বেইজিং/লণ্ডন, ১৩ এপ্ৰিল (হি.স.)। ইৰাণৰ বন্দৰত সামৰিক অৱৰোধ আৰোপ কৰাৰ ভাবুকি দিয়াৰ পিছতে চীনে সকলো পক্ষকে সংযম কৰিবলৈ আহ্বান জনাইছে। ব্ৰিটেইনে সামৰিক অৱৰোধৰ বিৰোধিতা কৰে আৰু সমৰ্থন নকৰে বুলি উল্লেখ কৰিছে। ট্ৰাম্পৰ এই বক্তব্যই হৰমুজ জলদ্বীপত উত্তেজনাৰ সৃষ্টি কৰিছে।

আল জাজিৰাৰ মতে, চীনৰ বৈদেশিক মন্ত্ৰালয়ৰ মুখপাত্ৰ গুও জিয়াকুনে কয় যে এই গুৰুত্বপূৰ্ণ জলপথটোক সুৰক্ষিত, সুস্থিৰ আৰু বাধাহীন কৰি ৰখাটো আন্তঃৰাষ্ট্ৰীয় সম্প্ৰদায়ৰ সাধাৰণ স্বাৰ্থত। শক্তি সুৰক্ষা আৰু যোগান নিশ্চিত কৰাৰ বাবে সকলো পক্ষৰ সৈতে কাম কৰিবলৈ সাজু হৈছে চীন।

এই বিষয়ত ব্ৰিটিছ প্ৰধানমন্ত্ৰী কেয়াৰ ষ্টাৰমাৰে এক বিবৃতি প্ৰকাশ কৰিছে। তেওঁ কয় যে যিমানেই হেঁচা নহওক কিয়, ব্ৰিটেইনক ইৰাণ যুদ্ধলৈ টানি নিব নোৱাৰি আৰু হৰমুজ জলদ্বীপৰ অৱৰোধক সমৰ্থন নকৰে। তেওঁ কয়, মোৰ মতে এই জলপথটো সম্পূৰ্ণৰূপে মুকলি কৰি ৰখাটো অতি গুৰুত্বপূৰ্ণ। আমি কিছুদিনৰ পৰা ইয়াৰ দিশত কাম কৰি আহিছো।

ট্ৰাম্পৰ এই ভাবুকিৰ পিছত ইৰাণৰ ৰিভল্যুচনেৰী গাৰ্ডছ কৰ্পছে আমেৰিকাৰ যুদ্ধ জাহাজসমূহক এই অঞ্চলৰ পৰা আঁতৰি থাকিবলৈ চূড়ান্ত সতৰ্কবাণী জাৰি কৰিছে। ভাৰতৰ তেল আৰু গেছৰ এক বৃহৎ অংশ এই জলপথৰ মাজেৰে বৈ যায়। ইৰাণে শেহতীয়াকৈ ঘোষণা কৰিছে যে ভাৰত, চীন, ৰাছিয়া, ইৰাক, পাকিস্তানৰ জাহাজ এই পথেৰে পাৰ হ’ব পাৰিব।

উল্লেখযোগ্য যে হৰমুজ জলদ্বীপ হৈছে বিশ্বৰ আটাইতকৈ গুৰুত্বপূৰ্ণ আৰু কৌশলগত তেল পৰিবহণ জলপথ। ই পাৰস্য উপসাগৰক ওমান উপসাগৰ আৰু আৰব সাগৰৰ সৈতে সংযোগ কৰে। আমেৰিকা আৰু ইৰাণৰ মাজত ক্ৰমাৎ বৃদ্ধি পোৱা সামৰিক সংঘৰ্ষ আৰু অৱৰোধৰ ভাবুকিৰ বাবে এই অঞ্চলটো বিশ্বব্যাপী আলোচনাৰ কেন্দ্ৰবিন্দু। এই জলপথটো উত্তৰত ইৰাণ আৰু দক্ষিণে ওমান (মুছাণ্ডাম উপদ্বীপ) আৰু সংযুক্ত আৰব আমিৰশ্বাহীৰ মাজত অৱস্থিত। ইয়াৰ দৈৰ্ঘ্য প্ৰায় ১৬৭ কিলোমিটাৰ।

ইয়াৰ আটাইতকৈ সংকীৰ্ণ স্থানত ইয়াৰ বহল মাত্ৰ ৩৩-৩৯ কিলোমিটাৰ (প্ৰায় ২১ মাইল)। বিশ্বৰ প্ৰায় ২৫ শতাংশ সাগৰীয় তেলৰ ব্যৱসায় আৰু ২০ শতাংশ তৰলীকৃত প্ৰাকৃতিক গেছ (এল এন জি) এই পথৰ মাজেৰে পাৰ হয়। ইৰাণ, ইৰাক, কুৱেইট, কাটাৰ, বাহৰেইন, চৌদি আৰব আদি দেশসমূহে তেল ৰপ্তানিৰ বাবে এই জলপথৰ ওপৰত বহু পৰিমাণে নিৰ্ভৰ কৰে।

हिन्दुस्थान समाचार / মনোজ কুমাৰ শইকীয়া