নতুন দিল্লী, ২৭ মাৰ্চ (হি.স.)। মহাৰাষ্ট্ৰৰ কৃষি মন্ত্ৰী দত্তত্ৰায় বিথোবা ভৰ্ণে শুকুৰবাৰে কেন্দ্ৰীয় কৃষি আৰু কৃষক কল্যাণ আৰু গ্ৰামোন্নয়ন মন্ত্ৰী শিৱৰাজ সিং চৌহানৰ সৈতে বৈঠকত মিলিত হয়। বৈঠকত মহাৰাষ্ট্ৰৰ কৃষি মন্ত্ৰীগৰাকীয়ে ৰাজ্যখনৰ বিভিন্ন কৃষি আৰু কৃষক কল্যাণ মন্ত্ৰালয়ৰ আঁচনিৰ অগ্ৰগতিৰ বিষয়ে অৱগত কৰে। তেওঁ বিশেষভাৱে কেন্দ্ৰীয় কৃষি মন্ত্ৰীক কৃষি যান্ত্ৰিকীকৰণ আৰু ড্ৰিপ জলসিঞ্চনৰ বাবে অতিৰিক্ত ধন প্ৰদান কৰিবলৈ অনুৰোধ জনায়।
অকাল বৰষুণৰ ফলত ৰাজ্যৰ উপকূলীয় অঞ্চলত আম আৰু কাজু শস্যৰ ক্ষতিৰ বিষয়েও ভৰ্ণে কৃষি মন্ত্ৰীক অৱগত কৰে। কেন্দ্ৰীয় কৃষি মন্ত্ৰালয়ৰ বিষয়াসকলে উল্লেখ কৰিছে যে ইতিমধ্যে কেন্দ্রীয় চৰকাৰৰ এটা দলে ৰাজ্যখন ভ্ৰমণ কৰি ক্ষয়-ক্ষতিৰ বুজ লয়। ৰাজ্যত অকাল বৰষুণৰ ফলত শস্যৰ ক্ষতিৰ পোহৰত কেন্দ্ৰীয় মন্ত্ৰী চৌহানে প্ৰধানমন্ত্ৰী ফছল বীমা যোজনা (প্ৰধানমন্ত্ৰী শস্য বীমা আঁচনি)ৰ সৰ্বাধিক সুবিধা ৰাজ্যৰ কৃষকসকলৰ বাবে সুনিশ্চিত কৰিবলৈ বিষয়াসকলক নিৰ্দেশ দিয়ে।
চৌহানে সংবাদ মাধ্যমক জনাইছে যে উন্নত কৃষি সমাধান অভিযানৰ অধীনত কৃষকৰ সমস্যা সমাধানৰ বাবে ৫২টা দল গঠন কৰা হৈছে, আৰু তেওঁলোকৰ অগ্ৰগতিৰ নিয়মীয়া পৰ্যালোচনা কৰা হৈছে। ৰাষ্ট্ৰীয় কৃষি উন্নয়ন আঁচনিৰ সৰ্বাধিক সুবিধা লাভৰ বাবে ৰাজ্যখনক সক্ৰিয় পদক্ষেপ গ্ৰহণ কৰিবলৈও তেওঁ আহ্বান জনায়। বৈঠকৰ সময়ত মহাৰাষ্ট্ৰৰ কৃষি মন্ত্ৰীয়ে উল্লেখ কৰে যে এই বছৰ ৰাজ্যত পিঁয়াজৰ উৎপাদন বৃদ্ধি পাইছে। তেওঁ কেন্দ্ৰীয় মন্ত্ৰীক এপিএমচিৰ জৰিয়তে কৃষকৰ পৰা পোনপটীয়া ক্ৰয়ৰ ব্যৱস্থা কৰিবলৈ আহ্বান জনায়। কেন্দ্ৰীয় কৃষি মন্ত্ৰীগৰাকীয়ে তেওঁক বিহিত ব্যৱস্থা গ্ৰহণৰ আশ্বাস দিয়ে।
हिन्दुस्थान समाचार / মনোজ কুমাৰ শইকীয়া
