মথুৰা, ২০ মাৰ্চ (হি.স.)। ৰাষ্ট্ৰপতি দ্ৰৌপদী মুৰ্মুৱে আজি দ্বিতীয় দিনৰ ভ্ৰমণৰ সময়ত বৃন্দাবনত প্ৰখ্যাত সন্ত প্ৰেমানন্দ মহাৰাজৰ সৈতে সাক্ষাৎ কৰে। শুকুৰবাৰে পুৱা ৰাষ্ট্ৰপতিগৰাকীয়ে শ্ৰী হিট ৰাধা কেলি কুঞ্জ আশ্ৰমত উপস্থিত হৈ প্ৰেমানন্দ মহাৰাজৰ সৈতে সাক্ষাৎ কৰি বাৰ্তালাপ কৰে। ৰাষ্ট্ৰপতিৰ এই ভ্ৰমণৰ বাবে সমগ্ৰ মথুৰা-বৃন্দাবন অঞ্চলত কটকটীয়া নিৰাপত্তাৰ ব্যৱস্থা কৰা হৈছে। কটকটীয়া নিৰাপত্তাৰ অধীনত পুৱা প্ৰায় ৭:৩০ বজাত আশ্ৰমত উপস্থিত হয়।

প্ৰেমানন্দ মহাৰাজে ৰাষ্ট্ৰপতিগৰাকীক ব্ৰজৰ গৌৰৱ আৰু সেৱাৰ মনোভাৱৰ তাৎপৰ্যৰ বিষয়ে আলোকপাত কৰে । এই আধ্যাত্মিক মিলনে কেৱল ব্ৰজবাসীৰেই নহয়, দেশৰ বিভিন্ন প্ৰান্তৰ ভক্তসকলৰ দৃষ্টি আকৰ্ষণ কৰিছে। আশ্ৰমত উপস্থিত হোৱাৰ লগে লগে ৰাষ্ট্ৰপতিগৰাকীক প্ৰেমানন্দ মহাৰাজৰ শিষ্য আৰু দল-সংগঠনে এক ভৱ্য আৰু পৰম্পৰাগত আদৰণি জনায়। ইয়াৰ পাছত ৰাষ্ট্ৰপতি মুৰ্মু আৰু পূজনীয় মহাৰাজৰ মাজত কথা-বতৰা হৈছিল।

এই সাক্ষাতৰ সময়ত আধ্যাত্মিকতা, নিস্বাৰ্থ সেৱা, জনকল্যাণ আদি গভীৰ বিষয়ৰ ওপৰত চৰ্চা কৰা হয়। ৰাষ্ট্ৰপতিগৰাকীয়ে নিম কৰোলি বাবাৰ স্মৃতিসৌধতো পৰিদৰ্শন কৰিব। সন্ধিয়া ৰামকৃষ্ণ মিছন সেৱাশ্ৰমত নতুন অংক’লজী ব্লক উদ্বোধন কৰিব। এই ভ্ৰমণৰ সময়ত ৰাষ্ট্ৰপতিগৰাকীয়ে সাধ্বী ঋতম্ভৰে প্ৰতিষ্ঠা কৰা প্ৰতিষ্ঠান বাৎসল্য গ্ৰামতো ৰৈ থাকিব। অহা ২১ মাৰ্চত গোবৰ্ধনৰ দঙাহাটী মন্দিৰত প্ৰাৰ্থনাৰে তেওঁৰ ভ্ৰমণৰ সামৰণি পৰিব। নতুন দিল্লীলৈ ৰাওনা হোৱাৰ পূৰ্বে পৰম্পৰাগত সাত মাইল দৈৰ্ঘ্যৰ গোবৰ্ধন পৰিক্ৰমা প্ৰদৰ্শন কৰিব।

ৰাষ্ট্ৰপতিৰ মথুৰা আৰু বৃন্দাবন ভ্ৰমণৰ প্ৰতি লক্ষ্য ৰাখি জিলা প্ৰশাসনে কঠোৰ নিৰাপত্তাৰ ব্যৱস্থা কৰিছে। নিৰাপত্তাজনিত কাৰণত আৰু সন্ত্ৰাসবাদী সংগঠনৰ সম্ভাৱ্য ভাবুকিৰ বাবে জিলা দণ্ডাধীশ চন্দ্ৰ প্ৰকাশ সিঙে সমগ্ৰ জিলাখনক ন’ ফ্লাই জ’ন হিচাপে ঘোষণা কৰিছে। জিলা দণ্ডাধীশে জাৰি কৰা এক আদেশ অনুসৰি ১৯ মাৰ্চৰ পুৱা ১০ বজাৰ পৰা মথুৰা জিলাৰ সীমাৰ ভিতৰত এই নিষেধাজ্ঞা কাৰ্যকৰী হৈছে আৰু ২১ মাৰ্চৰ সন্ধিয়া ৫ বজালৈকে বাহাল থাকিব। এই সময়ছোৱাত জিলাখনত ড্ৰ’ন, চিলা বা যিকোনো ধৰণৰ বেলুন উৰুওৱা নিষিদ্ধ কৰা হৈছে।

হিন্দুস্থান সমাচাৰ / মনোজ কুমাৰ শইকীয়া