কোকৰাঝাৰ, ১২ মাৰ্চ (হি.স.)। প্ৰধানমন্ত্ৰী নৰেন্দ্ৰ মোডীৰ অসম আগমনক কেন্দ্ৰ কৰি কোকৰাঝাৰত প্ৰশাসনৰ প্ৰস্তুতি প্ৰায় সম্পন্ন ৷ শুকুৰবাৰে অৰ্থাৎ ১৩ মাৰ্চত কোকৰাঝাৰৰ গ্ৰীণ ফিল্ডত আহিব প্ৰধানমন্ত্ৰী নৰেন্দ্ৰ মোডী ৷ কোকৰাঝাৰৰ গ্ৰীণফিল্ডত প্ৰধানমন্ত্ৰীক আদৰিবলৈ সাজু বিটিচি তথা জিলা প্ৰশাসন ৷ নিৰ্মাণ কৰা হৈছে চাৰিখনকৈ হেলিপেড ৷

সমান্তৰালভাৱে হেলিপেডত হেলিকপ্তাৰৰ উৰণ আৰু অৱতৰণৰ ট্ৰায়েল চলোৱা হৈছে ৷ কোকৰাঝাৰ চহৰ আৰু সমগ্ৰ গ্ৰীণ ফিল্ড অঞ্চলত কটকটীয়া নিৰাপত্তামুলক ব্যৱস্থা গ্ৰহণ কৰা হৈছে ৷ নিয়োগ কৰা হৈছে অসম আৰক্ষীৰ লগতে আন আন নিৰাপত্তা বাহিনীৰ জোৱান ৷ গ্ৰীণ ফিল্ডত প্ৰধানমন্ত্ৰীয়ে সম্বোধন কৰিব বিশাল জনসভা ৷ জনসভাত প্ৰায় দুই লাখ লোক সমবেত হোৱাৰ সম্ভৱনা ৷

গ্ৰীণ ফিল্ডৰ পৰাই প্ৰধানমন্ত্ৰীয়ে ভাৰ্চুৱেল পদ্বতিৰে বিটিচি এলেকাৰ বাবে ১১০১ কোটি টকা ব্যয় সাপেক্ষে চাৰিটাকৈ পথ উৰণীয়া সেতু, দুখন দলং আৰু ছয়টা পথ প্ৰকল্পৰ ভূমি পূজন কৰিব ৷ কোকৰাঝাৰ জিলাৰ বাশবাৰীত ২৫৬ কোটি টকা ব্যয় সাপেক্ষে নিৰ্মাণ কৰিব লগীয়া ৰেল ৱাগন ৱাৰ্কশ্বপৰও ভূমি পূজন কৰিব প্ৰধানমন্ত্ৰী মোডীয়ে ৷

আনহাতে অসম মালা ৩.০ ৰ অধীনত ৰাজ্য খনৰ ৩৪ খন জিলাত ৩,২১৭ কোটি ব্যয় সাপেক্ষে ৮৮৪ কিলোমিটাৰ পথ বহলী কৰণৰ উপৰিও ৩৬ খন দলং নিৰ্মাণৰ ভূমি পূজনো কৰিব ৷ ইয়াৰোপৰি কামাখ্যা-ছৰলাপল্লী অমৃত ভাৰত এক্সপ্ৰেছ, নাৰেংগী -আগৰতলা এক্সপ্ৰেছ আৰু গুৱাহাটী -নিউ জলপাইগুৰি এক্সপ্ৰেছৰ প্ৰধানমন্ত্ৰীয়ে ফ্লেগ অফ কৰিব ৷

উল্লেখ্য যে প্ৰধানমন্ত্ৰীৰ কোকৰাঝাৰ ভ্ৰমণৰ পৰিপ্ৰেক্ষিতত চহৰখনৰ সকলোবোৰ বাট-পথ চাফ-চিকুণাই, চূণ সানি সজাই-পৰাই তোলা হৈছে ৷

হিন্দুস্থান সমাচাৰ / প্ৰকাশ ডেকা