কাঠমাণ্ডু, ১৬ মাৰ্চ (হি.স.)। ভৈৰহাৱা, বুটৱাল আৰু লুম্বিনীৰ ব্যৱসায়ীসকলে ভৈৰহাৱাৰ গৌতম বুদ্ধ আন্তঃৰাষ্ট্ৰীয় বিমানবন্দৰ সম্পূৰ্ণ ক্ষমতাৰে শীঘ্ৰে পৰিচালনা কৰাৰ দাবী জনাইছে। বিমানবন্দৰটোৰ নিৰ্মাণকাৰ্য যথেষ্ট সময় ধৰি সম্পূৰ্ণ হৈছে যদিও এতিয়াও সম্পূৰ্ণৰূপে কাৰ্যক্ষম হোৱা নাই।

পৰ্যটন খণ্ডত ১০০০ কোটি টকাৰো অধিক বিনিয়োগ হোৱাৰ পিছতো আশা কৰা ধৰণৰ ফলাফলৰ অভাৱে বিনিয়োগক বিপদত পেলাইছে। পৰ্যটন ব্যৱসায়ী অমিত গুপ্তাই বিনিয়োগকাৰীৰ উদ্বেগ প্ৰকাশ কৰি কয় যে লুম্বিনি, দেৱদাহ, ৰামগ্ৰাম, তিলাউৰাকোট, আৰু ৰোহিনী নদীৰ আশে-পাশে থকা অঞ্চলসমূহ ঐতিহাসিক, ধৰ্মীয়, বৌদ্ধ সভ্যতাৰ সৈতে জড়িত গুৰুত্বপূৰ্ণ পৰ্যটন স্থলী। এই অঞ্চলসমূহৰ উন্নয়নত আন্তঃৰাষ্ট্ৰীয় বিমানবন্দৰৰ পৰিচালনাই উল্লেখযোগ্য ভূমিকা ল’ব বুলি আশা কৰা হৈছিল যদিও ফলপ্ৰসূ পৰ্যটন প্ৰচাৰৰ পদক্ষেপৰ অভাৱৰ বাবে অঞ্চলটোৰ পৰ্যটন আশা কৰা ধৰণে আগবাঢ়িব পৰা নাই।

সিদ্ধাৰ্থ চেম্বাৰ অৱ কমাৰ্চ এণ্ড ইণ্ডাষ্ট্ৰীৰ সভাপতি নেত্ৰ প্ৰসাদ আচাৰ্যই কয় যে নতুন চৰকাৰৰ জৰিয়তে ব্যক্তিগত খণ্ডই পৰ্যটন প্ৰসাৰ আৰু বিমানবন্দৰ পৰিচালনাৰ ক্ষেত্ৰত ফলপ্ৰসূ ভূমিকা গ্ৰহণ কৰিবলৈ সক্ষম হ’ব বুলি আশা কৰা হৈছে। তেওঁ কয় যে এই অঞ্চলটো বৌদ্ধ সভ্যতা, ইতিহাস, ধৰ্মীয় পৰ্যটনৰ এক প্ৰধান কেন্দ্ৰ হ’ব পাৰে। যদি গৌতম বুদ্ধ আন্তঃৰাষ্ট্ৰীয় বিমানবন্দৰ সম্পূৰ্ণৰূপে কাৰ্যক্ষম হৈ উঠে তেন্তে ই কেৱল পৰ্যটনক উন্নীত কৰাই নহয়, সামগ্ৰিক অৰ্থনৈতিক কাৰ্যকলাপৰ যথেষ্ট পৰিৱৰ্তন ঘটাব।

নেপাল শুল্ক এজেন্ট সন্থা, ভৈৰহাৱাৰ সভাপতি মধু প্ৰসাদ পন্থীয়ে ৰূপাণ্ডেহী নেপালৰ এক গুৰুত্বপূৰ্ণ ঔদ্যোগিক অঞ্চল বুলি উল্লেখ কৰে। ইয়াত উৎপাদিত সামগ্ৰী আন্তঃৰাষ্ট্ৰীয় বজাৰলৈ পৰিবহণৰ বাবে প্ৰয়োজনীয় আন্তঃগাঁথনি আৰু অনুকূল পৰিৱেশ সৃষ্টিৰ ক্ষেত্ৰত নতুন চৰকাৰে বিশেষ গুৰুত্ব দিব লাগে। তেওঁ লগতে কয় যে ভৈৰহাৱা ঔদ্যোগিক কৰিডৰত উৎপাদিত সামগ্ৰীৰ ৰপ্তানি বৃদ্ধি কৰিব পাৰিলে উদ্যোগ খণ্ড আৰু অধিক শক্তিশালী হ’ব পাৰে।

তেওঁলোকৰ মতে, যদিহে বিমানবন্দৰটো পৰিচালনা কৰা হয় আৰু সীমান্ত অতিক্ৰম কৰা স্থানসমূহ ফলপ্ৰসূভাৱে পৰিচালনা কৰা হয় তেন্তে ই আন্তঃৰাষ্ট্ৰীয় বাণিজ্য সম্প্ৰসাৰণতো সহায় কৰিব। ব্যক্তিগত খণ্ডৰ প্ৰতিনিধিসকলে বিশ্বাস কৰে যে এবাৰ এখন সুস্থিৰ চৰকাৰ গঠন হ’লে চৰকাৰে বিনিয়োগ অনুকূল পৰিৱেশ গঢ়ি তোলা, পৰ্যটনক প্ৰসাৰিত কৰা, উদ্যোগ সম্প্ৰসাৰণ কৰা, আন্তঃগাঁথনি উন্নয়নৰ বাবে সুনিৰ্দিষ্ট পদক্ষেপ গ্ৰহণ কৰিব। তেওঁলোকৰ মতে গৌতম বুদ্ধ আন্তঃৰাষ্ট্ৰীয় বিমানবন্দৰৰ নিয়মীয়া পৰিচালনাই লুম্বিনী অঞ্চলৰ পৰ্যটনৰ বিকাশত সহায় কৰাই নহয়, ৰূপাণ্ডেহীৰ উদ্যোগ আৰু বাণিজ্যতো নতুন শক্তিৰ প্ৰৱেশ ঘটাব।

हिन्दुस्थान समाचार / মনোজ কুমাৰ শইকীয়া