কাঠমাণ্ডু, ১২ মাৰ্চ (হি.স.)। পশ্চিম এছিয়াত বৃদ্ধি পোৱা উত্তেজনা আৰু সংঘাতৰ মাজতে নেপালৰ বৈদেশিক পৰিক্ৰমা মন্ত্ৰালয়ে এটা অনলাইন পৰ্টেল মুকলি কৰিছে, য’ত মুঠ ৬৫,৮৮৬ জন নেপালী নাগৰিকে ঘূৰি অহাৰ বাবে পঞ্জীয়ন কৰিছে । নেপালী কূটনৈতিক মিছনে চৰকাৰৰ সৈতে সমন্বয়ৰে কাম কৰি আছে নেপালী নাগৰিকৰ সুৰক্ষা আৰু প্ৰত্যাৱৰ্তন সুনিশ্চিত কৰিবলৈ ।

উপসাগৰীয় দেশসমূহত থকা নেপালী দূতাবাসৰ সমন্বয়ত ২ মাৰ্চত নেপাল চৰকাৰে এই অনলাইন পঞ্জীয়ন ব্যৱস্থা আৰম্ভ কৰিছিল । উদ্দেশ্য হৈছে অঞ্চলটোত বসবাস কৰা নেপালী নাগৰিকসকলৰ তথ্য সংগ্ৰহ কৰা যাতে প্ৰয়োজন হ’লে তেওঁলোকক ঘূৰাই আনিব পৰা যায় । মন্ত্ৰালয়ৰ মতে, বৰ্তমানে লাভ কৰা সবিশেষৰ মূল্যায়ন আৰু প্ৰক্ৰিয়াকৰণ কৰি অধিক প্ৰয়োজনীয় ব্যৱস্থা নিশ্চিত কৰা হৈছে। এই পৰ্টেলৰ জৰিয়তে নেপালী নাগৰিকে পশ্চিম এছিয়াৰ দেশত থকা নিজ নিজ নেপালী দূতাবাসৰ জৰিয়তে নিজৰ ব্যক্তিগত তথ্য পঞ্জীয়ন কৰিব পাৰিব ।

বৈদেশিক মন্ত্ৰালয়ৰ মুখপাত্ৰ লোক বাহাদুৰ পৌডেলৰ মতে, নেপালী মিছনসমূহক ইমেইল, টেলিফোন বা অন্যান্য যোগাযোগ মাধ্যমৰ জৰিয়তে অসুবিধাৰ সন্মুখীন হোৱা নাগৰিকৰ সৈতে যোগাযোগ ৰাখিবলৈ নিৰ্দেশ দিয়া হৈছে। মন্ত্ৰালয়ে পশ্চিম এছিয়াত বাস কৰা নেপালী নাগৰিকসকলক বৰ্তমানৰ সংকটৰ সময়ত ধৈৰ্য্য ধৰি ৰাখিবলৈ আৰু স্থানীয় আইন উলংঘা কৰা ফটো, ভিডিঅ’ বা অডিঅ’ সামগ্ৰী ৰেকৰ্ডিং বা সম্প্ৰচাৰৰ পৰা বিৰত থাকিবলৈ আহ্বান জনাইছে ।

ইৰাণৰ ওপৰত আমেৰিকা আৰু ইজৰাইলৰ আক্ৰমণৰ পিছত পশ্চিম এছিয়াত উত্তেজনা যথেষ্ট বৃদ্ধি পাইছে। ইয়াৰ ফলত তাত বাস কৰা আৰু কৰ্মৰত সহস্ৰাধিক নেপালী নাগৰিকৰ সুৰক্ষাৰ প্ৰতি উদ্বেগ সৃষ্টি হৈছে ।

हिन्दुस्थान समाचार / মনোজ কুমাৰ শইকীয়া