নতুন দিল্লী, ২৫ ফেব্ৰুৱাৰী (হি.স.)। প্ৰধানমন্ত্ৰী নৰেন্দ্ৰ মোদীয়ে আজি কিছু সময়ৰ পূৰ্বে দুদিনীয়া ইজৰাইল ভ্ৰমণৰ বাবে ৰাওনা হয় । এয়া তেওঁৰ দ্বিতীয় ভ্ৰমণ। পশ্চিম এছিয়াত বৰ্ধিত উত্তেজনা, বিশেষকৈ আমেৰিকা আৰু ইৰাণৰ মাজৰ অৱনতি ঘটা সম্পৰ্কৰ মাজতে সংঘটিত এই ভ্ৰমণ ভাৰত-ইজৰাইলৰ কৌশলগত অংশীদাৰিত্ব আৰু অধিক শক্তিশালী কৰাৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে। ইজৰাইলৰ সংসদতো ভাষণ দিব প্ৰধানমন্ত্ৰী মোদীয়ে।

আনুষ্ঠানিক মুখপাত্ৰৰ মতে, ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ আমন্ত্ৰণত ২৫-২৬ ফেব্ৰুৱাৰীত ইজৰাইললৈ ৰাজ্যিক ভ্ৰমণলৈ ৰাওনা হৈছিল প্ৰধানমন্ত্ৰী নৰেন্দ্ৰ মোদীয়ে। ইজৰাইললৈ প্ৰধানমন্ত্ৰীৰ এয়া দ্বিতীয়টো ভ্ৰমণ। এই ভ্ৰমণৰ সময়ত প্ৰধানমন্ত্ৰী মোদীয়ে ইজৰাইলত নেতান্যাহুক সাক্ষাৎ কৰিব।

দুয়োগৰাকী নেতাই ভাৰত-ইজৰাইল কৌশলগত অংশীদাৰিত্বত লাভ কৰা উল্লেখযোগ্য অগ্ৰগতিৰ পৰ্যালোচনা কৰি বিজ্ঞান আৰু প্ৰযুক্তি, উদ্ভাৱন, প্ৰতিৰক্ষা আৰু নিৰাপত্তা, কৃষি, জল ব্যৱস্থাপনা, বাণিজ্য আৰু অৰ্থনীতি, আৰু জনসাধাৰণৰ আদান-প্ৰদানকে ধৰি বিভিন্ন ক্ষেত্ৰত সহযোগিতাৰ সুযোগ সম্পৰ্কে চিন্তা-চৰ্চা কৰিব। লগতে দুয়োগৰাকী নেতাই পাৰস্পৰিক স্বাৰ্থৰ আঞ্চলিক আৰু বিশ্বব্যাপী বিষয়ত মত বিনিময় কৰাৰ সম্ভাৱনা আছে। ইজৰাইলৰ ৰাষ্ট্ৰপতি আইজাক হাৰ্জোগকো সাক্ষাৎ কৰিব প্ৰধানমন্ত্ৰীয়ে।

ভাৰতীয় জনতা পাৰ্টিয়ে নিজৰ টুইটাৰ হেণ্ডেলত লিখিছে, নেছেটক সম্বোধন কৰা প্ৰথমজন ভাৰতীয় প্ৰধানমন্ত্ৰী হিচাপে মোডীৰ এই ভ্ৰমণে কূটনীতি আৰু মৰ্যাদাৰ সংমিশ্ৰণ ঘটায়। এই ভ্ৰমণ ইতিহাস, মূল্যবোধ আৰু আগন্তুক কৌশলগত অংশীদাৰিত্বৰ ওপৰত ভিত্তি কৰি গঢ় লৈ উঠিছে।

উল্লেখযোগ্য যে এই ভ্ৰমণত আইৰন ড’ম বায়ু প্ৰতিৰক্ষা ব্যৱস্থা, প্ৰায় ₹৭১,০০০ কোটি টকাৰ সম্ভাৱ্য প্ৰতিৰক্ষা চুক্তি আৰু এআই ভিত্তিক ড্ৰ’ন প্ৰযুক্তিৰ ওপৰত গুৰুত্বপূৰ্ণ আলোচনা হ’ব বুলি আশা কৰা হৈছে।

हिन्दुस्थान समाचार / মনোজ কুমাৰ শইকীয়া