নতুন দিল্লী, ২৯ মাৰ্চ (হি.স.)। মহাৰাষ্ট্ৰৰ নৱি মুম্বাই আন্তঃৰাষ্ট্ৰীয় বিমানবন্দৰৰ পৰা ৩০টাতকৈও অধিক নতুন বিমান পথ মুকলি কৰাৰ কথা ঘোষণা কৰিছে দেশৰ আগশাৰীৰ বিমান সংস্থা ইণ্ডিগ’ই। এই পথসমূহত ২৯ মাৰ্চৰ পৰা ২৩ এপ্ৰিলৰ ভিতৰত পৰ্যায়ক্ৰমে বিমান সেৱা আৰম্ভ হ’ব।

ইণ্ডিগ’ই উল্লেখ কৰিছে যে এই নতুন পথসমূহে নৱী মুম্বাইক আগ্ৰা, অযোধ্যা, বাগডোগ্ৰা, বেলগাঁও (কৰ্ণাটক), চণ্ডীগড়, ডিউ, কান্নুৰ (কেৰালা), কলকাতা, পাটনা, ৰাজকোট, শ্ৰীনগৰ, বাৰাণসী, আৰু বিশাখাপট্টনকে ধৰি কেইবাখনো ডাঙৰ চহৰৰ সৈতে সংযোগ কৰিব। এই পথসমূহ মুকলি কৰাৰ পিছত নৱী মুম্বাইৰ পৰা প্ৰতি সপ্তাহত ৪০০ৰো অধিক বিমান চলাচল কৰা হ’ব, যাৰ ফলত যাত্ৰীসকলৰ বাবে অধিক সুবিধা আৰু উন্নত ভ্ৰমণ বিকল্প প্ৰদান কৰা হ’ব।

কোম্পানীটোৰ তথ্য অনুসৰি নৱী মুম্বাই আৰু গুজৰাটৰ মাজত সংযোগ যথেষ্ট সুদৃঢ় হৈছে। এই সন্দৰ্ভত ভৱনগৰ আৰু নৱী মুম্বাইৰ মাজত দৈনিক দুখনকৈ পোনপটীয়া বিমান সেৱা আৰম্ভ কৰা হৈছে। এই সেৱাসমূহ এ টি আৰ বিমানেৰে পৰিচালিত হ’ব, যাৰ ফলত দুয়োখন চহৰৰ মাজত যাত্ৰা দ্ৰুত আৰু সহজ হ’ব।

কোম্পানীটোৱে জামনগৰলৈ পোনপটীয়া বিমান সেৱা আৰম্ভ কৰাৰ কথাও ঘোষণা কৰিছে, যিটো ২৩ এপ্ৰিলৰ পৰা আৰম্ভ হ’ব। এই সম্প্ৰসাৰণৰ পিছত এই বিমান সংস্থাটোৱে গুজৰাটৰ ছখন চহৰ আহমেদাবাদ, বদোদৰা, চুৰাট, ৰাজকোট, ভৱনগৰ, আৰু জামনগৰত সেৱা আগবঢ়াব। এই চহৰসমূহলৈ সাপ্তাহিকভাৱে মুঠ ১৪০০ৰো অধিক বিমান চলাচল কৰা হ’ব।

সূচী অনুসৰি নৱী মুম্বাইৰ পৰা কেইবাখনো চহৰলৈ দৈনিক বিমান সেৱা উপলব্ধ হ’ব। ইয়াৰ ভিতৰত গোৱা, কলহাপুৰ (মহাৰাষ্ট্ৰ), গোৰখপুৰ (উত্তৰ প্ৰদেশ), ভোপাল, ডেৰাডুন, হুবলী (কৰ্ণাটক), ইন্দোৰ, দুৰ্গাপুৰ (পশ্চিম বংগ), মাদুৰাই (তামিলনাডু), ঔৰংগাবাদ (মহাৰাষ্ট্ৰ), জবালপুৰ (মধ্যাপ্ৰদেশ), ঝাৰছুগুডা (ওড়িশা), আৰু ৰায়পুৰ আদি।

কিছুমান পথত সাপ্তাহিক ভিত্তিত বিমান চলাচল কৰা হ’ব। আগ্ৰা, ডেৰাডুন, দুৰ্গাপুৰ (পশ্চিম বংগ), আৰু শ্ৰীনগৰলৈ সপ্তাহৰ কিছুমান নিৰ্দিষ্ট দিনত সেৱা উপলব্ধ হ’ব।

বৰ্তমান এই বিমান সংস্থাটোৰ ৪০০ৰো অধিক বিমান বাহন আছে আৰু ই দৈনিক ২,২০০ৰো অধিক বিমান চলাচল কৰে, যিয়ে ৯৫টাতকৈও অধিক ঘৰুৱা আৰু ৪০টাতকৈও অধিক আন্তঃৰাষ্ট্ৰীয় গন্তব্যস্থানক সংযোগ কৰে।

हिन्दुस्थान समाचार / মনোজ কুমাৰ শইকীয়া