নতুন দিল্লী, ২৭ ফেব্ৰুৱাৰী (হি.স.)। প্ৰধানমন্ত্ৰী নৰেন্দ্ৰ মোদীয়ে শুকুৰবাৰে কয় যে বাজেটৰ প্ৰত্যক্ষ লাভ বা প্ৰভাৱৰ ভিত্তিত নহয়, বৰঞ্চ ইয়াত সন্নিৱিষ্ট নীতিগত পদক্ষেপৰ ভিত্তিত বিচাৰ কৰা উচিত। আচলতে ৰাষ্ট্ৰীয় বাজেট হ্ৰস্বম্যাদী ব্যৱসায়িক নথি নহয়; ই এটা নীতিগত ৰোডমেপ। গতিকে বাজেটৰ ফলপ্ৰসূতা সুনিৰ্দিষ্ট পৰিমাপত মূল্যায়ন কৰিব লাগে।
আজি ভিডিঅ' কনফাৰেন্সিঙৰ জৰিয়তে প্ৰধানমন্ত্ৰীয়ে বাজেটৰ পিছৰ ৱেবিনাৰ উন্নত ভাৰতৰ বাবে প্ৰযুক্তি, সংস্কাৰ আৰু বিত্তত ভাষণ প্ৰদান কৰে। তেওঁ কয় যে বাজেটখনক আন্তঃগাঁথনি সম্প্ৰসাৰণ, বিত্তীয় প্ৰবাহ, সহজ-সৰল জীৱন, স্বচ্ছতাৰে শাসন, আৰু জনসাধাৰণৰ বাবে নতুন সুযোগ সৃষ্টিৰ দৃষ্টিকোণৰ পৰা চাব লাগে। তেওঁ কয় যে আজি দেশখনে সংস্কাৰ এক্সপ্ৰেছত উঠিছে। এই প্ৰবাহ বজাই ৰাখিবলৈ আমি নীতিগত উদ্দেশ্য আৰু লাভ কৰা ফলাফলৰ ওপৰতো গুৰুত্ব দিব লাগিব।
তেওঁ কয় যে আমি এআই, ব্লকচেইন, আৰু ডাটা বিশ্লেষণৰ ব্যাপক ব্যৱহাৰৰ জৰিয়তে স্বচ্ছতা, গতি, আৰু জবাবদিহিতা বৃদ্ধি কৰিব লাগিব, আৰু লগতে অভিযোগ নিৰাময় ব্যৱস্থাৰ প্ৰভাৱ নিৰন্তৰ নিৰীক্ষণ কৰিব লাগিব।
আন্তঃগাঁথনিৰ ক্ষেত্ৰত চৰকাৰে কৰা বিনিয়োগৰ সুবিধা ল’বলৈ উদ্যোগক আহ্বান জনায় প্ৰধানমন্ত্ৰীয়ে। তেওঁ উল্লেখ কৰে যে বিগত ১১ বছৰত আন্তঃগাঁথনি সম্প্ৰসাৰণৰ বাজেট ₹২ লাখ কোটিৰ পৰা ₹১২ লাখ কোটিৰো অধিকলৈ বৃদ্ধি পাইছে। এই বৃহৎ চৰকাৰী বিনিয়োগে ব্যক্তিগত খণ্ডলৈ এক স্পষ্ট বাৰ্তা প্ৰেৰণ কৰে, উদ্যোগ আৰু বিত্তীয় প্ৰতিষ্ঠানসমূহক নবীকৰণ শক্তিৰে আগবাঢ়ি যাবলৈ আহ্বান জনায়।
প্ৰধানমন্ত্ৰীয়ে সময় আৰু ধনৰ অপচয়ৰ পৰা হাত সাৰিবলৈ প্ৰকল্পৰ অনুমোদন আৰু মূল্যায়ন প্ৰক্ৰিয়াক শক্তিশালী কৰাৰ পৰামৰ্শ আগবঢ়ায়। তেওঁ খৰচ-লাভ আৰু দীৰ্ঘম্যাদী খৰচৰ কথা বিবেচনা কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। বণ্ড বজাৰৰ সংস্কাৰে দীৰ্ঘম্যাদী বৃদ্ধি, স্থিতিশীলতা, আৰু বিদেশী বিনিয়োগ বৃদ্ধি কৰিব পাৰে। ইয়াৰ বাবে বিশ্বাস, লিকুইডিটি, নতুন যন্ত্ৰ, আৰু উন্নত বিপদ ব্যৱস্থাপনাৰ প্ৰয়োজন। তেওঁ সকলো অংশীদাৰক বাজেটত উপস্থাপন কৰা নতুন সুযোগসমূহ আত্মসাৎ কৰি উন্নত ফলাফল প্ৰদানৰ বাবে একেলগে কাম কৰিবলৈ আহ্বান জনায়।
हिन्दुस्थान समाचार / মনোজ কুমাৰ শইকীয়া
