নতুন দিল্লী, ০২ মাৰ্চ (হি.স.)। ৰাষ্ট্ৰপতি দ্ৰৌপদী মুৰ্মুৱে সোমবাৰে দিল্লী চৰকাৰৰ লাখপতি কন্যা (বিটিয়া) যোজনা, হোলী আৰু দীপাৱলীৰ বাবে বিনামূলীয়া গেছ চিলিণ্ডাৰ আঁচনি, বান্ধবী (সহেলী) পিংক স্মাৰ্ট কাৰ্ড, আৰু ৪০,৬৪২ গৰাকী ছোৱালীৰ একাউণ্টত ১০০ কোটি টকাৰ প্ৰত্যক্ষ সুবিধা স্থানান্তৰ (ডিবিটি) মুকলি কৰে।

ইন্দিৰা গান্ধী ইনড’ৰ ষ্টেডিয়ামত অনুষ্ঠিত অনুষ্ঠানত ভাষণ দি ৰাষ্ট্ৰপতিগৰাকীয়ে কয় যে আজি মহিলাসকলে প্ৰতিটো ক্ষেত্ৰতে কান্ধত কান্ধ মিলাই আগবাঢ়ি গৈছে। জোৱান হিচাপে তেওঁলোকে দেশৰ সীমা ৰক্ষা কৰি আছে। বিজ্ঞানী হিচাপে তেওঁলোকে পৰীক্ষাগাৰত গৱেষণা কৰি আছে। ক্ৰীড়া প্ৰতিযোগিতাত তেওঁলোকে আন্তঃৰাষ্ট্ৰীয় মঞ্চত ভাৰতৰ পতাকা উত্তোলন কৰি আছে। ৰাজনীতি, সমাজ সেৱা, প্ৰশাসন, ব্যৱসায় – সকলো ক্ষেত্ৰতে মহিলাসকলে নতুন উচ্চতা লাভ কৰিছে। এই উপলক্ষে দিল্লীৰ উপ-ৰাজ্যপাল বিনয় কুমাৰ ছাক্সেনা, মুখ্যমন্ত্ৰী ৰেখা গুপ্তা, কেন্দ্ৰীয় ৰাজ্যিক মন্ত্ৰী হৰ্ষ মালহোত্ৰা, দিল্লীৰ কেবিনেট মন্ত্ৰী মঞ্জিন্দৰ সিং ছিৰছা আৰু ড° পংকজ কুমাৰ সিং উপস্থিত থাকে।

তেওঁ কয় যে মহিলাসকলক শিক্ষিত কৰা, তেওঁলোকৰ আত্মবিশ্বাস বৃদ্ধি কৰা, তেওঁলোকক উৎসাহ আৰু সহায় আগবঢ়োৱাটো আমাৰ কৰ্তব্য। আমি আমাৰ ছোৱালীবোৰক আশ্বস্ত কৰিব লাগিব যে তেওঁলোকৰ সপোন দেখা আৰু সপোন পূৰণ কৰাৰ ক্ষমতা আছে, আৰু আমি সেইবোৰ বাস্তৱায়িত কৰাত তেওঁলোকৰ সৈতে থিয় দিওঁ। ৰাষ্ট্ৰপতিগৰাকীয়ে উল্লেখ কৰে যে নতুন দিল্লী দেশৰ ৰাজধানী, প্ৰতিখন ৰাজ্য আৰু অঞ্চলৰ লোকে বাস কৰে। দিল্লীৰ মহিলাসকল যদি সুৰক্ষিত, শিক্ষিত আৰু স্বাৱলম্বী হয়, আৰু আত্মবিশ্বাসেৰে সমাজৰ প্ৰতিটো ক্ষেত্ৰতে নেতৃত্ব প্ৰদান কৰে, তেন্তে ই সমগ্ৰ দেশতে এক ইতিবাচক বাৰ্তা প্ৰেৰণ কৰিব।

অনুষ্ঠানত ভাষণ দি মুখ্যমন্ত্ৰীয়ে কয় যে আজি দিল্লীৰ ইতিহাসত এক সোণালী অধ্যায় সংযোজন কৰা হৈছে, যিটো মহিলা সৱলীকৰণৰ বাবে উৎসৰ্গিত। এয়া কেৱল আঁচনি আৰম্ভ কৰা নহয়। ই এক সন্মানৰ প্ৰতিজ্ঞা। ই আস্থাৰ সম্প্ৰসাৰণ। প্ৰতিখন ঘৰৰ মূল, প্ৰতিটো পৰিয়ালৰ শক্তি, শক্তিৰ উদযাপন। তেওঁ কয় যে যেতিয়া এগৰাকী কন্যাক সৱলীকৰণ কৰা হয় তেতিয়া পৰিয়ালটো ক্ষমতাশালী হয়। যেতিয়া নাৰী আত্মনিৰ্ভৰশীল হয় তেতিয়া সমাজখন আত্মবিশ্বাসী হৈ পৰে। আৰু যেতিয়া নাৰী শক্তি আগবাঢ়ি যায় তেতিয়া এখন উন্নত দিল্লীৰ পথ স্পষ্ট হৈ পৰে।

দিল্লীৰ মহিলাসকলে সুযোগ, নিৰাপত্তা, আৰু সন্মান লাভ কৰিব বুলি আজি এই বাৰ্তা প্ৰেৰণ কৰা হ’ব বুলি মুখ্যমন্ত্ৰীয়ে কয়। তেওঁ কয় যে নাৰী শক্তি এখন উন্নত দিল্লীৰ নতুন পৰিচয় হৈ পৰিব। ভগ্নী, মাতৃ, মৰমৰ কন্যা সন্তানলৈ তেওঁ শুভেচ্ছা জ্ঞাপন কৰে। তেওঁ কয়, সপোন চাওক, আপোনাৰ ভৱিষ্যত গঢ় দিয়ক; আমাৰ চৰকাৰ আপোনাৰ প্ৰতিটো খোজতে আপোনাৰ লগত আছে।

हिन्दुस्थान समाचार / মনোজ কুমাৰ শইকীয়া