গুৱাহাটী, ০২ মাৰ্চ (হি.স.)। সমাগত বিধানসভা নিৰ্বাচন। শাসকীয় দল বিজেপি আৰু বিৰোধী কংগ্ৰেছ উভয়ে নিৰ্বাচনক লৈ ব্যাপক তৎপৰ হৈ পৰিছে । নিৰ্বাচনক লৈ সাজু হৈ পৰিছে কংগ্ৰেছ দল। লগতে প্ৰতিদ্বন্দ্বিতা কৰিবলগীয়া প্ৰাৰ্থীৰ তালিকাক লৈয়ো দলটোৰ স্থিতি প্ৰায় নিশ্চিত হৈছে। ৰাজ্যসভাৰ নিৰ্বাচনৰ পাছতে কংগ্ৰেছৰ প্ৰথমখন প্ৰাৰ্থী তালিকা ঘোষণা কৰাৰ সম্ভাৱনা আছে । এই ইংগিত দিছে সাংসদ গৌৰৱ গগৈয়ে । ইফালে, চৰ্চা অনুসৰি সাংসদ গৌৰৱ গগৈ যোৰহাট সমষ্টিৰ প্ৰাৰ্থী হোৱাৰ সম্ভাৱনা আছে । সময় পৰিৱৰ্তনৰ যাত্রাত ব্যস্ত থকা প্ৰদেশ কংগ্ৰেছৰ সভাপতি গৌৰৱ গগৈৰ সাংবাদিকৰে হোৱা বাৰ্তালাপত সদৰী কৰিছে যে কংগ্ৰেছ দল নিৰ্বাচনৰ বাবে সম্পূৰ্ণৰূপে সাজু হৈছে । প্ৰায় ১০০খন আসনত প্ৰতিদ্বন্দ্বিতা আগবঢ়াব কংগ্ৰেছ দলে । বাকী আসনসমূহ মিত্রদলক এৰি দিব কংগ্ৰেছে ।
প্ৰদেশ কংগ্ৰেছৰ এগৰাকী জ্যেষ্ঠ মুখপাত্ৰই জনোৱা মতে, ৭ মাৰ্চত নতুন দিল্লীত কংগ্ৰেছৰ স্ক্ৰীনিং কমিটীৰ গুৰুত্বপূৰ্ণ বৈঠক অনুষ্ঠিত হ'ব । অসমৰ নিৰ্বাচনৰ বাবে এ আই চি চিয়ে প্রিয়ংকা গান্ধীৰ অধ্যক্ষতাত গঠন কৰা স্ক্রীনিং কমিটীৰ বৈঠকৰ বাবে ইতিমধ্যে প্রার্থী পেনেল চূড়ান্ত কৰিছে ৰাজীৱ ভৱনে । দিল্লীত হ'বলগীয়া বৈঠকত প্ৰদেশ কংগ্ৰেছৰ সভাপতি গৌৰৱ গগৈ, সাংসদ প্রদ্যুৎ বৰদলৈ, প্রাক্তন সাংসদ ৰিপুণ বৰা, সাংসদ ৰকিবুল হুছেইনকে ধৰি শীৰ্ষ নেতাসকলে অংশগ্রহণ কৰিব । এই বৈঠকতে প্রদেশ কংগ্ৰেছৰ অসমৰ প্ৰাৰ্থী পেনেল সন্দৰ্ভত আলোচনা কৰি প্ৰাৰ্থী তালিকা চূড়ান্ত কৰা হ'ব ।
উল্লেখ্য যে কংগ্ৰেছে মিত্রদল অসম জাতীয় পৰিষদক শদিয়া, খোৱাং, ডিব্ৰুগড়, মাহমৰা, ধেমাজি, সৰুপথাৰ সমষ্টি এৰি দিয়াৰ বাবে ইতিমধ্যে সন্মতি প্ৰকাশ কৰিছে । ইফালে, বিধায়ক অখিল গগৈ নেতৃত্বাধীন ৰাইজৰ দলক চিচিবৰগাঁও, ডিগবৈ, শিৱসাগৰ, মৰিয়নী, বোকাখাত, তেজপুৰ সমষ্টি এৰি দিয়াৰ বাবে কংগ্ৰেছে সিদ্ধান্ত গ্রহণ কৰিছে । আন এটা বিৰোধী মিত্ৰদল চি পি আই (এম এল)ক বিহালী সমষ্টি এৰি দিয়াৰ কথাও বিবেচনা কৰিছে কংগ্ৰেছে । এই সমষ্টি কেইটাক বাদ দি কংগ্ৰেছে বাকী সমষ্টি কেইটাৰ প্ৰাৰ্থী তালিকা চূড়ান্ত কৰাৰ বাবে অগ্ৰসৰ হৈছে ।
হিন্দুস্থান সমাচাৰ / মনোজ কুমাৰ শইকীয়া
