কলকাতা, ১০ এপ্ৰিল (হি.স.)। পশ্চিম বংগ বিধানসভা নিৰ্বাচনৰ পূৰ্বে অমিত শ্বাহে শুকুৰবাৰে কলকাতাত ভাৰতীয় জনতা পাৰ্টিৰ নিৰ্বাচনী ইস্তাহাৰ সংকল্প পত্ৰ প্ৰকাশ কৰে । এই উপলক্ষে তেওঁ ৰাজ্যখনৰ ক্ষমতালৈ আহিলে কেইবাটাও ডাঙৰ প্ৰতিশ্ৰুতি দিছে আৰু উন্নয়ন, নিয়োগ, মহিলাৰ সুৰক্ষা তথা স্বাস্থ্যসেৱাক অগ্ৰাধিকাৰ দিয়াৰ প্ৰতিশ্ৰুতি দিয়াৰ কথা উল্লেখ কৰে ।
ইস্তাহাৰত মহিলা আৰু নিবনুৱা যুৱক-যুৱতীসকলৰ বাবে বিশেষ আঁচনিৰ কথাও ঘোষণা কৰা হৈছে। বিজেপিয়ে মহিলা আৰু নিবনুৱা যুৱক-যুৱতীক প্ৰতিমাহে ৩ হাজাৰ টকা প্ৰদান কৰাৰ প্ৰতিশ্ৰুতি দিছে। ইয়াৰ উপৰিও প্ৰতিযোগিতামূলক পৰীক্ষাৰ বাবে প্ৰস্তুতি চলোৱা যুৱক-যুৱতীসকলৰ বাবে ১৫ হাজাৰ টকাৰ সাহায্য ঘোষণা কৰা হৈছে।
চৰকাৰী কর্মচাৰীক মৰগীয়া ভাট্টা প্রদান কৰাৰ লগতে স্বচ্ছ প্রক্রিয়াৰে যোগ্য প্রার্থীক স্থায়ী চাকৰি প্রদানৰ প্রতিশ্রুতিও প্রদান কৰা হৈছে ৷ কৃষকৰ বাবে প্ৰধানমন্ত্ৰী কিষাণ যোজনাৰ অধীনত ইতিমধ্যে প্ৰদান কৰা ৬,০০০ ₹ৰ সৈতে ৰাজ্যৰ পৰা ৩,০০০ ₹ যোগ কৰি মুঠ ৯,০০০ ₹ৰ প্ৰতিশ্ৰুতি দিয়া হৈছে।
স্বাস্থ্য খণ্ডত আয়ুষ্মান ভাৰত আঁচনিখনক চৰকাৰী আঁচনিৰ সৈতে একত্ৰিত কৰি দৰিদ্ৰ লোকসকলক বিনামূলীয়া চিকিৎসা প্ৰদান কৰা হৈছে। উত্তৰ বংগতো ঘোষণা কৰা হৈছে এখন অত্যাধুনিক কৰ্কট চিকিৎসালয়।
মহিলাৰ সুৰক্ষাৰ বাবে সকলো চাকৰিতে ৩৩ শতাংশ সংৰক্ষণ, প্ৰতিটো সংমণ্ডলত মহিলা আৰক্ষী থানা, প্ৰতিখন আৰক্ষী জিলাত মহিলাৰ ডেস্ক স্থাপনৰ প্ৰতিশ্ৰুতি দিয়া হৈছে। ইয়াৰ উপৰিও মহিলাসকলৰ বাবে ১০০ শতাংশ বিনামূলীয়া ৰাজহুৱা পৰিবহণৰ প্ৰতিশ্ৰুতি দিয়া হৈছে।
ইস্তাহাৰত কলকাতাৰ ১০ বছৰীয়া বিশেষ উন্নয়ন পৰিকল্পনা, উত্তৰ বংগত এইমছ, ক্ৰীড়া বিশ্ববিদ্যালয়, চাৰিটা নতুন উপকণ্ঠ অঞ্চল, দাৰ্জিলিঙক ঐতিহ্য পৰ্যটন কেন্দ্ৰ হিচাপে গঢ়ি তোলাৰ কথাও উল্লেখ কৰা হৈছে।
মমতা বেনাৰ্জীক ৰাজনৈতিকভাৱে লক্ষ্য কৰি অমিত শ্বাহে কয় যে যদি বিজেপি ক্ষমতালৈ আহে তেন্তে ই “ভয়মুক্ত আৰু দুৰ্নীতিমুক্ত বংগ”ৰ সৃষ্টি কৰিব। তেওঁ লগতে স্পষ্ট কৰে যে ৰাজ্যখনৰ মুখ্যমন্ত্ৰীগৰাকীক বংগৰ পৰা নিৰ্বাচিত কৰা হ’ব।
তদুপৰি শ্বাহে কয় যে যদি বিজেপিয়ে চৰকাৰ গঠন কৰে তেন্তে বৰ্তমানৰ কোনো জনকল্যাণমূলক আঁচনি বন্ধ নহ'ব, আৰু মছলি-ডিমৰ দৰে খাদ্য আঁচনিও চলি থাকিব।
हिन्दुस्थान समाचार / অৰৱিন্দ
