আক্ৰা (ঘানা), ১৪ এপ্ৰিল (হি.স.)। ফিফা বিশ্বকাপ ২০২৬ৰ পূৰ্বে ঘানাই এক উল্লেখযোগ্য সিদ্ধান্ত লৈ অভিজ্ঞ পৰ্তুগীজ মেনেজাৰ কাৰ্লোছ কুইৰ’জক নিজৰ ৰাষ্ট্ৰীয় ফুটবল দলৰ মুখ্য প্ৰশিক্ষক হিচাপে নিযুক্তি দিছে।
সোমবাৰে ঘানা ফুটবল এছ’চিয়েশ্যনে এই আনুষ্ঠানিক ঘোষণা কৰে।
৭৩ বছৰীয়া কুইৰ’জে একেৰাহে পঞ্চমবাৰৰ বাবে বিশ্বকাপত অংশগ্ৰহণ কৰিব, যিটো নিজৰ বাবেই এক উল্লেখযোগ্য কৃতিত্ব। যোৱা মাহত তেওঁ ওমানৰ প্ৰশিক্ষকৰ পদৰ পৰা পদত্যাগ কৰিছিল, কাৰণ দলটোৱে ২০২৬ চনৰ বিশ্বকাপৰ বাবে যোগ্যতা অৰ্জন কৰিব নোৱাৰিলে।
বিশ্বকাপ আৰম্ভ হোৱাৰ মাত্ৰ ৭২ দিন পূৰ্বে ঘানা প্ৰশিক্ষক নোহোৱাকৈয়ে ৰৈ গৈছিল। কিয়নো মাৰ্চ মাহত অষ্ট্ৰিয়া আৰু জাৰ্মানীৰ বিৰুদ্ধে প্ৰীতি মেচত পৰাজয়ৰ পিছত অট্টো আডোৰ সৈতে বিচ্ছেদ ঘটিছিল।
জিএফএই এক বিবৃতিত কয় যে, “কাৰ্যবাহী পৰিষদে সকলো মূল অংশীদাৰৰ সৈতে আলোচনা কৰি কাৰ্লোছ কুইৰ’জক জ্যেষ্ঠ ৰাষ্ট্ৰীয় দল ব্লেক ষ্টাৰছৰ মুখ্য প্ৰশিক্ষক হিচাপে নিযুক্তি দিছে।”
কুইৰ’জৰ প্ৰশিক্ষক কেৰিয়াৰ বিশিষ্ট। ২০১০ চনৰ বিশ্বকাপত তেওঁ পৰ্তুগালক প্ৰি-কোৱাৰ্টাৰ ফাইনেল (১৬ ৰাউণ্ড)লৈ লৈ যায়। ইয়াৰ পিছত তেওঁ একেৰাহে তিনিখন বিশ্বকাপত ইৰাণৰ প্ৰশিক্ষকতা কৰিছিল, য’ত দলটোৱে ১৩খন মেচত তিনিটা জয়ৰ অভিলেখ গঢ়িছিল।
মোজাম্বিকত জন্মগ্ৰহণ কৰা কুইৰোজ এজন প্ৰাক্তন গ’লৰক্ষকো। তেওঁ নিজৰ কেৰিয়াৰত ইজিপ্ত, জাপান, কলম্বিয়া, দক্ষিণ আফ্ৰিকাৰ দৰে দলৰ প্ৰশিক্ষকতা কৰিছিল, লগতে ১৯৯০ চনৰ আৰম্ভণিতে পৰ্তুগালক নেতৃত্ব দিছিল।
২০২৬ চনৰ ফিফা বিশ্বকাপৰ বাবে ঘানাক গ্ৰুপ এলত স্থান দিয়া হৈছে, য’ত ক্ৰ’ৱেচিয়া, ইংলেণ্ড, পানামাৰ দৰে শক্তিশালী দলৰ বিৰুদ্ধে খেলিব।
এতিয়া কুইৰ’জৰ অভিজ্ঞতাৰ বাবে ঘানা দলটোৱে উন্নত প্ৰদৰ্শনৰ আশা কৰিছে।
हिन्दुस्थान समाचार / মনোজ কুমাৰ শইকীয়া
