কোচি, ১১ মাৰ্চ (হি.স.)। প্ৰধানমন্ত্ৰী নৰেন্দ্ৰ মোদীয়ে বুধবাৰে সদৌ কেৰালা ধীৱৰ সভাৰ সোণালী জয়ন্তী উদযাপনৰ অনুষ্ঠানত ভাষণ দি কয় যে বিগত ৫০ বছৰ ধৰি সংগঠনটোৱে মাছমৰীয়া সমাজৰ অধিকাৰ সুৰক্ষিত কৰাৰ বাবে অক্লান্তভাৱে কাম কৰি আহিছে। তেওঁ সকলো মাছমৰীয়া আৰু ধীৱৰ সভাৰ সদস্যক অভিনন্দন জনোৱাৰ লগতে তেওঁলোকৰ অৱদানৰ প্ৰশংসা কৰে ।
প্ৰধানমন্ত্ৰীয়ে কয় যে কেৰালাৰ জনসাধাৰণে দীৰ্ঘদিন ধৰি ৰাজ্যখনৰ নাম সলনি কৰি কেৰালাম কৰিবলৈ দাবী জনাই আহিছিল। কেন্দ্ৰৰ এন ডি এ চৰকাৰে ইয়াক অনুমোদন জনোৱাৰ লগে লগে ৰাজ্যবাসীৰ মাজত আনন্দৰ জোৱাৰ উঠিছে। তেওঁ কয় যে এই সুন্দৰ ৰাজ্যখনে নিজৰ উচিত নাম লাভ কৰিছে, মালয়ালী সংস্কৃতিৰ লগত খাপ খুৱাই, আৰু ইয়াৰ বাবে তেওঁ ৰাজ্যবাসীক অভিনন্দন জনাইছে।
প্ৰধানমন্ত্ৰীয়ে কয় যে কেৰালাৰ ভয়াৱহ বানপানীৰ সময়ত সমগ্ৰ দেশে মাছমৰীয়া সমাজৰ সাহস আৰু সেৱাৰ মনোভাৱৰ সাক্ষী হৈছিল। আৱদ্ধ লোকক উদ্ধাৰ আৰু আৰ্তজনক অত্যাৱশ্যকীয় সামগ্ৰী যোগান ধৰাত মাছমৰীয়াসকলে গুৰুত্বপূৰ্ণ ভূমিকা পালন কৰিছিল। ইয়াৰ বাবেই সমগ্ৰ দেশে মাছমৰীয়া সমাজৰ সাহস আৰু নিষ্ঠাক সন্মানেৰে স্মৰণ কৰে।
তেওঁ কয় যে পূৰ্বৰ চৰকাৰসমূহে দশক দশক ধৰি মাছমৰীয়া সমাজখনক অৱহেলা কৰিছিল যদিও এতিয়া এন ডি এ চৰকাৰে তেওঁলোকৰ সম্ভাৱনাক স্বীকৃতি দি তেওঁলোকক আগুৱাই নিয়াৰ বাবে কাম কৰি আছে। নীলা অৰ্থনীতিত মাছমৰীয়াৰ গুৰুত্বপূৰ্ণ ভূমিকাক মনত ৰাখি চৰকাৰে সুকীয়া মীন মন্ত্ৰালয় স্থাপন কৰি তেওঁলোকক মূলসুঁতিলৈ অনাৰ বাবে কেইবাটাও পদক্ষেপ গ্ৰহণ কৰিছে।
প্ৰধানমন্ত্ৰীয়ে উল্লেখ কৰে যে ৰাজ্যখনৰ মীন খণ্ডত দ্ৰুতগতিত অগ্ৰগতি লাভ কৰা প্ৰধানমন্ত্ৰী মৎস্য সম্পাদ যোজনাৰ অধীনত কেৰেলাৰ বাবে প্ৰায় ১৪০০ কোটি টকা আবণ্টন দিয়া হৈছে। তেওঁ কয় যে সাগৰত মাছমৰীয়াৰ সুৰক্ষা চৰকাৰৰ বাবে অগ্ৰাধিকাৰ। পূৰ্বে যেতিয়া মাছমৰীয়াসকলে সাগৰলৈ ওলাই গৈছিল তেতিয়া তেওঁলোকৰ পৰিয়ালে বতৰ আৰু অন্যান্য বিপদৰ বাবে চিন্তা কৰিছিল যদিও এতিয়া উপগ্ৰহ প্ৰযুক্তিৰ জৰিয়তে তেওঁলোকৰ সুৰক্ষা আৰু অধিক শক্তিশালী কৰা হৈছে।
প্ৰধানমন্ত্ৰীয়ে কয় যে মাছমৰীয়া সমাজৰ বাবেও প্ৰযুক্তি শক্তি হৈ পৰিছে। ইয়াৰ বাবে ৰাষ্ট্ৰীয় মীন ডিজিটেল মঞ্চ আৰম্ভ কৰা হৈছে, যাৰ ফলত মাছমৰীয়া, ব্যৱসায়ী, আৰু ৰপ্তানিকাৰকসকলে একক মঞ্চত পঞ্জীয়ন কৰিব পাৰিব আৰু চৰকাৰী আঁচনিৰ সুবিধাসমূহ সহজেই লাভ কৰিব পাৰিব। কেৰালাৰ প্ৰতিটো পৰিয়াললৈ সমৃদ্ধি নিশ্চিত কৰাৰ বাবে চৰকাৰ প্ৰতিশ্ৰুতিবদ্ধ। ইয়াৰ দ্বাৰা উন্নত ভাৰতৰ শক্তিশালী ভেটি গঢ় লৈ উঠিব আৰু দেশখনক উন্নত কেৰালাৰ দিশে আগুৱাই নিব ।
हिन्दुस्थान समाचार / মনোজ কুমাৰ শইকীয়া
