নতুন দিল্লী, ১৮ মাৰ্চ (হি.স.)। দিল্লীৰ দ্বাৰকা জিলাৰ পালাম অঞ্চলৰ ৰাম চক মাৰ্কেটত আজি পুৱা প্ৰায় ৭:০৪ বজাত সংঘটিত হোৱা অগ্নিকাণ্ডত এতিয়ালৈকে ৭ জন লোকৰ মৃত্যু হৈছে। চাৰি মহলীয়া এটা অট্টালিকা জুইয়ে আগুৰি ধৰে। নিহতসকলৰ ভিতৰত আছে তিনিগৰাকী নিৰীহ ছোৱালী। কেইবাজনো লোক জ্বলি ছাই হৈছিল, আৰু বহুতে জপিয়াই নিজৰ জীৱন ৰক্ষা কৰিছিল। অট্টালিকাটোত অৱস্থিত কাপোৰ আৰু প্ৰসাধন সামগ্ৰীৰ শ্ব’ৰুমত সংঘটিত হয় এই অগ্নিকাণ্ড আৰু দ্ৰুতগতিত তীব্ৰতৰ হৈ পৰে।

আৰক্ষীৰ মতে, অট্টালিকাটোৰ (ডব্লিউ জেড-১২৪ এ) বেছমেণ্ট, গ্ৰাউণ্ড, আৰু প্ৰথম মহলাত কাপোৰ আৰু প্ৰসাধন সামগ্ৰীৰ শ্ব’ৰুম আছে। ইয়াৰ মালিক বজাৰ মুৰব্বী ৰাজেন্দ্ৰ কাশ্যপৰ বুলি ধাৰণা কৰা হৈছে। তেওঁৰ পৰিয়ালটো দ্বিতীয় আৰু তৃতীয় মহলাত থাকে। জুইয়ে দ্ৰুতগতিত সমগ্ৰ অট্টালিকাটোত বিয়পি পৰিল আৰু ভিতৰত থকাসকলক আবদ্ধ কৰি পেলালে।

তথ্য লাভ কৰাৰ লগে লগে পালাম গাঁও আৰক্ষী থানাৰ এছ এইচ অ’কে ধৰি আৰক্ষীৰ এটা দল ঘটনাস্থলীত উপস্থিত হৈ উদ্ধাৰ আৰু সাহায্য অভিযান আৰম্ভ কৰে। প্ৰায় ২০খন অগ্নিনিৰ্বাপক বাহিনীৰ ইঞ্জিন আৰু ১১খন এম্বুলেন্স প্ৰেৰণ কৰা হয়। উল্লেখযোগ্য প্ৰচেষ্টাৰ অন্তত অগ্নিনিৰ্বাপক বাহিনীয়ে নিয়ন্ত্ৰণলৈ আনে।

মণিপাল হাস্পতালত প্ৰৱেশ (৩৫), কমল (৪০), আছু (৩২), আৰু তিনিগৰাকী ছোৱালী (বয়স ১২, ৬, আৰু ৫)কে ধৰি ছয়জন লোকক মৃত ঘোষণা কৰা হৈছে। এগৰাকী মহিলাক মৃত অৱস্থাত আই জি আই হাস্পতাললৈ অনাৰ বিপৰীতে এজন পুৰুষ আৰু এগৰাকী দুবছৰীয়া কিশোৰী চিকিৎসাধীন হৈ আছে। ২৫ শতাংশ জ্বলা-পোৰাৰ ফলত এজন ১৯ বছৰীয়া যুৱকক ছফদৰজং হাস্পতালত ভৰ্তি কৰোৱা হৈছে।

প্ৰাথমিক তথ্য অনুসৰি অগ্নিকাণ্ডৰ সময়ত দুজন লোকে প্ৰাণ ৰক্ষাৰ বাবে অট্টালিকাৰ পৰা জপিয়াই পৰে আৰু সংকটজনক অৱস্থাত তেওঁলোকক চিকিৎসালয়লৈ প্ৰেৰণ কৰা হয়। অগ্নিনিৰ্বাপক বাহিনীয়ে এই পৰ্যন্ত ১০ জন লোকক উদ্ধাৰ কৰিছে। ঘটনাৰ তদন্তৰ বাবে মাতি অনা হৈছে এফ এছ এলৰ এটা দল। বৰ্তমান অগ্নিকাণ্ডৰ কাৰণ জানিব পৰা হোৱা নাই।

हिन्दुस्थान समाचार / মনোজ কুমাৰ শইকীয়া