ইছলামাবাদ, ১২ এপ্ৰিল (হি.স.)। মধ্যপ্ৰাচ্যত শান্তি আনি ইৰাণ আৰু আমেৰিকা আৰু ইজৰাইলৰ যুদ্ধৰ অন্ত পেলোৱাৰ বাবে পাকিস্তানে কৰা প্ৰচেষ্টাৰ ফলাফল কি হ’ব তাৰ বাবে হয়তো আৰু অলপ সময় অপেক্ষা কৰিব লাগিব । শনিবাৰে বিয়লি ৰাজধানী ইছলামাবাদত আৰম্ভ হোৱা প্ৰায় ১৫ ঘণ্টীয়া আলোচনাৰ সময়ত দুয়োপক্ষই লেবানন আৰু হৰমুজ জলদ্বীপত আবদ্ধ হৈ থাকিল। ইৰাণ আৰু আমেৰিকাৰ প্ৰতিনিধি দলৰ মাজত হোৱা আলোচনাৰ মধ্যস্থতাকাৰী আতিথ্য প্ৰদানকাৰী পাকিস্তানী বিষয়াসকলে এই আলোচনা সন্দৰ্ভত কোনো মন্তব্য দিবলৈ অস্বীকাৰ কৰিছে। এই আলোচনাৰ মাজত ভাল খবৰটো হ’ল যে অৱশেষত ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে লেবাননৰ সৈতে প্ৰত্যক্ষ আলোচনাত সন্মতি প্ৰকাশ কৰিছে।

ইৰাণৰ তাছনিম নিউজ এজেন্সী, আল জাজিৰা চেনেল, পাকিস্তানৰ দুনিয়া নিউজ, আৰু আমেৰিকাৰ চিবিএছ নিউজৰ খবৰ অনুসৰি দেওবাৰে পুৱা প্ৰায় ১৫ ঘণ্টাৰ পিছত ইৰাণ আৰু আমেৰিকাৰ আলোচনাপন্থীৰ মাজত দীঘলীয়া আলোচনাৰ অন্ত পৰে। শনিবাৰে স্থানীয় সময় অনুসৰি ১৩:০০ (১ বজাত) পাকিস্তানৰ ইছলামাবাদৰ চেৰেনা হোটেলত ইৰাণৰ বিষয়াসকলে আলোচনা আৰম্ভ কৰে। প্ৰথমে পাকিস্তানী বিষয়াৰ সৈতে আৰু তাৰ পিছত আমেৰিকাৰ প্ৰতিনিধি দলৰ সৈতে কথা পাতিছিল। এই দীঘলীয়া আলোচনা দেওবাৰে স্থানীয় সময় অনুসৰি পুৱা ৩:৪০ বজালৈকে চলিছিল। আজিও দুয়োপক্ষৰ মাজত আলোচনাৰ কথা।

আমেৰিকাৰ পক্ষই অযুক্তিকৰ দাবী উত্থাপন কৰাৰ অভিযোগ উত্থাপন কৰিছে ইৰাণে। ইৰাণে নিজৰ ৰাষ্ট্ৰীয় স্বাৰ্থ ৰক্ষাৰ ক্ষেত্ৰত অটল। ইৰাণৰ প্ৰতিনিধি দলটোৱে কয় যে, পাকিস্তানৰ প্ৰস্তাৱ আৰু দুয়োপক্ষৰ চুক্তিৰ ভিত্তিত দেওবাৰে আন এক ৰাউণ্ডৰ আলোচনা অনুষ্ঠিত হ’ব। ১৯৭৯ চনৰ বিপ্লৱৰ পিছত ইৰাণী আৰু আমেৰিকানসকলৰ মাজত এইটোৱেই সৰ্বোচ্চ পৰ্যায়ৰ আলোচনা বুলি কোৱা হয়। ইয়াৰ পূৰ্বে ২০১৫ চনত দুয়োখন দেশৰ তদানীন্তন বৈদেশিক মন্ত্ৰীৰ মাজত অনুষ্ঠিত হৈছিল এই বৈঠক। শেহতীয়া বৈঠকৰ নেতৃত্বত আছে আমেৰিকাৰ উপ-ৰাষ্ট্ৰপতি আৰু ইৰাণৰ সংসদৰ অধ্যক্ষ।

আমেৰিকাই স্পষ্ট কৰি দিছে যে হৰমুজ জলদ্বীপ মুকলি নোহোৱালৈকে আলোচনাত কোনো ধৰণৰ সুনিৰ্দিষ্ট অগ্ৰগতি লাভ কৰাটো অত্যন্ত কঠিন হ’ব। ১৫ ঘণ্টীয়া আলোচনাৰ পঞ্চম ৰাউণ্ডৰ সময়ত দুয়োপক্ষই কেইবাবাৰো খচৰা বিনিময় কৰে। জ্যেষ্ঠ বিষয়াসকলে ফোনযোগে কথা পাতিলে। এই সময়ছোৱাত ইৰাণৰ পৰা অধিক বিমান ইছলামাবাদত উপস্থিত হয়। পাকিস্তানৰ সকলো বিষয়াই নীৰৱ আদেশৰ অধীনত আছে। আয়োজক দেশ হিচাপে তেওঁলোকে আলোচনা সন্দৰ্ভত কোনো মন্তব্য দিয়াৰ পৰা বিৰত আছে।

এই আলোচনাৰ লক্ষ্য হৈছে বিশ্ব শক্তি যোগান পংগু কৰি তোলা পশ্চিম এছিয়াত চলি থকা যুদ্ধৰ অন্ত পেলাবলৈ স্থায়ী শান্তি চুক্তিত উপনীত হোৱা। ইৰাণ আৰু আমেৰিকাই দুসপ্তাহৰ যুদ্ধবিৰতি ঘোষণা কৰাৰ চাৰিদিনৰ পাছত শনিবাৰৰ পৰা পাকিস্তানৰ মধ্যস্থতাত এই শান্তি আলোচনা আৰম্ভ হয়। পাকিস্তানৰ প্ৰধানমন্ত্ৰী শ্বৰীফে এই আলোচনাৰ ফলত পশ্চিম এছিয়াত স্থায়ী শান্তিৰ সৃষ্টি হ’ব বুলি আশা প্ৰকাশ কৰে।

ইতিমধ্যে আমেৰিকাৰ ৰাষ্ট্ৰপতি ড’নাল্ড ট্ৰাম্পে সকীয়াই দিছে যে যদিহে এই আলোচনাৰ পিছত শান্তি চুক্তিত উপনীত নহয় তেন্তে আমেৰিকাই ইৰাণৰ বিৰুদ্ধে পুনৰ সামৰিক ব্যৱস্থা গ্ৰহণ কৰিব। আলোচনাৰ বাবে ইৰাণে ১০ দফীয়া পৰিকল্পনা দাখিল কৰিছে। ইয়াৰ ভিতৰত পশ্চিম এছিয়াৰ পৰা আমেৰিকাৰ বাহিনী প্ৰত্যাহাৰৰ দাবী, ইৰাণৰ ওপৰত থকা নিষেধাজ্ঞা প্ৰত্যাহাৰ, ইৰাণক হৰমুজ জলদ্বীপ নিয়ন্ত্ৰণ কৰিবলৈ অনুমতি দিয়াৰ দাবীও অন্তৰ্ভুক্ত।

আমেৰিকাৰ প্ৰতিনিধি দলত কোন আছে:

ইছলামাবাদত আমেৰিকাৰ প্ৰতিনিধি দলৰ নেতৃত্ব দিছে উপ-ৰাষ্ট্ৰপতি জে ডি ভেন্সে। তেওঁৰ সৈতে আছে বিশেষ দূত ষ্টিভ উইটকফ আৰু ৰাষ্ট্ৰপতি ট্ৰাম্পৰ জোঁৱাই জেৰেড কুছনাৰে।

ইৰাণৰ প্ৰতিনিধি দলত কোন আছে:

আমেৰিকাৰ প্ৰতিনিধি দলৰ সৈতে আলোচনা কৰিবলৈ পাকিস্তানলৈ যোৱা ইৰাণৰ দলটোৰ নেতৃত্বত আছে ইৰাণৰ সংসদৰ অধ্যক্ষ মহম্মদ বাঘেৰ গালিবাফে। প্ৰতিনিধি দলটোৰ আন আন গুৰুত্বপূৰ্ণ সদস্যসকলৰ ভিতৰত আছে বৈদেশিক মন্ত্ৰী আব্বাছ আৰাঘচি আৰু আলোচনাপন্থী আলী বাঘেৰী। ইৰাণৰ সংবাদ মাধ্যমে প্ৰকাশ কৰা অনুসৰি ইছলামবাদলৈ যোৱা প্ৰতিনিধি দলটোত আলোচনাপন্থী, বিশেষজ্ঞ, আৰু নিৰাপত্তা বিষয়াকে ধৰি ৭১ জন লোক আছে।

মধ্যস্থতাকাৰীত কোন:

এই আলোচনাত পাকিস্তানে মধ্যস্থতাৰ ভূমিকা পালন কৰিছে। পাকিস্তানৰ প্ৰধানমন্ত্ৰী শ্বাহবাজ শ্বৰীফ, সেনা প্ৰধান জেনেৰেল আছিম মুনীৰ, উপ-বিদেশ মন্ত্ৰী ইছাক দাৰে দুয়োপক্ষক আলোচনাৰ বাবে সৈমান কৰাত গুৰুত্বপূৰ্ণ ভূমিকা পালন কৰে।

লেবাননৰ সৈতে শান্তি চুক্তিৰ বাবে সাজু ইজৰাইল

ইফালে ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে লেবাননৰ সৈতে স্থায়ী শান্তি চুক্তিত উপনীত হ’বলৈ ইজৰাইল সাজু বুলি উল্লেখ কৰিছে। ইৰাণ আৰু ইয়াৰ মিত্ৰ দেশসমূহকো সমালোচনা কৰে। নেতান্যাহুৱে কয় যে সন্ত্ৰাসবাদী শাসনৰ বিৰুদ্ধে ইজৰাইলৰ সামৰিক অভিযান অব্যাহত থাকিব। নেতান্যাহুৱে পুনৰ কয় যে ইজৰাইলে লেবাননৰ সৈতে স্থায়ী শান্তি চুক্তি বিচাৰে আৰু লগতে কয় যে এনে চুক্তিয়ে দীৰ্ঘম্যাদী নিৰাপত্তাৰ নিশ্চয়তা নিশ্চিত কৰিব লাগিব। ইৰাণৰ চৰকাৰী প্ৰেছ টিভিৰ মতে, ভিডিঅ’ ভাষণত নেতান্যাহুৱে কয় যে ইজৰাইল লেবাননৰ সৈতে শান্তি চুক্তিৰ বাবে সাজু, কিন্তু সেয়া দীৰ্ঘম্যাদী আৰু হিজবুল্লাহৰ সামৰিক সামৰ্থ্য “নিৰ্মূল”ৰ ওপৰত ভিত্তি কৰি হ’লেহে।

ইফালে ইজৰাইলী সেনাই দাবী কৰে যে বিগত ২৪ ঘণ্টাত সমগ্ৰ লেবাননত তেওঁলোকৰ বাহিনীয়ে ২০০ৰো অধিক হিজবুল্লাহৰ ঘাটি লক্ষ্য কৰি লৈছে। ইৰাণৰ বৈদেশিক মন্ত্ৰালয়ৰ মুখপাত্ৰ ইছমাইল বাঘাইয়ে শনিবাৰে দাবী কৰে যে লেবাননত যুদ্ধবিৰতি আমেৰিকাৰ সৈতে হোৱা আলোচনাৰ চুক্তিৰ এক অংশ।

हिन्दुस्थान समाचार / অৰৱিন্দ