নতুন দিল্লী, ১৮ মাৰ্চ (হি.স.)। ৰাজ্যসভাৰ সভাপতি চি.পি. ৰাধাকৃষ্ণনে এপ্ৰিলৰ পৰা জুলাইৰ ভিতৰত অৱসৰ গ্ৰহণ কৰা ৫৯জন সাংসদক বিদায় দি কয় যে অৱসৰক শেষ বুলি নাভাবি, নতুন ভূমিকা আৰু দায়িত্বৰ আৰম্ভণি হিচাপেহে চাব লাগে।

ভাষণত অধ্যক্ষগৰাকীয়ে উল্লেখ কৰে যে সংবিধানৰ বিধান অনুসৰি সদনৰ এক তৃতীয়াংশ সদস্যই দুবছৰৰ মূৰে মূৰে অৱসৰ লয়, যাৰ ফলত সদনৰ কাম-কাজত ধাৰাবাহিকতা নিশ্চিত হয় আৰু নতুন সদস্যসকলে নিজৰ মতামত প্ৰকাশৰ সুযোগ প্ৰদান কৰে।

তেওঁ কয় যে অৱসৰ এক স্বাভাৱিক প্ৰক্ৰিয়া যিয়ে অভিজ্ঞতা আৰু নতুন শক্তিৰ মাজত ভাৰসাম্য ৰক্ষা কৰে। অৱসৰ শেষ নহয়, নতুন দায়িত্বৰ আৰম্ভণিহে। এই পৰম্পৰাই নতুন সদস্যৰ বাবে সুযোগ প্ৰদান কৰে আৰু অভিজ্ঞ সদস্যৰ পথ প্ৰদৰ্শন বজাই ৰাখে। অৱসৰপ্ৰাপ্ত সদস্যসকলে নিজৰ অভিজ্ঞতা আৰু জ্ঞানৰ জৰিয়তে জনজীৱনত অৱদান আগবঢ়াই যাব।

বিদায়ী ভাষণত অধ্যক্ষই প্ৰাক্তন প্ৰধানমন্ত্ৰী এইচ ডি দেৱগৌড়াৰ অৱদানৰ বিশেষ উল্লেখ কৰি কয় যে তেওঁ কৃষক আৰু গ্ৰাম্য ভাৰতৰ সৈতে জড়িত বিষয়সমূহ সদনত ফলপ্ৰসূভাৱে উত্থাপন কৰিছিল। কৃষক আৰু গ্ৰাম্য জনগোষ্ঠীৰ প্ৰতি তেওঁৰ অভিজ্ঞতা আৰু দায়বদ্ধতাই সদনৰ আলোচনাক সমৃদ্ধ কৰি তুলিছিল।

তেওঁ লগতে বিৰোধী দলৰ নেতা মল্লিকাৰ্জুন খৰ্গেৰ ভূমিকাক তাৎপৰ্যপূৰ্ণ আখ্যা দি কয় যে খৰ্গে সংসদীয় পৰম্পৰা আৰু গণতান্ত্ৰিক মূল্যবোধক শক্তিশালী কৰি তুলিছিল।

লগতে উপ সভাপতি হৰিৱংশৰ কাৰ্যকালক প্ৰশংসা কৰি অধ্যক্ষই কয় যে তেওঁ সদনটো মৰ্যাদা, নিৰপেক্ষতা আৰু ধৈৰ্য্যৰে পৰিচালনা কৰি সকলো পক্ষৰ সন্মান অৰ্জন কৰিছিল।

অধ্যক্ষগৰাকীয়ে কয় যে অৱসৰপ্ৰাপ্ত সদস্যসকলে নিজ নিজ ৰাজ্য আৰু জনগোষ্ঠীৰ আকাংক্ষাৰ শক্তিশালী প্ৰতিনিধি হিচাপে সদনত গুৰুত্বপূৰ্ণ বিষয়সমূহ উত্থাপন কৰি গণতান্ত্ৰিক প্ৰক্ৰিয়াক শক্তিশালী কৰি তুলিছে। তেওঁ এটা আন্তৰিক তামিল কথাৰ উদ্ধৃতি দি কয় যে ভাল কামে সময়তকৈ বেছি দিন জীয়াই থাকে আৰু সদস্যসকলৰ অৱদান সদনৰ উত্তৰাধিকাৰৰ অংশ হৈ থাকিব।

অধ্যক্ষগৰাকীয়ে অৱসৰপ্ৰাপ্ত সকলো সদস্যকে সুস্থ, সুখী, আৰু সফল ভৱিষ্যত কামনা কৰে আৰু তেওঁলোকে ৰাষ্ট্ৰীয় সেৱাত সক্ৰিয় হৈ থাকিব বুলি আত্মবিশ্বাস প্ৰকাশ কৰে।

हिन्दुस्थान समाचार / মনোজ কুমাৰ শইকীয়া