ইম্ফল, ১৪ এপ্ৰিল (হি.স.)। মণিপুৰ আৰক্ষীয়ে অসম আৰক্ষীৰ সহযোগত চলোৱা একাধিক সমন্বিত অভিযানত এজন সন্দেহজনক উগ্ৰপন্থীক গ্ৰেপ্তাৰ কৰা হৈছে। একে সময়তে বিগত ২৪ ঘণ্টাত বিভিন্ন জিলাত পৃথক পৃথক অভিযানত কেইবাটাও বাংকাৰ ধ্বংস কৰাৰ লগতে অস্ত্ৰ-গোলাবাৰুদ উদ্ধাৰ কৰা হৈছে।
গ্ৰেপ্তাৰ হোৱা ব্যক্তিজনক হোডাম ৰোমেন সিং ওৰফে নাওবি (৩৯) বুলি চিনাক্ত কৰা হৈছে। তেওঁ জিৰিবাম জিলাৰ কামৰাঙা অঞ্চলৰ বাসিন্দা। অসমৰ হোজাই জিলাৰ লংকা আৰক্ষী থানাৰ অধীনস্থ ৰূপনগৰ এলেকাৰ পৰা তেওঁক আটক কৰা হয়। আৰক্ষী সূত্রে জনোৱা মতে, অভিযুক্তজন আৰপিএফ/পিএলএৰ সক্ৰিয় সদস্য আৰু জিৰিবাম আৰক্ষী থানাত ৰুজু হোৱা এটা গোচৰৰ সহ-অভিযুক্ত।
ইয়াৰ লগতে উখৰুল জিলাৰ লিটান আৰক্ষী থানাৰ অধীনস্থ মংকট চেপু গাঁও এলেকাত চলোৱা আন এক অভিযানত নিৰাপত্তা বাহিনীয়ে চাৰিটা বাংকাৰ ভাঙি পেলায়। এই অভিযানত ঘটনাস্থলীৰ পৰা ৩৫টা খালী কাৰ্ট্ৰিজো উদ্ধাৰ কৰা হয়।
আনহাতে, কাংপোকপি জিলাৰ চাইকুল আৰক্ষী থানাৰ অধীনস্থ টিংপিবুং আৰু লেপলেন গাঁৱৰ মাজৰ অঞ্চলত চলোৱা অনুসন্ধান অভিযানত বৃহৎ পৰিমাণৰ অস্ত্ৰ-সামগ্ৰী উদ্ধাৰ হয়। উদ্ধাৰ হোৱা সামগ্ৰীৰ ভিতৰত পাঁচটা দেশীয় নিৰ্মিত বল্ট-একশ্যন এক নলীয়া বন্দুক, তিনিটা পাম্পি অস্ত্ৰ, এটা নং ৩৬ হেণ্ড গ্ৰেনেড, ৭.৬২ মিমিৰ দুটা জীৱন্ত গুলী, বিভিন্ন কেলিবাৰৰ ৫০টা খালী কাৰ্ট্ৰিজ আৰু দুটা ৰেডিঅ’ ছেটসহ এটা চাৰ্জাৰ অন্তৰ্ভুক্ত।
নিৰাপত্তা কৰ্তৃপক্ষই জনোৱা মতে, অঞ্চলটোত উগ্ৰপন্থী কাৰ্যকলাপ নিয়ন্ত্ৰণ আৰু স্থিতিশীলতা বজাই ৰাখিবলৈ এই অভিযানসমূহ অধিক তীব্ৰতৰ কৰা হৈছে।
হিন্দুস্থান সমাচাৰ / শ্ৰীপ্ৰকাশ
