নতুন দিল্লী, ২৭ ফেব্ৰুৱাৰী (হি.স.)। ভাৰতীয় ক্ৰিকেট দলৰ বেটছমেন ৰিংকু সিঙৰ পিতৃ খানচান্দ সিঙৰ শুকুৰবাৰে পুৱা ৪:৩৬ বজাত গ্ৰেটাৰ নয়দাৰ যথাৰ্থ হাস্পতালত শেষ নিশ্বাস ত্যাগ কৰে। বয়স ৬০ বছৰ আৰু যকৃতৰ কৰ্কট ৰোগত আক্ৰান্ত আছিল।
ভাৰতীয় ক্ৰিকেট নিয়ন্ত্ৰণ ব’ৰ্ডৰ যুটীয়া সম্পাদক দেৱজিৎ শইকীয়াই জনোৱা মতে, ৰিংকু সিঙে চেন্নাইৰ দলীয় শিবিৰ এৰি ঘৰলৈ উভতি আহি পিতৃৰ অন্ত্যেষ্টিক্ৰিয়াত অংশগ্ৰহণ কৰিছে।
দেবাজিত শইকীয়াই ৰিংকু সিঙৰ পিতৃৰ মৃত্যুত গভীৰ শোক প্ৰকাশ কৰি কয় যে এই কঠিন সময়ত ৰিংকু আৰু তেওঁৰ পৰিয়ালৰ সৈতে ব’ৰ্ড থিয় দিছে।
ছ’চিয়েল মিডিয়াত বিচিচিআইৰ উপ-সভাপতি ৰাজীৱ শুক্লাই এক বাৰ্তাযোগে কয়, ক্ৰিকেটাৰ ৰিংকু সিঙৰ পিতৃৰ মৃত্যুৰ খবৰটো অত্যন্ত দুখজনক। এই কঠিন সময়ত ৰিংকু সিং আৰু তেওঁৰ সমগ্ৰ পৰিয়ালৰ সৈতে মোৰ গভীৰ সমবেদনা। বিদেহী আত্মাক শান্তি প্ৰদান কৰক আৰু শোকসন্তপ্ত পৰিয়ালটোক এই অপৰিসীম ক্ষতি সহ্য কৰিবলৈ শক্তি প্ৰদান কৰক।
প্ৰাক্তন অলৰাউণ্ডাৰ যুৱৰাজ সিঙে লিখিছে যে এই খবৰটো হৃদয়বিদাৰক আৰু এনে সময়ত কথাই যথেষ্ট নহয়, কিন্তু সমগ্ৰ ক্ৰিকেট সমাজে ৰিংকু আৰু তেওঁৰ পৰিয়ালৰ সৈতে দৃঢ়তাৰে থিয় দিছে।
প্ৰাক্তন স্পিনাৰ হৰভজন সিঙে ৰিংকু আৰু তেওঁৰ পৰিয়ালৰ বাবে এয়া অতি কঠিন সময় বুলি উল্লেখ কৰি বিদেহী আত্মাই শান্তিৰে চিৰশান্তি লাভ কৰাৰ লগতে পৰিয়ালটোক সাহস কৰাৰ বাবে প্ৰাৰ্থনা জনায়।
প্ৰাক্তন বিস্ফোৰক বেটছমেন বীৰেন্দ্ৰ ছেহৱাগে তেওঁৰ বাৰ্তাত কয়, ৰিংকু, আপোনাৰ পিতৃৰ মৃত্যুৰ কথা শুনি মই গভীৰভাৱে দুখী হৈছো। তেওঁ বহু ত্যাগ কৰি এজন শক্তিশালী আৰু যোগ্য় পুত্ৰক ডাঙৰ-দীঘল কৰিলে, আৰু সেয়াই তেওঁৰ আটাইতকৈ ডাঙৰ উত্তৰাধিকাৰ। শক্তিশালী হৈ থাকক, মোৰ প্ৰাৰ্থনা আপোনাৰ আৰু আপোনাৰ পৰিয়ালৰ সৈতে আছে।
প্ৰাক্তন ক্ৰিকেটাৰ সুৰেশ ৰাইনাই লিখিছে, ভাই, আপোনাৰ পিতৃৰ মৃত্যুৰ খবৰ পাই মই গভীৰভাৱে দুখী হৈছো। অনুগ্ৰহ কৰি মোৰ আন্তৰিক সমবেদনা গ্ৰহণ কৰক। এই কঠিন সময়ত তেওঁৰ আত্মাই শান্তি লাভ কৰক আৰু আপোনাক শক্তি প্ৰদান কৰক।
শিখৰ ধাৱনে কয় যে তেওঁ এই শোকৰ সময়ত ৰিংকু আৰু তেওঁৰ পৰিয়ালৰ সৈতে থিয় দি বিদেহী আত্মাক শান্তিৰে চিৰশান্তি লাভ কৰিবলৈ প্ৰাৰ্থনা কৰে।
আই পি এলৰ ফ্ৰেঞ্চাইজি চেন্নাই ছুপাৰ কিংছেও এক বাৰ্তা যোগে গভীৰ শোক প্ৰকাশ কৰি কয় যে এই কঠিন সময়ত ৰিংকু আৰু তেওঁৰ পৰিয়ালক দুখ সহ্য় কৰিবলৈ তেওঁলোকে প্ৰাৰ্থনা কৰিছে ।
ৰিংকুৰ পিতৃ খানচান্দ সিঙে আলিগড়ত এল পি জি চিলিণ্ডাৰ বিতৰক হিচাপে কাম কৰিছিল। ক্ৰিকেট জগতৰ পৰা আন্তৰিক শ্ৰদ্ধাঞ্জলি প্ৰদান কৰাৰ লগতে সমগ্ৰ দেশে এই শোকৰ সময়ত ৰিংকু সিং আৰু তেওঁৰ পৰিয়ালৰ সৈতে থিয় দিছে।
हिन्दुस्थान समाचार / মনোজ কুমাৰ শইকীয়া
