হ’ব পাৰে। সেয়েহে মধ্যস্থতাকাৰী দেশসমূহে নিজৰ প্ৰচেষ্টা নবীকৰণ কৰিছে। মধ্যস্থতাকাৰী দেশসমূহৰ এখনৰ এজন কূটনীতিবিদে কয় যে যুদ্ধবিৰতিৰ সময়ত দুয়োখন দেশৰ মাজত বৃহস্পতিবাৰৰ পৰা পুনৰ আলোচনা আৰম্ভ হ’ব পাৰে। বিষয়টোৰ সৈতে পৰিচিত বিষয়াসকলে কয় যে ২১ এপ্ৰিলত যুদ্ধবিৰতিৰ ম্যাদ উকলি যোৱাৰ পূৰ্বে আপোচত উপনীত হোৱাটোৱেই লক্ষ্য। কূটনীতিবিদগৰাকীয়ে কয় যে তেহৰাণ আৰু ৱাশ্বিংটনে নীতিগতভাৱে আলোচনাত মিলিত হৈছে। অৱশ্যে একে স্তৰৰ প্ৰতিনিধি দলে অংশগ্ৰহণ কৰিব নে নাই সেয়া স্পষ্ট নহয়। বিষয়াসকলে কয় যে পাকিস্তানক পুনৰ সম্ভাৱ্য আয়োজক হিচাপে বিবেচনা কৰা হৈছে, আনহাতে জেনেভাৰ নামতো চৰ্চা চলি আছে।

উপ-ৰাষ্ট্ৰপতি ভেন্সে সোমবাৰে কয় যে ইৰাণৰ সৈতে ইছলামাবাদত আলোচনা শেষ হোৱাৰ পিছৰে পৰা বল ইৰাণৰ ক’ৰ্টত আছে। তেহৰানে এতিয়া পৰৱৰ্তী পদক্ষেপ ল’বলগীয়া আছে। ইৰাণৰ আলোচনাপন্থীসকলৰ চুক্তি চূড়ান্ত কৰাৰ কৰ্তৃত্বৰ অভাৱৰ বাবেই আমেৰিকাৰ প্ৰতিনিধি দলটোৱে আলোচনাৰ পৰা আঁতৰি আহিছিল বুলিও তেওঁ কয়। এতিয়া যিকোনো অগ্ৰগতি নিৰ্ভৰ কৰিব তেহৰাণৰ নেতৃত্বৰ অনুমোদনৰ ওপৰত।

ইৰাণৰ সৈতে স্বাভাৱিক সম্পৰ্ক বজাই ৰাখিবলৈ ৰাষ্ট্ৰপতি ড’নাল্ড ট্ৰাম্প সাজু বুলিও ভ্যান্সে গুৰুত্ব আৰোপ কৰে। তেওঁ কয় যে আমেৰিকাৰ ৰাষ্ট্ৰপতিয়ে কৈছে যে ইৰাণক যদি স্বাভাৱিক দেশৰ দৰে ব্যৱহাৰ কৰা হয়, যদিহে ইয়াৰ অৰ্থনীতি স্বাভাৱিক হয় আৰু ইয়াৰ জনসাধাৰণ সুখী আৰু সমৃদ্ধিশালী হ’ব পাৰে তেন্তে তেওঁ অতি সুখী হ’ব। ট্ৰাম্পে লগতে কয় যে, “এখন স্বাভাৱিক দেশ হ’বলৈ হ’লে ইৰাণে পাৰমাণৱিক অস্ত্ৰ নিৰ্মাণৰ সপোন পৰিত্যাগ কৰিব লাগিব।”

ইফালে মঙলবাৰে ৱাশ্বিংটনত ব্ৰিটিছ উপ-প্ৰধানমন্ত্ৰী ডেভিদ লেমীয়ে উপ-ৰাষ্ট্ৰপতি জে ডি ভেন্সৰ সৈতে সাক্ষাৎ কৰে। বৈঠকত তেওঁ ইৰাণত যুদ্ধবিৰতি বজাই ৰখাৰ গুৰুত্বৰ ওপৰত গুৰুত্ব আৰোপ কৰে।

ৰাছিয়াইও এই বিষয়ত আগ্ৰহ প্ৰকাশ কৰিছে। সোমবাৰে ক্ৰেমলিনে কয় যে আমেৰিকাৰ সৈতে হোৱা সম্ভাৱ্য চুক্তিৰ অংশ হিচাপে ইৰাণৰ সমৃদ্ধ ইউৰেনিয়াম গ্ৰহণ কৰাৰ ৰাছিয়াই প্ৰস্তাৱ এতিয়াও মুকলি হৈ আছে। ক্ৰেমলিনৰ মুখপাত্ৰ দিমিট্ৰি পেস্কোভে কয় যে, এই প্ৰস্তাৱ ৰাষ্ট্ৰপতি পুটিনে আমেৰিকা আৰু আঞ্চলিক দুয়োখন দেশৰ সৈতে আলোচনাত আগবঢ়াইছে। এই প্ৰস্তাৱ মুকলি হৈ আছে, কিন্তু ইয়াৰ ওপৰত এতিয়ালৈকে কোনো ব্যৱস্থা গ্ৰহণ কৰা হোৱা নাই।

মঙলবাৰে ৱাশ্বিংটনত আমেৰিকাৰ বিদেশ মন্ত্ৰী মাৰ্কো ৰুবিঅ’ আৰু লেবাননত থকা আমেৰিকাৰ ৰাষ্ট্ৰদূত গৰাকীয়ে ইজৰাইল আৰু লেবাননৰ ৰাষ্ট্ৰদূতৰ সৈতে বৈঠকত মিলিত হোৱাৰ কথাও প্ৰকাশ পাইছে । সোমবাৰে এই কথা ঘোষণা কৰে বিদেশ বিভাগৰ এজন বিষয়াই। ১৯৯৩ চনৰ পিছত ইজৰাইল আৰু লেবাননৰ মাজত এনে প্ৰথমখন বৈঠক হ’ব বুলিও কয় বিষয়াগৰাকীয়ে। যোৱা কেইসপ্তাহমানৰ পৰা অঞ্চলটোত উত্তেজনা বৃদ্ধি পাইছে। ২৮ ফেব্ৰুৱাৰীত ইৰাণৰ ওপৰত আমেৰিকা-ইজৰাইলৰ আক্ৰমণৰ পিছত ইৰাণৰ সমৰ্থনত ইজৰাইলৰ ওপৰত হিজবুল্লাই ক্ষেপণাস্ত্ৰ আক্ৰমণ চলায়। এই আলোচনাত ষ্টেট ডিপাৰ্টমেণ্টৰ পৰামৰ্শদাতা মাইকেল নিধামে অংশগ্ৰহণ কৰিব বুলিও বিষয়াগৰাকীয়ে নিশ্চিত কৰিছে।

हिन्दुस्थान समाचार / মনোজ কুমাৰ শইকীয়া