নতুন দিল্লী, ১৭ মাৰ্চ (হি.স.)। দিল্লীৰ ইণ্ডিয়া ইণ্টাৰনেশ্যনেল চেণ্টাৰ (আই আই চি)ত ৰাজনীতি বিজ্ঞান সমিতিয়ে দুদিনীয়া ‘ৰাজনৈতিক বিজ্ঞান সন্মিলন ২০২৬’ (পলিটিকেল চাইন্স কনক্লেভ ২০২৬)ৰ সফলতাৰে আয়োজন কৰে । সমগ্ৰ দেশৰ পৰা ৩০০ৰো অধিক পণ্ডিত, নীতি নিৰ্ধাৰক আৰু বিশেষজ্ঞই সমসাময়িক ভাৰতৰ ৰাজনীতি, শাসন আৰু ৰাজহুৱা নীতি গঢ় দিয়া জটিল বিষয়সমূহৰ ওপৰত আলোচনা কৰে।
সন্মিলনখন উদ্বোধন কৰে কেন্দ্ৰীয় শিক্ষা ৰাজ্য মন্ত্ৰী ড০ সুকান্ত মজুমদাৰে। ৰাজনীতি বিজ্ঞানক “গতিশীল শাখা” বুলি অভিহিত কৰি তেওঁ কয় যে ই কেৱল শাসন ব্যৱস্থাৰ বাবেই নহয়, কূটনীতি আৰু ৰাজহুৱা নীতিৰ দিশতো দিশ প্ৰদান কৰে।
ইণ্ডিয়া ফাউণ্ডেশ্যনৰ সভাপতি ৰাম মাধৱে সন্মানীয় অতিথি হিচাপে দিয়া ভাষণত ৰাজনৈতিক তত্ত্বৰ ভাৰতীয় সভ্যতাবাদী চিন্তাধাৰাৰ সৈতে গভীৰভাৱে জড়িত হোৱাৰ প্ৰয়োজনীয়তাৰ ওপৰত গুৰুত্ব আৰোপ কৰি পণ্ডিতসকলক ঔপনিৱেশিক কাঠামোৰ বাহিৰলৈ যাবলৈ আহ্বান জনায়।
ভাৰতীয় সাংস্কৃতিক সম্পৰ্ক পৰিষদৰ প্ৰাক্তন সভাপতি ড° বিনয় সহস্ৰবুদ্ধে স্বাধীনতাৰ পিছৰ নীতি নিৰ্ধাৰণ প্ৰক্ৰিয়াত ঔপনিৱেশিক ধাৰণাসমূহৰ অবিৰত প্ৰভাৱৰ ওপৰত আলোকপাত কৰে।
লাল বাহাদুৰ শাস্ত্ৰী ৰাষ্ট্ৰীয় প্ৰশাসন একাডেমীৰ প্ৰাক্তন সঞ্চালক ড০ সঞ্জীৱ চোপ্ৰাই ৰাজনৈতিক তত্ত্বৰ ব্যৱহাৰৰ পৰা শিকিব পৰাৰ প্ৰয়োজনীয়তাৰ ওপৰত গুৰুত্ব আৰোপ কৰি শান্তি পৰ্বৰ দৰে ভাৰতীয় পৰম্পৰা আৰু ভাৰতত বিকেন্দ্ৰীকৰণ সংস্কাৰৰ অভিজ্ঞতাৰ উল্লেখ কৰে।
অতিৰিক্ত অধিবেশনত ড° নিৰঞ্জন সাহু (পৰ্যবেক্ষক গৱেষণা ন্যাস), অধ্যাপক অশ্বিনী মহাজন, অধ্যাপক অশোক আচাৰ্য, অধ্যাপক পম্পা মুখাৰ্জী, অধ্যাপক হৰিহৰ ভট্টাচাৰ্য, অধ্যাপক আশুতোষ কুমাৰকে ধৰি পণ্ডিতসকলৰ আলোচনা অনুষ্ঠিত হয়। হান্স ছেইডেল ফাউণ্ডেশ্যনৰ প্ৰতিনিধি আৰু প্ৰখ্যাত শিক্ষাবিদ শুভ্ৰা ৰঞ্জনেও অংশগ্ৰহণ কৰে। দিল্লী বিশ্ববিদ্যালয়ৰ ৰাজনীতি বিজ্ঞান বিভাগৰ প্ৰাক্তন অধ্যাপক তথা অধ্যক্ষ অধ্যাপক এম পি সিঙে সভাপতিত্ব কৰে অধিৱেশনখনত।
দুদিনত (১২-১৩ মাৰ্চ) বিভিন্ন অধিবেশনত ৰাজনীতি বিজ্ঞান, প্ৰযুক্তি আৰু গণতন্ত্ৰক উপনিবেশমুক্তকৰণ, ফেডাৰেলিজম, আৰু শাসন ব্যৱস্থাকে ধৰি কেইবাটাও গুৰুত্বপূৰ্ণ বিষয় সামৰি লোৱা হৈছিল। সামৰণি অধিৱেশনৰ সভাপতিত্ব কৰে হেমৱতী নন্দন বহুগুনা গড়ৱাল বিশ্ববিদ্যালয়ৰ উপাচাৰ্য অধ্যাপক শ্ৰী প্ৰকাশ সিঙে।
এই উপলক্ষে ইন্দিৰা গান্ধী ৰাষ্ট্ৰীয় কলা কেন্দ্ৰৰ সভাপতি ৰাম বাহাদুৰ ৰায়ে কনক্লেভক ৰাজনৈতিক বিজ্ঞানৰ অৰ্ধ কুম্ভ বুলি অভিহিত কৰি ভাৰতীয় বৌদ্ধিক পৰম্পৰাক শৈক্ষিক বক্তৃতাত অধিক অন্তৰ্ভুক্ত কৰাৰ আহ্বান জনায়। ইফালে জাজপুৰৰ সাংসদ আৰ.এন. বেহেৰাই সংসদীয় কামত প্ৰযুক্তিৰ ভূমিকা সম্পৰ্কে আলোচনা কৰে।
সন্মিলনৰ শৈক্ষিক অংশত ১২টা সমান্তৰাল অধিবেশন অনুষ্ঠিত হয়। দেশৰ বিভিন্ন প্ৰান্তৰ গৱেষকসকলে ১৫০খনতকৈও অধিক গৱেষণা পত্ৰ উপস্থাপন কৰে। ইণ্ডিয়া ফাউণ্ডেশ্যন, ঋষিহুড ইউনিভাৰ্চিটি, মিৰাণ্ডা হাউচ, হিন্দু কলেজৰ দৰে সন্মানীয় প্ৰতিষ্ঠানে এই অনুষ্ঠানত উল্লেখযোগ্য সহায় আগবঢ়ায়।
দিল্লী বিশ্ববিদ্যালয়ৰ ৰাজনীতি বিজ্ঞান বিভাগৰ অধ্যক্ষ অধ্যাপিকা ৰেখা ছাক্সেনাই সমন্বয় কৰা এই সন্মিলনত সহ আহ্বায়ক হিচাপে মুখ্য ভূমিকা পালন কৰে ডি ইউৰ সহকাৰী অধ্যাপক ড০ স্বদেশ সিঙে।
हिन्दुस्थान समाचार / Manoj Kumar Saikia
