নতুন দিল্লী, ১১ মাৰ্চ (হি.স.)। লোকসভাৰ অধ্যক্ষক অপসাৰণৰ প্ৰস্তাৱ সন্দৰ্ভত বুধবাৰে চৰ্চাৰৰ প্ৰতিক্ৰিয়া প্ৰকাশ কৰি কেন্দ্ৰীয় গৃহমন্ত্ৰী অমিত শ্বাহে কয় যে এইটো কোনো সাধাৰণ ঘটনা নহয়। প্ৰায় চাৰি দশকৰ পাছত অধ্যক্ষৰ বিৰুদ্ধে অনাস্থা প্ৰস্তাৱ দাখিল কৰা হৈছে, যিটো সংসদীয় ৰাজনীতি আৰু সদন উভয়ৰে বাবে দুৰ্ভাগ্যজনক।
তেওঁ কয় যে লোকসভাৰ ইতিহাস অনুযায়ী সদনৰ কাৰ্য্যবিধি পাৰস্পৰিক বিশ্বাসৰ ওপৰত ভিত্তি কৰি গঢ় লৈ উঠে। অধ্যক্ষই নিৰপেক্ষ অভিভাৱক হিচাপে কাম কৰে, শাসকীয় দল আৰু বিৰোধী উভয়কে প্ৰতিনিধিত্ব কৰে। ইয়াৰ বাবে সদনে এনে নিয়ম প্ৰণয়ন কৰিছে যাৰ ভিত্তিত অধ্যক্ষই সদনৰ কাৰ্য্যবিধি পৰিচালনা কৰে।
অমিত শ্বাহে কয় যে এই সদন বজাৰ নহয়, কিন্তু ইয়াত সদস্যসকলে নিজৰ মতামত প্ৰকাশ কৰি প্ৰতিষ্ঠিত নিয়ম আৰু পদ্ধতি অনুসৰি আলোচনাত অংশ লোৱাটো আশা কৰা হৈছে। তেওঁ কয় যে যিকোনো সদস্যই নিজৰ অধিকাৰৰ কথা ক’ব পাৰে, কিন্তু সদনৰ নিয়ম উলংঘা কৰিব নোৱাৰি।
ভাৰতীয় জনতা পাৰ্টি বিৰোধী দলত থকাৰ সময়তো কেতিয়াও লোকসভাৰ অধ্যক্ষৰ বিৰুদ্ধে অনাস্থা প্ৰস্তাৱ অনা নাছিল বুলিও তেওঁ কয়। তেওঁ কয় যে অধ্যক্ষৰ সিদ্ধান্তৰ সৈতে মতানৈক্য থাকিব পাৰে যদিও লোকসভাৰ নিয়ম অনুসৰি অধ্যক্ষৰ সিদ্ধান্তক চূড়ান্ত বুলি গণ্য কৰা হয় আৰু তেওঁৰ সততাক লৈ প্ৰশ্ন উত্থাপন কৰা উচিত নহয়।
কেন্দ্ৰীয় গৃহমন্ত্ৰীগৰাকীয়ে কয় যে বৰ্তমানৰ লোকসভাৰ অধ্যক্ষ ওম বিৰলা যেতিয়া এই পদত নিৰ্বাচিত হৈছিল তেতিয়া শাসক আৰু বিৰোধী দুয়োটা দলৰ নেতাই মিলি তেওঁক সমৰ্থন কৰিছিল। অৰ্থাৎ অধ্যক্ষই নিজৰ কৰ্তব্য পালনৰ বাবে এক ন্যায্য আৰু স্বতন্ত্ৰ পৰিৱেশৰ ব্যৱস্থা কৰাটো দুয়োটা পক্ষৰ দায়িত্ব।
তেওঁ কয় যে বিগত ৭৫ বছৰত সংসদৰ দুয়োটা সদনে দেশৰ গণতন্ত্ৰৰ ভেটি সুদৃঢ় কৰি তুলিছে, আৰু সমগ্ৰ বিশ্বই ভাৰতৰ গণতান্ত্ৰিক ব্যৱস্থাৰ সুনাম স্বীকৃতি দিছে। কিন্তু সদনৰ সৰ্বোচ্চ পদবী দখল কৰা ব্যক্তিজনৰ সততাক লৈ প্ৰশ্ন উত্থাপন হ’লে ইয়াৰ প্ৰতিক্ৰিয়া কেৱল ৰাষ্ট্ৰীয় পৰ্যায়তে নহয়, আন্তঃৰাষ্ট্ৰীয় পৰ্যায়তো পৰে।
অমিত শ্বাহে কয় যে লোকসভাৰ অধ্যক্ষৰ বিৰুদ্ধে অনাস্থা প্ৰস্তাৱ সাধাৰণতে খুব কমেইহে অনা হয়। সদস্যসকলে অধ্যক্ষৰ চেম্বাৰত প্ৰৱেশ কৰি তেওঁৰ সৈতে মত বিনিময় কৰাৰ সুযোগ পায়। তেওঁ কয় যে অধ্যক্ষৰ নিৰাপত্তাক লৈ প্ৰশ্ন উত্থাপন হোৱা পৰিস্থিতিৰ সৃষ্টি হ’ব নালাগে, কিয়নো ইয়াৰ ফলত সংসদীয় পৰম্পৰাৰ মৰ্যাদা ক্ষতিগ্ৰস্ত হয়।
हिन्दुस्थान समाचार / মনোজ কুমাৰ শইকীয়া
