চেন্নাই, ০৬ মাৰ্চ (হি.স.)। তামিলনাডু চৰকাৰে ৰাজ্যখনত লোকপিয়ল কৰিবলৈ আনুষ্ঠানিক নিৰ্দেশ জাৰি কৰিছে। এই আদেশ অনুসৰি ১৭ জুলাইৰ পৰা তামিলনাডুত লোকপিয়ল আৰম্ভ হ’ব। প্ৰথম পৰ্যায় ৩০ আগষ্টলৈকে চলিব, মুঠ ৪৫ দিন। এইবাৰ সম্পূৰ্ণ ডিজিটেল পদ্ধতিৰে লোকপিয়ল কৰা হ’ব, য’ত সকলো তথ্য ইলেক্ট্ৰনিকভাৱে ৰেকৰ্ড কৰা হ’ব।

ৰাজ্য চৰকাৰৰ তথ্য অনুসৰি এই কামৰ বাবে প্ৰায় ৫০ হাজাৰ চৰকাৰী কৰ্মচাৰী নিয়োগ কৰা হ’ব। এই কৰ্মচাৰীসকলে ঘৰে ঘৰে গৈ মানুহৰ সৈতে যোগাযোগ কৰিব আৰু তেওঁলোকৰ সামাজিক আৰু অৰ্থনৈতিক অৱস্থাৰ সৈতে জড়িত তথ্য সংগ্ৰহ কৰিব। কৰ্মচাৰীসকলে মুঠ ৩৩টা প্ৰশ্ন সুধিব, যাৰ উত্তৰ ডিজিটেলভাৱে ৰেকৰ্ড কৰা হ’ব।

লোকপিয়লৰ সময়ত কৰ্মচাৰীসকলে গৃহৰ অৱস্থা, সম্পত্তি, বাহন, আৰু মৌলিক সুবিধাসমূহৰ সম্পৰ্কে তথ্য সংগ্ৰহ কৰিব। ইয়াৰ ভিতৰত ঘৰটো ভাড়াতীয়া নে মালিকানাধীন, পৰিয়ালৰ উপাৰ্জন, ঘৰটোত শৌচাগাৰ আছে নে নাই, ঘৰখনত চাইকেল, দুচকীয়া বা গাড়ী আছে নে নাই আদি প্ৰশ্নও অন্তৰ্ভুক্ত। ইয়াৰ উপৰিও ফ্ৰীজ আৰু এয়াৰ কণ্ডিচনাৰৰ দৰে সুবিধাসমূহৰ উপলব্ধতাৰ সন্দৰ্ভত প্ৰশ্ন কৰা হ’ব।

তামিলনাডু চৰকাৰে এই চৰকাৰী আদেশ জাৰি কৰিছে, য’ত লোকপিয়লৰ কামত নিয়োজিত চৰকাৰী কৰ্মচাৰীসকলৰ বাবে সন্মানীয় ধন (ভাট্টা) আৰু অন্যান্য প্ৰয়োজনীয় ব্যৱস্থাও আছে, যাতে কামটো সুচাৰুৰূপে সম্পূৰ্ণ হয়।

ইফালে, কেন্দ্ৰীয় চৰকাৰে ২০২৭ চনৰ ৰাষ্ট্ৰীয় লোকপিয়ল দুটা পৰ্যায়ত অনুষ্ঠিত কৰাৰ সিদ্ধান্ত গ্ৰহণ কৰিছে। নিৰ্ধাৰিত সময় অনুসৰি ৰাজ্যসমূহত প্ৰথম পৰ্যায়ৰ আয়োজন কৰাৰ বিপৰীতে অহা বছৰৰ ফেব্ৰুৱাৰী মাহত দ্বিতীয় পৰ্যায়ৰ আয়োজন কৰা হ’ব। এই দেশজোৰা লোকপিয়লত প্ৰায় ৩২ লাখ চৰকাৰী বিষয়া আৰু কৰ্মচাৰীয়ে অংশগ্ৰহণ কৰিব।

চৰকাৰৰ মতে প্ৰতিজন নাগৰিকৰ জীৱনৰ মান উন্নত কৰাৰ বাবে লোকপিয়ল অতি গুৰুত্বপূৰ্ণ। লোকপিয়লৰ পৰা পোৱা তথ্যৰ ভিত্তিত কেন্দ্ৰীয় চৰকাৰে নতুন আঁচনি প্ৰণয়ন কৰি ৰূপায়ণ কৰে, যিয়ে মানুহৰ জীৱনত অৰ্থনৈতিক আৰু সামাজিক উন্নতি অনাত সহায় কৰে।

গতিকে যেতিয়াই লোকপিয়লৰ সৈতে জড়িত চৰকাৰী কৰ্মচাৰীয়ে আপোনাৰ ঘৰলৈ আহে তেতিয়াই তেওঁলোকক সঠিক তথ্য প্ৰদান কৰি সহযোগিতা আগবঢ়াব লাগে। সেই সময়ত যদি পৰিয়ালৰ লোক উপস্থিত নাথাকে তেন্তে চিন্তাৰ প্ৰয়োজন নাই, কিয়নো কৰ্মচাৰীসকল পিছত ঘূৰি আহিব পাৰে।

हिन्दुस्थान समाचार / মনোজ কুমাৰ শইকীয়া