নতুন দিল্লী, ০৬ মাৰ্চ (হি.স.)। স্বচ্ছ ভাৰত মিছন-আৰ্বান ২.০ৰ অধীনত তিৰুৱনন্তপুৰম পৌৰ নিগমে খাল পৰিষ্কাৰ কৰিবলৈ এআই চালিত জি-স্পাইডাৰ ৰবট নিয়োগ কৰি নগৰীয়া অনাময়ৰ ক্ষেত্ৰত এক বৃহৎ পদক্ষেপ গ্ৰহণ কৰিছে। এই ৰবটটোৱে মানুহৰ হস্তক্ষেপ অবিহনে বিপদজনক আৰু কঠিন অঞ্চলৰ জাবৰ নিৰাপদে আঁতৰাবলৈ সক্ষম।

কেন্দ্ৰীয় নগৰ উন্নয়ন মন্ত্ৰালয়ে উল্লেখ কৰিছে যে তিৰুৱনন্তপুৰম ৰেলৱে ষ্টেচনৰ সমীপৰ আম্মাইঝাঞ্চন খালৰ এটা অংশ দীৰ্ঘদিন ধৰি পৰিষ্কাৰ কৰাটো প্ৰত্যাহ্বানজনক হৈ আহিছে। কম উচ্চতা, অহৰহ পানীৰ প্ৰবাহ আৰু নিৰাপদ প্ৰৱেশ স্থানৰ অভাৱে পৰম্পৰাগত পদ্ধতি ব্যৱহাৰ কৰি চাফাই কৰাটো অত্যন্ত কঠিন কৰি তুলিছিল। এই প্ৰত্যাহ্বানসমূহ মোকাবিলা কৰিবলৈ স্থানীয় স্বশাসন মন্ত্ৰী এম বি ৰাজেশে জি-স্পাইডাৰ ৰবট উদ্বোধন কৰে। এই পদক্ষেপটো পৌৰ নিগম আৰু টেকন'পাৰ্ক ভিত্তিক জেনৰবটিক ইনোভেচনছৰ সহযোগত, যিয়ে পূৰ্বে বেণ্ডিকুট নামৰ ৰবটিক স্কেভেঞ্জাৰ বিকশিত কৰিছিল।

বিষয়াসকলে কয় যে এই ৰবটৰ ব্যৱহাৰে অনাময় কৰ্মীসকলে বিপজ্জনক আৰু অস্বাস্থ্যকৰ পৰিৱেশত সোমাই পৰাৰ প্ৰয়োজনীয়তা নাইকিয়া কৰিব। এআই-সক্ষম দৃষ্টিশক্তি আৰু চেন্সৰ প্ৰযুক্তিৰে সজ্জিত এই ৰবটে খালটোত জমা হোৱা বিভিন্ন ধৰণৰ আৱৰ্জনা চিনাক্ত কৰি নিৰাপদে আঁতৰাই পেলায়। ইয়াত বায়’মিমেটিক ক্ল’ গ্ৰেবাৰ আছে যিয়ে মিশ্ৰিত আৰু অনিয়মিত ধ্বংসাৱশেষ ধৰি পোনপটীয়াকৈ সংগ্ৰহ বাহনলৈ প্ৰেৰণ কৰে।

উচ্চ পানী আৰু অবিৰত প্ৰবাহতো জি-স্পাইডাৰ ৰবটটোৱে কাম কৰিবলৈ সক্ষম। ই প্লাষ্টিক, চোকা বস্তু, আৰু অন্যান্য বিপজ্জনক আৱৰ্জনা নিৰাপদে আঁতৰাই খালৰ পৰিষ্কাৰ-পৰিচ্ছন্নতা নিশ্চিত কৰে। নিয়মীয়া আৰু পদ্ধতিগত চাফাই কৰিলে নগৰীয়া নিষ্কাশন ব্যৱস্থাও শক্তিশালী হ’ব আৰু বানপানীৰ দৰে সমস্যা ৰোধ কৰাত সহায়ক হ’ব।

বিষয়াসকলে ইয়াক নগৰীয়া অনাময়ৰ ক্ষেত্ৰত প্ৰযুক্তিগতভাৱে বৈপ্লৱিক পদক্ষেপ বুলি অভিহিত কৰিছে, যিয়ে কেৱল দক্ষতা বৃদ্ধি কৰাই নহয়, অনাময় কৰ্মীসকলৰ সুৰক্ষাও নিশ্চিত কৰে। এই আৰ্হিৰ প্ৰতিলিপি ৰাজ্যখনৰ অন্যান্য দুৰ্বল খাল আৰু নিষ্কাশন নেটৱৰ্কত কৰিব পাৰি।

हिन्दुस्थान समाचार / মনোজ কুমাৰ শইকীয়া