নতুন দিল্লী, ১৩ এপ্ৰিল (হি.স.)। উত্তৰ-পূৰ্বাঞ্চলৰ যোগাযোগ আৰু উন্নয়ন মন্ত্ৰী জ্যোতিৰাদিত্য সিন্ধিয়াই মঙলবাৰে প্ৰধানমন্ত্ৰী সংগ্ৰহালয়ত এক ভাৰত, শ্ৰেষ্ঠ ভাৰত: ডাক টিকটৰ জৰিয়তে ভাৰতৰ ঐক্য আৰু গণতন্ত্ৰ উদযাপন নামৰ চাৰিদিনীয়া বিশেষ ডাক টিকট প্ৰদৰ্শনী উদ্বোধন কৰিব।
প্ৰধানমন্ত্ৰী সংগ্ৰহালয় আৰু পুথিভঁৰাল (পিএমএমএল)ৰ তথ্য অনুসৰি যোগাযোগ মন্ত্ৰালয়ৰ ডাক বিভাগৰ সহযোগত এই প্ৰদৰ্শনী আয়োজন কৰা হ’ব। ১৪ এপ্ৰিলৰ দিনৰ ১২ বজাত প্ৰধানমন্ত্ৰী সংগ্ৰহালয়ৰ প্ৰথম ব্লকত অৱস্থিত ‘পৰিচয় গেলেৰী’ত উদ্বোধনী অনুষ্ঠান অনুষ্ঠিত হ’ব। ১৭ এপ্ৰিললৈকে চলিব লগা এই প্ৰদৰ্শনীৰ সময়ত ভাৰতৰ সংবিধানৰ বিষয়বস্তুৰ আধাৰত বিশেষ ‘চিত্ৰ পোষ্টকাৰ্ড’ মুকলি কৰা হ’ব, ড০ বি.আৰ. আম্বেদকাৰ, আৰু 'ভাৰতৰ জনগণ'। সংগ্ৰহালয়টোৱে দেশৰ বিভিন্ন প্ৰান্তৰ ব্যক্তিগত ফিলাটেলিক সংগ্ৰাহকসকলক এই প্ৰদৰ্শনীত নিজৰ সংগ্ৰহসমূহ প্ৰদৰ্শন কৰিবলৈ আমন্ত্ৰণ জনাইছে। ইয়াৰ প্ৰধান উদ্দেশ্য হৈছে ভাৰতৰ উন্নয়ন যাত্ৰা আৰু ইয়াৰ শক্তিশালী গণতান্ত্ৰিক মূল্যবোধসমূহ ডাক টিকটৰ জৰিয়তে প্ৰদৰ্শন কৰা।
এই প্ৰদৰ্শনীত স্বাধীনতাৰ পিছৰে পৰা জাৰি কৰা বিৰল আৰু গুৰুত্বপূৰ্ণ ডাক টিকটৰ জৰিয়তে ভাৰতৰ ঐক্য, গণতন্ত্ৰ, আৰু সাংস্কৃতিক বৈচিত্ৰ্যৰ যাত্ৰা উপস্থাপন কৰা হ’ব। প্ৰধানমন্ত্ৰী আৰু ৰাষ্ট্ৰপতি, ভাৰতীয় সংবিধান, গণতান্ত্ৰিক প্ৰতিষ্ঠান, স্বাধীনতা সংগ্ৰামী, সাংস্কৃতিক বৈচিত্ৰ্য, আৰু সমগ্ৰ দেশৰ ব্যক্তিগত সংগ্ৰাহকৰ পৰা বিৰল ডাকটিকটকে ধৰি মূল বিষয়বস্তু প্ৰদৰ্শন কৰা হ’ব।
এই অনুষ্ঠানৰ সময়ত ডাক বিভাগ আৰু পিএমএমএলৰ মাজত বুজাবুজিৰ চুক্তি স্বাক্ষৰিত হ’ব। ১৭ এপ্ৰিলত প্ৰাক্তন প্ৰধানমন্ত্ৰী চন্দ্ৰশেখৰৰ ৯৯ সংখ্যক জন্ম বাৰ্ষিকীত তেওঁৰ নামত উৎসৰ্গিত এক বিশেষ কভাৰ মুকলি কৰি এই প্ৰদৰ্শনীৰ সামৰণি পৰিব। দৰ্শনাৰ্থী, ফিলাটেলিষ্ট, ছাত্ৰ-ছাত্ৰী, আৰু সাধাৰণ জনতাই ফিলাটেলিৰ কলাৰ জৰিয়তে ইতিহাস, ঐতিহ্য আৰু গণতন্ত্ৰৰ এই অনন্য উদযাপনৰ অভিজ্ঞতা লাভ কৰিব।
हिन्दुस्थान समाचार / মনোজ কুমাৰ শইকীয়া
