মস্কো/ইস্তানবুল, ১৯ মাৰ্চ (হি.স.)। ইৰাণৰ বুশ্বেহৰ পাৰমাণৱিক শক্তি কেন্দ্ৰৰ সমীপত হোৱা ক্ষেপণাস্ত্ৰ আক্ৰমণক গৰিহণা দিছে ৰাছিয়াই। ৰাছিয়াৰ পাৰমাণৱিক সংস্থা ৰোজাটমে সকীয়াই দিছে যে পাৰমাণৱিক কেন্দ্ৰৰ ওচৰত এনেধৰণৰ আক্ৰমণে নিৰাপত্তা আৰু পৰিৱেশৰ প্ৰতি গুৰুতৰ ভাবুকি কঢ়িয়াই আনিব পাৰে।

তুৰস্কৰ চৰকাৰী সংবাদ সংস্থা আনাডোলু আৰু অন্যান্য সংবাদ মাধ্যমৰ বাতৰি অনুসৰি ৰাছিয়াৰ চৰকাৰী পাৰমাণৱিক শক্তি কোম্পানী ৰোজাটমে ইৰাণৰ বুশ্বেহৰ পাৰমাণৱিক শক্তি কেন্দ্ৰৰ সমীপত হোৱা ক্ষেপণাস্ত্ৰ আক্ৰমণক তীব্ৰ গৰিহণা দিছে। কোম্পানীটোৱে সকলো পক্ষকে সংযম প্ৰয়োগ কৰি পাৰমাণৱিক কেন্দ্ৰটোৰ চাৰিওফালে উত্তেজনা হ্ৰাস কৰিবলৈ আহ্বান জনাইছে।

ৰোজাটমৰ মুৰব্বী আলেক্সেই লিখাচেভে এক বিবৃতিত কয় যে কোম্পানীটোৱে এই আক্ৰমণক “সম্পূৰ্ণ অগ্ৰাহ্যযোগ্য” বুলি বিবেচনা কৰিছে আৰু সংশ্লিষ্ট পক্ষসমূহক পাৰমাণৱিক সুৰক্ষা বিপন্ন কৰিব পৰা যিকোনো কাৰ্য্যৰ পৰা বিৰত থাকিবলৈ আহ্বান জনাইছে। তেওঁ স্পষ্ট কৰি দিয়ে যে আক্ৰমণৰ পিছতো উদ্যোগটোৰ চাৰিওফালে বিকিৰণৰ মাত্ৰা স্বাভাৱিক আৰু কোনো কৰ্মচাৰী আহত হোৱাৰ খবৰ পোৱা নাই।

ইয়াৰ পূৰ্বে ইৰাণৰ পাৰমাণৱিক সংস্থাই প্লাণ্ট কমপ্লেক্সৰ ওচৰত এটা মিছাইল বা প্ৰজেক্টাইল অৱতৰণ কৰা বুলি প্ৰকাশ কৰিছিল যদিও ইয়াৰ ফলত কোনো ডাঙৰ ক্ষতি হোৱা নাছিল।

ৰাছিয়াৰ বৈদেশিক মন্ত্ৰালয়ৰ মুখপাত্ৰ মাৰিয়া জাখাৰোভাই কয় যে ৰিয়েক্টৰৰ পৰা মাত্ৰ কেইমিটাৰমান দূৰত্বত সংঘটিত হোৱা এই আক্ৰমণ অতি বিপজ্জনক আৰু দায়িত্বহীন কাৰ্য্য। মাৰিয়া জাখাৰোভাই আমেৰিকা আৰু ইজৰাইলক পাৰমাণৱিক সুবিধাসমূহৰ ওপৰত আক্ৰমণ বন্ধ কৰিবলৈ আহ্বান জনাইছিল আৰু এনে কাৰ্য্যৰ ফলত সমগ্ৰ অঞ্চলটোত ৰেডিঅ’লজিকেল আৰু পৰিৱেশ দুৰ্যোগৰ সৃষ্টি হ’ব পাৰে বুলি সকীয়াই দিয়ে।

ৰাছিয়াই সকলো পক্ষকে সংযম কৰি যুদ্ধবিৰতিৰ দিশত পদক্ষেপ ল’বলৈ আহ্বান জনায়। আন্তঃৰাষ্ট্ৰীয় পাৰমাণৱিক শক্তি সংস্থাই এই কাণ্ডক নিৰ্দ্বিধায় গৰিহণা দিব বুলিও আশা প্ৰকাশ কৰে।

ইৰাণৰ পাৰমাণৱিক শক্তি সংস্থাৰ তথ্য অনুসৰি এই আক্ৰমণত কোনো লোকৰ মৃত্যু বা বৃহৎ ক্ষতি হোৱা নাই আৰু বৰ্তমান পৰিস্থিতি নিয়ন্ত্ৰণত আছে।

हिन्दुस्थान समाचार / অৰৱিন্দ