বুডাপেষ্ট (হাংগেৰী), ১৩ এপ্ৰিল (হি.স.)। হাংগেৰীত দেওবাৰে অনুষ্ঠিত হৈ যোৱা সংসদীয় নিৰ্বাচনৰ প্ৰায় সকলো ফলাফল ঘোষণা কৰা হৈছে। দেশৰ জনসাধাৰণে ১৬ বছৰে ক্ষমতাত থকা প্ৰধানমন্ত্ৰী ভিক্টৰ অৰবানক পৰাস্ত কৰি বিৰোধী দল টিছজাৰ নেতা পিটাৰ মাগিয়াৰৰ হাতত দায়িত্ব অৰ্পণ কৰিছে। অৰবানৰ পৰাজয়ে আমেৰিকাক ডাঙৰ আঘাত হানিছে। ভোটদানৰ পূৰ্বেই আমেৰিকাৰ উপ-ৰাষ্ট্ৰপতি জে ডি ভেন্সে ভিক্টৰ অৰবানক হাংগেৰীৰ পৰৱৰ্তী প্ৰধানমন্ত্ৰী হিচাপে ঘোষণা কৰিছিল।

দ্য বুডাপেষ্ট টাইমছ আৰু চিএনএনৰ বাতৰি অনুসৰি এই নিৰ্বাচনত টিছজা দলে ১৩৮খন আসন লাভ কৰিছে, যিটো দুই তৃতীয়াংশ সংখ্যাগৰিষ্ঠতাৰ বাবে যথেষ্ট। ইফালে ফিডেছ-কেডিএনপি মিত্ৰজোঁটে ৫৪খন আসন লাভ কৰিছে, আৰু এম হাজনাকে ৭খন আসন লাভ কৰিছে। নিজৰ পৰাজয় স্বীকাৰ কৰি প্ৰধানমন্ত্ৰী ভিক্টৰ অৰবানে বালনা বুডাপেষ্টত সমৰ্থকসকলক সম্বোধন কৰে। তেওঁ এই জনাদেশক আদৰণি জনাই ভোটাৰসকলক ধন্যবাদ জনায়। তেওঁ কয়, এই ফলাফল আমাৰ বাবে দুখজনক। তেওঁ লগতে কয় যে তেওঁ বিৰোধী হৈ থাকি মাতৃভূমি আৰু হাংগেৰী জাতিৰ সেৱা কৰি যাব।

ইফালে, দেওবাৰে সন্ধিয়া বুডাপেষ্টৰ বাথ্যানি চ’কত টিছজা পাৰ্টিৰ নেতা পিটাৰ মাগয়াৰে ব্যাপক জয় লাভৰ ঘোষণা কৰে। সমৰ্থকসকলক তেওঁ কয়, আমি বিপুল সংখ্যাগৰিষ্ঠতাৰে নিৰ্বাচনত জয়ী হৈছো। আমি হাংগেৰীক মুক্ত কৰিছো। তেওঁ কয় যে হাংগেৰীৰ গণতান্ত্ৰিক ইতিহাসত ইয়াৰ আগতে কেতিয়াও ইমান বেছি ভোটদানৰ হাৰ দেখা পোৱা নাছিল। প্ৰায় ৩৩ লাখ ভোটাৰে ভোটদান কৰিছিল।

ইফালে অৰবানে নিজৰ প্ৰতিদ্বন্দ্বী পিটাৰৰ হাতত পৰাজয় স্বীকাৰ কৰিছিল, তেতিয়াই কিছুমানে ক্ষমতাৰ পৰিৱৰ্তন অনুভৱ কৰিছিল । লেখক তথা কবি আন্দ্ৰাছ পেট’চে কয় যে এই অনুভৱে তেওঁক ছোভিয়েট ইউনিয়নৰ পতনৰ সময়ত বুডাপেষ্টত থকাৰ কথা মনত পেলাই দিছিল। তেওঁ কয়, কমিউনিষ্ট শাসন ব্যৱস্থা শেষ হোৱাৰ সময়ত মোৰ বয়স ৩০ বছৰ আছিল। হুবহু একে অনুভৱ—ঠিক একেই।

তেওঁ কয় যে এই নিৰ্বাচনৰ প্ৰথম শিক্ষাটো হ’ল ৰাষ্ট্ৰীয়তাবাদক আন্তঃৰাষ্ট্ৰীয় পৰ্যায়লৈ লৈ যোৱাটো কঠিন। ইউৰোপীয় সংঘ আৰু উদাৰ মতাদৰ্শৰ অনুভূত ভাবুকিৰ পৰা হাংগেৰীক ৰক্ষা কৰাৰ প্ৰতিশ্ৰুতি দি জাতীয় সাৰ্বভৌমত্বৰ ৰক্ষক হিচাপে ইমান দিনে শাসন কৰাৰ পিছতো অৰবানৰ নিৰ্বাচনী প্ৰচাৰ অৱশেষত আমেৰিকা আৰু ৰাছিয়াত ভিত্তি কৰি তেওঁৰ শক্তিশালী আন্তঃৰাষ্ট্ৰীয় সমৰ্থকসকলৰ ওপৰত নিৰ্ভৰ কৰিছিল। এই নিৰ্বাচনত ৰাষ্ট্ৰপতি ড’নাল্ড ট্ৰাম্পে তীব্ৰ আগ্ৰহ প্ৰকাশ কৰিছিল। তেওঁ ভোটাৰসকলক তেওঁৰ সামাজিক মাধ্যম ট্ৰুথৰ দ্বাৰা আবেদন জনাইছিল, তেওঁলোকক কৈছিল, বাহিৰলৈ ওলাই গৈ ভিক্টৰক ভোট দিয়ক। তেওঁ এজন প্ৰকৃত বন্ধু, এজন যোদ্ধা আৰু এজন বিজয়ী।

हिन्दुस्थान समाचार / মনোজ কুমাৰ শইকীয়া