কাঠমাণ্ডু, ২৮ ফেব্ৰুৱাৰী (হি.স.)। পশুপতিনাথ মন্দিৰত বিশেষ প্ৰাৰ্থনা অনুষ্ঠানৰ পৰা আৰম্ভ কৰি প্ৰতিনিধি সদনৰ নিৰ্বাচনৰ প্ৰত্যাশাত শনিবাৰে কাঠমাণ্ডুত ৰাষ্ট্ৰীয় স্বতন্ত্ৰ পাৰ্টিয়ে (আৰএছপি) ৰোড শ্ব’ অনুষ্ঠিত কৰে। আৰ এছ পিৰ সভাপতি ৰবি লামিচানে আৰু প্ৰধানমন্ত্ৰী পদৰ প্ৰাৰ্থী বেলেন শ্বাহে একেলগে অংশগ্ৰহণ কৰে ৰোড শ্ব’ত।

শনিবাৰে পুৱা পশুপতিনাথ মন্দিৰ চৌহদৰ পৰা আৰম্ভ হোৱা এই অভিযান সন্ধিয়া বানাস্থলী চকত থকা দলটোৰ কেন্দ্ৰীয় কাৰ্যালয়ত সামৰণি পৰাৰ পৰিকল্পনা কৰা হৈছে।

৯ নং কাঠমাণ্ডু সমষ্টিৰ দলৰ প্ৰাৰ্থী তথা দলৰ উপ-সভাপতি দীপি আৰয়ালে পশুপতিনাথ মন্দিৰৰ পৰা প্ৰচাৰ আৰম্ভ কৰাটো সাংস্কৃতিক আৰু প্ৰতীকীভাৱে তাৎপৰ্যপূৰ্ণ বুলি কয়, কিয়নো এই স্থান দেশৰ অন্যতম প্ৰধান ধৰ্মীয় স্থান। ‘ঘণ্টী ঘৰ’ (ঘড়ী টাৱাৰ)ত সমাৱেশৰ সামৰণি পৰাটো দলৰ পৰিচয় আৰু সাংগঠনিক ঐক্য প্রদর্শনৰ প্রয়াস বুলিও তেওঁ কয়৷

ৰাষ্ট্ৰীয় ৰাজধানী অঞ্চলৰ ডাঙৰ ডাঙৰ পথ আৰু ছেক্সনত গোটেই দিনটো ৰেলী অনুষ্ঠিত হয়। দলৰ কৰ্মী আৰু সমৰ্থকসকলে বিভিন্ন স্থানত ভোটাৰৰ কাষ চাপিছিল, দলৰ নিৰ্বাচনী প্ৰতীক ঘণ্টাৰ সমৰ্থন বিচাৰিছিল।

ৰাজধানী অঞ্চলৰ মুঠ ১৫টা সংসদীয় সমষ্টিৰ ভিতৰত কাঠমাণ্ডুৰ ১০টা, ললিতপুৰৰ ৩টা, ভক্তপুৰৰ ২টা সমষ্টি আছে। আজিৰ এই ৰোডশ্ব’ক আগন্তুক নিৰ্বাচনৰ পূৰ্বে দলৰ উপস্থিতি শক্তিশালী কৰাৰ লগতে ভোটাৰৰ সৈতে প্ৰত্যক্ষ যোগাযোগ স্থাপনৰ কৌশল হিচাপে দেখা গৈছে।

हिन्दुस्थान समाचार / মনোজ কুমাৰ শইকীয়া