নতুন দিল্লী, ২৪ মাৰ্চ (হি.স.)। পশ্চিম এছিয়াৰ সংকট সন্দৰ্ভত মঙলবাৰে ৰাজ্যসভাত প্ৰধানমন্ত্ৰী নৰেন্দ্ৰ মোডীয়ে দিয়া বক্তব্যক সমালোচনা কৰে কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খৰ্গেয়ে। খৰ্গে কয় যে প্ৰধানমন্ত্ৰীৰ ২০ মিনিটৰ এই বক্তব্য কেৱল বিষয় বিভ্ৰান্তিৰ প্ৰয়াসহে, আনহাতে দেশখন তীব্ৰ ইন্ধন সংকটৰ সন্মুখীন হৈছে।
ছ’চিয়েল মিডিয়া প্লেটফৰ্ম এক্সত খৰ্গে কয় যে প্ৰধানমন্ত্ৰীৰ পৰিৱৰ্তিত আৰু বৈচিত্ৰ্যপূৰ্ণ কূটনৈতিক স্থিতিয়ে ভাৰতৰ কৌশলগত স্বায়ত্তশাসনৰ ভাৰসাম্য বিঘ্নিত কৰিছে। ইজৰাইল ভ্ৰমণৰ পিছত ভাৰতে স্পষ্ট কূটনৈতিক পৰিণতিৰ সন্মুখীন হ’বলগীয়া হৈছে যদিও প্ৰধানমন্ত্ৰীয়ে সংসদ আৰু দেশক আস্থাত লোৱা নাই। ভাৰতৰ কৌশলগত স্বায়ত্তশাসন পুনৰুদ্ধাৰৰ বাবে কি সুনিৰ্দিষ্ট পদক্ষেপ গ্ৰহণ কৰা হৈছে বুলি তেওঁ প্ৰশ্ন কৰে।
তেওঁ কয় যে প্ৰায় ৩৭-৪০খন ভাৰতীয় পতাকা থকা জাহাজ হৰমুজ জলদ্বীপত আবদ্ধ হৈ আছে, য’ত ১১০০ নাৱিক আৰু প্ৰায় ১০ হাজাৰ কোটি টকাৰ সামগ্ৰী কঢ়িয়াই লৈ ফুৰিছে। ইৰাণৰ নেতৃত্বৰ সৈতে প্ৰধানমন্ত্ৰী আৰু বৈদেশিক মন্ত্ৰীয়ে আলোচনা কৰাৰ পিছতো কিয় নিৰাপদ পাৰ হোৱাটো নিশ্চিত নহ’ল? ভাৰতীয় জাহাজ দুৰ্দশাগ্ৰস্ত হৈ থকাৰ সময়ত চীন, ৰাছিয়া, জাপানৰ দৰে দেশক কিয় নিৰাপদ যাতায়তৰ অনুমতি দিয়া হৈছে?
তেওঁ কয় যে প্ৰধানমন্ত্ৰীয়ে দাবী কৰিছে যে ভাৰতে ইন্ধনৰ আমদানি ২৭খন দেশৰ পৰা ৪১খনলৈ বৃদ্ধি কৰিছে। বৰ্তমান কোন কোন দেশে ভাৰতক এল এন জি, এল পি জি, আৰু খাৰুৱা তেল যোগান ধৰিছে, আৰু কিমান পৰিমাণত?
খৰ্গে কয় যে যুদ্ধ আৰম্ভ হোৱাৰ ২৫ দিন পাৰ হৈ গ’ল, শক্তি সংকটৰ সৈতে মোকাবিলা কৰিবলৈ ভাৰতে অধিক সাজু হোৱা উচিত। পৰিস্থিতিক ক’ভিড-১৯ৰ সৈতে তুলনা কৰি প্ৰধানমন্ত্ৰীৰ মন্তব্যক লৈও তেওঁ প্ৰশ্ন উত্থাপন কৰে। খাৰ্গে কয় যে মহামাৰীৰ সময়ত দেশখনে বহু ক্ষতিগ্ৰস্ত হৈছিল, আৰু এতিয়া প্ৰধানমন্ত্ৰীয়ে মানুহে নিজৰ যত্ন ল’ব লাগিব বুলি কোৱা কথাটো অত্যন্ত চিন্তনীয়।
हिन्दुस्थान समाचार / অৰৱিন্দ
