- যোগী আদিত্যনাথকে ধৰি কেইবাখনো ৰাজ্যৰ মুখ্যমন্ত্ৰীৰ এই অনুষ্ঠানত উপস্থিত থকাৰ সম্ভাৱনা
মথুৰা, ২৩ মাৰ্চ (হি.স.)। অহা ২৪ মাৰ্চ মঙলবাৰে ৰাষ্ট্ৰীয় স্বয়ংসেৱক সংঘৰ মুৰব্বী ডা০ মোহন ভাগৱতে বৃন্দাবনৰ ৰুক্মিণী বিহাৰত নতুনকৈ নিৰ্মিত জীৱনদ্বীপ আশ্ৰম উদ্বোধন কৰিব। এই অনুষ্ঠানত যোগী আদিত্যনাথকে ধৰি কেইবাখনো ৰাজ্যৰ মুখ্যমন্ত্ৰীয়ে অংশগ্ৰহণ কৰাৰ সম্ভাৱনা আছে। আৰ এছ এছৰ মুৰব্বী ভাগৱতৰ বৃন্দাবনত উপস্থিত হোৱাৰ প্ৰস্তুতি আৰম্ভ কৰিছে জিলা প্ৰশাসনে।
সোমবাৰে পুৱা আশ্ৰমৰ প্ৰতিষ্ঠাপক মহামণ্ডলেশ্বৰ যতীন্দ্ৰনন্দই মহানগৰীৰ ৰুক্মিণী বিহাৰত জীৱনদ্বীপ আশ্ৰম প্ৰতিষ্ঠা কৰাৰ কথা ঘোষণা কৰে। আৰ এছ এছৰ মুৰব্বী মোহন ভাগৱত ২৪ মাৰ্চত বৃন্দাবনত উপস্থিত হৈ ইয়াৰ উদ্বোধন কৰিব। তেওঁ উল্লেখ কৰে যে আশ্ৰমৰ উদ্বোধনী অনুষ্ঠানত উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ উপৰিও হাৰিয়ানাৰ মুখ্যমন্ত্ৰী নয়ব ছাইনী, উত্তৰাখণ্ডৰ মুখ্যমন্ত্ৰী পুষ্কৰ সিং ধামী, ৰাজস্থানৰ মুখ্যমন্ত্ৰী ভজন লাল, আৰু মধ্যপ্ৰদেশৰ মুখ্যমন্ত্ৰী ড০ মোহন যাদৱেও অংশগ্ৰহণ কৰাৰ সম্ভাৱনা আছে।
আশ্ৰমখনৰ প্ৰতিষ্ঠাপক মহামণ্ডলেশ্বৰ যতীন্দ্ৰনন্দই উল্লেখ কৰে যে আৰ এছ এছৰ সাধাৰণ সম্পাদক ভাইয়াজী যোশীয়ে আশ্ৰমৰ আধাৰশিলা স্থাপন কৰিছিল। এতিয়া উদ্বোধন কৰিবলৈ আহিছে আৰ এছ এছৰ মুৰব্বী মোহন ভাগৱত। যিহেতু মোৰ জীৱন আৰএছএছৰ সৈতে সংযুক্ত হৈ আছে, আৰএছএছ মোৰ পৰিয়াল, আৰএছএছৰ মুৰব্বীও পৰিয়ালৰ মুৰব্বী। সেয়েহে তাতো আশ্ৰম উদ্বোধন কৰিবলৈ আহিছো। যতীন্দ্ৰনন্দই উল্লেখ কৰে যে আচাৰ্য মহামণ্ডলেশ্বৰ অভ্ধেচানন্দ গিৰি, ভানুপুৰাপীঠৰ জগদগুৰু শংকৰাচাৰ্য জ্ঞানানন্দ মহাৰাজ, স্বামী চিদাম্বৰাণন্দ, নিখিল ভাৰতীয় সন্ত সমিতিৰ সাধাৰণ সম্পাদক সন্ত জিতেন্দ্ৰানন্দ, চন্দ্ৰপাণি মহাৰাজ, ধৰমদেৱ মহাৰাজ, সন্ত ভাইয়াদাস, আৰু সাধৱী ঋতম্বৰা আদি কেইবাগৰাকীও সন্তসকল, অনুষ্ঠানত উপস্থিত থাকিব। তেওঁ লগতে কয় যে মুখ্যমন্ত্ৰী যোগী আদিত্যনাথেও উপস্থিত থকাৰ সম্ভাৱনা আছে।
মহানগৰীত আৰ এছ এছৰ মুৰব্বীগৰাকীৰ আগমনৰ পৰিপ্ৰেক্ষিতত জিলা প্ৰশাসনেও কঠোৰ নিৰাপত্তাৰ ব্যৱস্থা কৰিছে। এই সন্দৰ্ভত চি অ’ সদৰ পিতামপাল সিঙে কয় যে আৰ এছ এছৰ মুৰব্বী মোহন ভাগৱতৰ প্ৰস্তাৱিত কাৰ্যসূচীৰ সংবেদনশীলতাক বিবেচনা কৰি কঠোৰ নিৰাপত্তাৰ ব্যৱস্থা কৰা হৈছে। আধ্যাত্মিক আৰু ৰাজনৈতিক জগতৰ বিশিষ্ট ব্যক্তিসকলেও আশ্ৰমখনৰ উদ্বোধনী অনুষ্ঠানত অংশগ্ৰহণ কৰিব। আৰক্ষীৰ শীৰ্ষ বিষয়াসকলে আশ্ৰমখনৰ নিৰাপত্তাৰ ব্যৱস্থা আৰু প্ৰস্তুতি তীক্ষ্ণ পৰিদৰ্শন কৰিছে।
হিন্দুস্থান সমাচাৰ / অৰৱিন্দ
