- প্ৰতিৰক্ষা মন্ত্ৰীৰ তিনিওটা সশস্ত্ৰ বাহিনীৰ মুৰব্বীৰ সৈতে শেহতীয়া বিশ্ব আৰু আঞ্চলিক নিৰাপত্তাৰ বিষয়ে চৰ্চা
নতুন দিল্লী, ২৪ মাৰ্চ (হি.স.)। পশ্চিম এছিয়াত চলি থকা যুদ্ধৰ মাজতে প্ৰতিৰক্ষা মন্ত্ৰী ৰাজনাথ সিঙে মঙলবাৰে প্ৰতিৰক্ষা মুৰব্বী জেনেৰেল অনিল চৌহান আৰু তিনিওটা সশস্ত্ৰ বাহিনীৰ মুৰব্বীৰ সৈতে সাক্ষাৎ কৰি ভাৰতৰ প্ৰতিৰক্ষা প্ৰস্তুতিৰ বিষয়ে আলোচনা কৰে। এই গুৰুত্বপূৰ্ণ বৈঠকত শেহতীয়া বিশ্ব আৰু আঞ্চলিক নিৰাপত্তাজনিত পৰিস্থিতিৰ পৰ্যালোচনাও কৰা হৈছিল। প্ৰতিৰক্ষা মন্ত্ৰীগৰাকীয়ে উল্লেখ কৰে যে পশ্চিম এছিয়াত আক্ৰমণ কেৱল ভাৰতৰ বাবেই নহয়, সমগ্ৰ বিশ্বৰ বাবেও চিন্তাৰ বিষয়।
প্ৰতিৰক্ষা গৱেষণা আৰু উন্নয়ন সংস্থাৰ অধ্যক্ষ ড০ সমীৰ কামত, বায়ুসেনাৰ মুখ্য বায়ু প্ৰধান মাৰ্শ্বাল অমৰ প্ৰীত সিং, সেনা প্ৰধান জেনেৰেল উপেন্দ্ৰ দ্বিবেদী, নৌসেনাৰ মুৰব্বী এডমিৰেল দিনেশ কে ত্ৰিপাঠী আৰু শীৰ্ষ বিষয়াসকলে পশ্চিম এছিয়াৰ বিকাশশীল পৰিস্থিতিৰ বিষয়ে আলোচনা কৰে। নিৰাপত্তা পৰ্যালোচনা বৈঠকত প্ৰতিৰক্ষা মন্ত্ৰী ৰাজনাথ সিঙে ভাৰতৰ প্ৰতিৰক্ষা প্ৰস্তুতিৰ মূল্যায়ন কৰে। পশ্চিম এছিয়াত চলি থকা সংঘাত এতিয়া চতুৰ্থ সপ্তাহত ভৰি দিছে আৰু হৰমুজ জলদ্বীপৰ মাজেৰে বাণিজ্য ব্যাহত হৈছে। ২৮ ফেব্ৰুৱাৰীত ইৰাণৰ ৮৬ বছৰীয়া উচ্চতম নেতা আয়াতুল্লাহ আলী খামেনেইৰ আমেৰিকা আৰু ইজৰাইলৰ যৌথ আক্ৰমণত মৃত্যু হোৱাৰ পিছত উত্তেজনা বৃদ্ধি পাইছে।
প্ৰতিশোধ হিচাপে ইৰাণে উপসাগৰীয় কেইবাখনো দেশৰ ইজৰাইল আৰু আমেৰিকাৰ সম্পত্তিক লক্ষ্য কৰি জলপথ আৰু অধিক বিঘ্নিত কৰি আন্তঃৰাষ্ট্ৰীয় শক্তি বজাৰ আৰু বিশ্ব অৰ্থনৈতিক স্থিতিশীলতাত প্ৰভাৱ পেলায়। ইফালে, সোমবাৰে প্ৰধানমন্ত্ৰী নৰেন্দ্ৰ মোদীয়ে লোকসভাৰ সদস্যসকলক পশ্চিম এছিয়াৰ পৰিস্থিতি আৰু ভাৰতত ইয়াৰ সম্ভাৱ্য প্ৰভাৱৰ বিষয়ে অৱগত কৰে। তেওঁ পৰিস্থিতিটোক “চিন্তনীয়” বুলি অভিহিত কৰে। আজি ৰাজ্যসভাত এই বিষয়টো সন্দৰ্ভত এক বক্তব্য প্ৰদান কৰে।
প্ৰধানমন্ত্ৰীয়ে জোৰ দি কয় যে চলি থকা সংঘাতে অভূতপূৰ্ব প্ৰত্যাহ্বানৰ সৃষ্টি কৰিছে, কেৱল অৰ্থনৈতিক আৰু ৰাষ্ট্ৰীয় নিৰাপত্তা নহয়, মানৱীয় প্ৰত্যাহ্বানও। তেওঁ উল্লেখ কৰে যে দেশৰ খাৰুৱা তেল আৰু গেছৰ প্ৰয়োজনীয়তাৰ এক উল্লেখযোগ্য অংশ যুদ্ধবিধ্বস্ত অঞ্চলটোৰ পৰাই পূৰণ কৰা হয়। তিনি সপ্তাহতকৈও অধিক সময় ধৰি এই যুঁজ চলি আছে। ইয়াৰ ফলত বিশ্ব অৰ্থনীতি আৰু জনজীৱনত বিধ্বংসী প্ৰভাৱ পৰিছে, আৰু সেইবাবেই বিশ্বই সকলো পক্ষকে এই সংঘাত অতি সোনকালে সমাধান কৰিবলৈ আহ্বান জনাইছে। তেওঁ আৰু কয় যে এই অঞ্চলটো বিশ্বৰ বাকী অংশৰ সৈতে ভাৰতৰ বাণিজ্যৰ বাবে এক মূল বাণিজ্যিক পথ হিচাপে অতি গুৰুত্বপূৰ্ণ হৈয়ে আছে।
हिन्दुस्थान समाचार / মনোজ কুমাৰ শইকীয়া
