নতুন দিল্লী, ২২ মাৰ্চ (হি.স.)। পশ্চিম এছিয়াত চলি থকা উত্তেজনাৰ বাবে বিদেশী পৰ্টফলিঅ’ বিনিয়োগকাৰী (এফপিআই) বিক্ৰেতা হৈয়েই আছে। মাৰ্চ মাহত এতিয়ালৈকে বিদেশী বিনিয়োগকাৰীয়ে ভাৰতীয় শ্বেয়াৰ বজাৰৰ পৰা ৮৮,১৮০ কোটি টকা অৰ্থাৎ প্ৰায় ৯.৬০ বিলিয়ন ডলাৰ উলিয়াইছে। মাৰ্চ মাহৰ তৃতীয় সপ্তাহলৈকে বিক্ৰীৰ পৰিসংখ্যাকে ধৰি ২০২৬ চনত এতিয়ালৈকে বিদেশী বিনিয়োগকাৰীয়ে ঘৰুৱা শ্বেয়াৰ বজাৰৰ পৰা ১ লাখ কোটি টকাতকৈ অধিক ধন উলিয়াইছে।

ইয়াৰ পূৰ্বে ফেব্ৰুৱাৰী মাহত বিদেশী বিনিয়োগকাৰীয়ে ঘৰুৱা শ্বেয়াৰ বজাৰৰ পৰা ২২,৬১৫ কোটি টকাৰ শ্বেয়াৰ ক্ৰয় কৰাৰ বিপৰীতে জানুৱাৰী মাহত বিদেশী বিনিয়োগকাৰীয়ে ঘৰুৱা শ্বেয়াৰ বজাৰৰ পৰা ৩৫,৯৬২ কোটি টকা উলিয়াইছিল। এইদৰে বিদেশী বিনিয়োগকাৰীয়ে ২০২৬ চনৰ জানুৱাৰীৰ পৰা ২০২৫ চনৰ মাৰ্চৰ তৃতীয় সপ্তাহৰ শেষলৈকে অৰ্থাৎ ২০ মাৰ্চ, ২০২৫ তাৰিখলৈকে ভাৰতীয় শ্বেয়াৰ বজাৰৰ পৰা মুঠ ১,০১,৫২৭ কোটি টকা উলিয়াইছে।

নেশ্যনেল ছিকিউৰিটিজ ডিপ’জিটৰী লিমিটেড (এন এছ ডি এল)ৰ তথ্য অনুসৰি ২০২৫ চনৰ মাৰ্চ মাহত বিদেশী পৰ্টফলিঅ’ বিনিয়োগকাৰীসকলে প্ৰতিটো ব্যৱসায়িক অধিবেশনত ঘৰুৱা ষ্টক বজাৰত বিক্ৰেতা হৈয়েই আছিল। বিদেশী বিনিয়োগকাৰীয়ে নিৰন্তৰ বিক্ৰীৰ হেঁচা প্ৰয়োগ কৰাৰ সময়তে ঘৰুৱা প্ৰতিষ্ঠানিক বিনিয়োগকাৰীয়ে (ডি আই আই) বজাৰখনক সমৰ্থন কৰিবলৈ চেষ্টা কৰি ক্ৰয় কৰি থাকিল। মাৰ্চ মাহৰ প্ৰথম তিনি সপ্তাহত ঘৰুৱা প্ৰতিষ্ঠানিক বিনিয়োগকাৰীয়ে এতিয়ালৈকে শ্বেয়াৰ বজাৰত মুঠ ১,০১,১৬৮.৬০ কোটি টকা ক্ৰয় কৰিছে। ঘৰুৱা বিনিয়োগকাৰীৰ আক্ৰমণাত্মক ক্ৰয় অব্যাহত থকাৰ বাবে বিশ্বব্যাপী নেতিবাচক আৱেগ সত্ত্বেও ঘৰুৱা শ্বেয়াৰ বজাৰ বিশেষভাৱে হ্ৰাস পোৱা নাই।

বজাৰ বিশেষজ্ঞসকলৰ মতে পশ্চিম এছিয়াত চলি থকা যুদ্ধই ঘৰুৱা শ্বেয়াৰ বজাৰত বিদেশী পৰ্টফলিঅ’ বিনিয়োগকাৰীৰ গধুৰ বিক্ৰীৰ আটাইতকৈ ডাঙৰ কাৰণ। এই যুদ্ধই বিশ্ব অৰ্থনীতিত ব্যাঘাত জন্মোৱাৰ আশংকা সৃষ্টি কৰিছে। একেদৰে হৰমুজ জলদ্বীপৰ মাজেৰে মালবাহী জাহাজ চলোৱাত ব্যাঘাত জন্মালে খাৰুৱা তেলৰ মূল্য প্ৰতি বেৰেলত ১০০ ডলাৰ অতিক্ৰম কৰিছে। ডলাৰৰ সূচকাংক বৃদ্ধিৰ বাবেও টকাৰ ঐতিহাসিক অৱনতি ঘটিছে। ইফালে আমেৰিকাৰ বণ্ডৰ বৃদ্ধি পোৱা ফলনে ডলাৰ মূল্যৰ সম্পত্তিৰ প্ৰতি বিনিয়োগকাৰীৰ আগ্ৰহ বৃদ্ধি কৰিছে। ইয়াৰ ফলত ভাৰতৰ দৰে বজাৰৰ পৰাও বিদেশী বিনিয়োগকাৰীয়ে ধন উলিয়াবলৈ সক্ষম হৈছে।

ধামী ছিকিউৰিটিজৰ উপ-সভাপতি প্ৰশান্ত ধামীয়ে কয় যে পশ্চিম এছিয়াৰ সংকটৰ বাবে বিশ্ব বজাৰত অব্যাহত থকা দুৰ্বলতা আৰু তাৰ ফলত খাৰুৱা তেলৰ মূল্যবৃদ্ধিয়ে ভাৰতৰ অৰ্থনৈতিক বিকাশত নেতিবাচক প্ৰভাৱ পেলোৱাৰ সম্ভাৱনা আছে। ইয়াৰ বাবেই বৰ্তমান বিদেশী বিনিয়োগকাৰীয়ে ভাৰতীয় বজাৰৰ পৰা নিজৰ ধন নিৰাপদে উলিয়াবলৈ চেষ্টা কৰিছে।-

हिन्दुस्थान समाचार / মনোজ কুমাৰ শইকীয়া