কাৰ্বি আংলং, ২৯ মাৰ্চ (হি.স.)। প্ৰতিশ্ৰুতিৰ বন্যা বোৱাই আৰু কংগ্ৰেছ মিত্ৰ জোটক তুলাধুনা দি কাৰ্বি আংলঙত মুখ্যমন্ত্ৰী হিমন্ত বিশ্ব শৰ্মাৰ নিৰ্বাচনী ৰণডংকা ৷ কাৰ্বি আংলঙত ক্ৰমাত বৃদ্ধি পাইছে নিৰ্বাচনী তৎপৰতা ৷
আজি ১০৮ নং বোকাজান বিধান সভা সমষ্টিৰ বিজেপিৰ প্ৰাৰ্থী সূৰ্য ৰংফাৰৰ সমৰ্থনত হাংজালাংছ' খেলপথাৰত অনুষ্ঠিত নিৰ্বাচনী সভাত অংশ লয় মুখ্যমন্ত্ৰী হিমন্ত বিশ্ব শৰ্মাই ৷ প্ৰায় ১৫ সহস্ৰাধিক লোকৰ উপস্থিতিত অনুষ্ঠিত নিৰ্বাচনী সভাত মুখ্যমন্ত্ৰী গৰাকীয়ে পুনৰ বিজেপিক শক্তিশালী কৰি তুলিবলৈ ৰাইজক আহ্বান জনায় ৷
আজিৰ সভাত মুখ্যমন্ত্ৰী গৰাকীয়ে বিজেপিয়ে গ্ৰহণ কৰা বিভিন্ন উন্নয়ন মূলক আঁচনি বিশেষকৈ মহিলা, নিবনুৱা আৰু শিক্ষাৰ্থীসকলৰ বাবে লোৱা আঁচনি সমূহৰ খতিয়ান দিয়াৰ লগতে পুনৰ চৰকাৰ আহিলে নতুন-নতুন আঁচনি গ্ৰহণ কৰাৰ কথা উল্লেখ কৰে ৷ সমষ্টিটোত ৰৈ যোৱা দহ হাজাৰ মহিলাক অৰুণোদয় আঁচনিৰ অন্তৰ্ভুক্ত কৰাৰ লগতে মহিলা উদ্যমিতা আঁচনিৰ ধন পঁচিশ হাজাৰলৈ বৃদ্ধি কৰা হ’ব বুলি উল্লেখ কৰে মুখ্যমন্ত্ৰী গৰাকীয়ে ৷
মুখ্যমন্ত্ৰী গৰাকীয়ে কয় যে বিজেপিৰ বিগত দহবছৰীয়া শাসন কালত কাৰ্বি আংলং জিলাখনত শান্তি- সম্প্ৰতি বৰ্তি আহিছে ৷ যদিহে কাৰ্বি আংলংৰ ৰাইজে কংগ্ৰেছ আৰু এ.পি.এইচ.এল.চি মিত্ৰজোটক ভোট দি জয়যুক্ত কৰে তেন্তে জিলাখনত বিশৃংখল পৰিস্থিতিৰ লগতে আন্দোলনৰ পৰিৱেশ গঢ়ি উঠিব বুলি মুখ্যমন্ত্ৰীয়ে সভাত উল্লেখ কৰে ৷
মুখ্যমন্ত্ৰী গৰাকীয়ে ভাষণ প্ৰসংগত কয় যে তেওঁক আশী বছৰীয়া আইতাৰ পৰা বাইদেউ, ভাই-ভনী সকলোৱে নিজৰ পৰিয়ালৰে এজন বুলি চুমা খায় তাক লৈ ৰাইজৰ দল চিন্তিত হব নালাগে বুলিও উল্লেখ কৰে ৷ তেওঁ হাংজালাংছ’ ত এখন ষ্টেডিয়ামৰ লগতে দুই হাজাৰ আসনযুক্ত এটা প্ৰেক্ষাগৃহ স্থাপন কৰা হব বুলিও উল্লেখ কৰে ৷
সাংবাদিকৰ সৈতে হোৱা বাৰ্তালাপত তেওঁ কাৰ্বি আংলঙৰ পাঁচোটা সমষ্টিতে বিজেপি ৰ প্ৰাৰ্থী জয়লাভ কৰিব বুলি উল্লেখ কৰে।
হিন্দুস্থান সমাচাৰ / প্ৰকাশ ডেকা