মুম্বাই, ১২ মাৰ্চ (হি.স.)। বিধান ভৱন আৰু উচ্চ ন্যায়ালয়কে ধৰি চাৰিটা স্থানত বোমা বিস্ফোৰণৰ ভাবুকি দিয়া ইমেইলে বৃহস্পতিবাৰে পুৱা মুম্বাইত আতংকৰ সৃষ্টি কৰে। লগে লগে আৰক্ষীৰ দলে এই স্থানসমূহত পুংখানুপুংখ তালাচী চলায়। কোনো সন্দেহজনক বস্তু পোৱা নগ’ল। এতিয়া ইমেইল প্ৰেৰকজনৰ তদন্ত অব্যাহত ৰাখিছে আৰক্ষীয়ে।
উপ-মুখ্যমন্ত্ৰী একনাথ শ্বিণ্ডে কয় যে আজি পুৱা বিধান ভৱন আৰু উচ্চ ন্যায়ালয়কে ধৰি চাৰিটা স্থানত বোমা বিস্ফোৰণৰ ভাবুকি দিয়া বাৰ্তা লাভ কৰা হৈছে। ইমেইলটোত বম্বে ষ্টক এক্সচেঞ্জ, মেট্ৰ’, হাইকোৰ্ট, আৰু কিছুমান বেংকৰ কথাও উল্লেখ কৰা হৈছে। তেওঁ লগতে কয় যে যিহেতু বৰ্তমান বাজেট অধিবেশন চলি আছে, গতিকে সকলো কৰ্মচাৰী, বিষয়া, আৰু জনপ্ৰতিনিধিক গেটত ৰখাই দিয়া হৈছিল। ডগ স্কোয়াড আৰু বোমা নিষ্কাশন স্কোয়াড মাতি অনা হয়, আৰু বিধান ভৱন কমপ্লেক্স, উচ্চ ন্যায়ালয়, আৰু অন্যান্য স্থানত পুংখানুপুংখ তালাচী চলোৱা হয় যদিও কোনো সন্দেহজনক বস্তু পোৱা নগ’ল। শ্বিণ্ডে কয় যে মুম্বাই সম্পূৰ্ণ নিৰাপদ।
গৃহ পৰিক্ৰমা ৰাজ্যিক মন্ত্ৰী পংকজ ভয়ৰে কয় যে প্ৰেৰকক চিনাক্ত কৰিবলৈ আৰক্ষীয়ে ইমেইল আইডিৰ তদন্ত চলাই আছে। তেওঁ লগতে কয় যে এইটো এটা ভুৱা ইমেইল, গতিকে আতংকিত হোৱাৰ কোনো প্ৰয়োজন নাই।
বিধান ভৱনৰ সূত্ৰই জনোৱা মতে, ইমেইলটোত খালিস্তানৰ সমৰ্থনৰ দাবী আছে। ইমেইলত অভিযন্তা গুৰনাখ সিং আৰু ৰুকন শ্বাহৱালাৰ নাম উল্লেখ কৰা হৈছে।
हिन्दुस्थान समाचार / মনোজ কুমাৰ শইকীয়া
